1 Corintios 5 - DIOSPA QHELQACHISQ

Khuchichakuspa purejta iglesiamanta wijch'una

¹ Kunantaj kaymantañataj parlayta munaykichej: Qankunamanta ujniykichej tatanpa warminwan tiyakapushasqanmanta yachakun. Chay jina millaytaqa Diosman mana kutirikojkunapis mana ruwankuchu.

² Qankunatajrí may kasqaykichejta yuyakushankichej. Manachu astawanqa chay jina millay ruwasqanmanta llakikunaykichej karqa? Manachu chay jina millayta ruwaj runataqa qankuna ukhumanta qharqonaykichej karqa?

³ Noqa qankunamanta karupi kashaspapis, sonqoypeqa qankunawan kashani. Ajinaqa chaypipis kashayman jina niniña chay jina millayta ruwajqa juchayojpuni kasqanta.

⁴ Qankuna maypachachus tantakunkichej chaypachaqa, noqa qankunawanpis kashayman jinata qhawaychej, jinataj yachaychej qankunaman Jesucristo atiyta qosqasuykichejta. Chantá Jesucristoj sutinpi

⁵ chay runata iglesiamanta qharqospa, Kuraj Supaypa makinman jaywaykuychej. Ajinamanta Supay ukhunta ñak'arichinman chaypis, alman qhespichisqa kanqa Tukuyta Kamachej Jesús kutimojtin.

⁶ Chay jina ruwajta qhawakuspalla runaykachasqaykichejqa manapuni allinchu. Manachu yachankichej juchaqa tukuyman chimpaykusqanta, imaynatachus pisi levaduralla tukuy masata poqochin, ajinata?

⁷ Chayrayku qankunamanta chay ñawpa levadurata wijch'uychej, mosoj masa jina kanaykichejpaj. Ajinamanta qankuna mana levadurayoj t'anta jina kankichej. Cristopis, Pascuapi ñak'ana Cordero jina juchanchejrayku wañunña.

⁸ Chayrayku, kunanqa Pascua raymita ruwanachej, ch'uwa sonqowan, llimphu kawsaywan ima. Chayqa mana levadurayoj t'antawan ninakun. Amallataj sajra runa kanachu, nitaj pitapis mana allinta ruwanachu, imaraykuchus jina kanaqa ñawpa levadurayoj ruwasqa t'antawan ninakun.

⁹ Ñawpa cartata apachimusqaypi nerqaykichej khuchiriyopi purejkunawan mana kawsakunaykichejta.

¹⁰ Ajinata nispa, mana niytachu munarqaykichej t'aqakunaykichejta Diosman mana kutirikojkuna khuchichakuspa purejkunamanta, chayrí mich'a kajkunamanta, suwa kajkunamanta, lantita yupaychajkunamanta ima. Sichus paykunamanta t'aqakunaykichej kanman chayqa, kay pachamanta llojsipunaykichejchá kanman.

¹¹ Manachayqa noqa chay cartapi niyta munarqaykichej ama kawsakunaykichejta ni mayqen runawan: Noqaqa Cristota qhatikoj nishaspa khuchiriyopi purejwan, chayrí mich'a kajwan, chayrí lanti yupaychajwan, runa masinpaj sajrata rimajwan, chayrí machaykojwan, suwakojwan ima. Chay jina purejkunawan ama mikhullaychejpischu.

¹² Noqajtaqa ni ima ruwanay kanchu jawapi kajkunata juzganaypaj. Chaywanpis qankunamin iglesiapi kajkunata juzganaykichej tiyan.

¹³ Mana iglesiamanta kajkunataqa Diosmin juzganqa. Chayrayku Diospa Qhelqachisqanpi nisqanman jina, chay jina millayta ruwaspa juchallejta qankuna ukhumanta wijch'uychej.