1 Corintios 16 - DIOSPA QHELQACHISQ

Jerusalenpi iglesiata yanapanapaj qolqe tantana

¹ Kunanqa noqa parlayta munani Jerusalén llajtapi Diosta qhatejkunata yanapanapaj qolqeta tantanaykichejmanta. Imatachus Galaciapi iglesiakunaman yachacherqani, ajinallatataj qankunapis ruwaychej.

² Sapa semana qallariyta sapa ujniykichej ganakusqaykichejman jina wakinta t'aqaychej. Chantá chayta waqaychaychej, chayamojtiy, amaña qolqeta tantanaykichejpaj.

³ Noqataj chayamuspa, pikunatachus ajllankichej, chaykunaman cartata qosaj, paykunawan qolqe tantasqaykichejta Jerusalenman apachinaypaj.

⁴ Sichus noqa rinay allin kanqa chayqa, paykuna noqawan renqanku.

Pablo puririnanpaj wakichikun

⁵ Qankunata watukoj jamuspaqa, noqa Macedonianta jamusaj, imaraykuchus chaynintapuni jamunay kashan.

⁶ Ichapis qankunawan chiri mit'a pasanankama qhepakusaj. Chantá qankuna maymanchus rinay kashan, chayman rinaypaj yanapawankichej.

⁷ Mana pasaj jinallachu qankunata watukuyta munaykichej. Manachayqa Tukuyta Kamachej Jesús munajtenqa, uj mashkha p'unchayllatapis qankunawan karikuyta munashani.

⁸ Chaykamataj Pentecostés raymi p'unchaykama Éfeso llajtapi qhepakusaj.

⁹ Chay llajtapi noqawan churanakojkuna ashkha kanku chaypis, Jesusmanta sumaj willayta uyarinankupaj wakichisqa ashkhallataj kanku.

¹⁰ Sichus Timoteo qankunaman chayamonqa chayqa, allinta payta yanapaychej, qankuna ukhupi allillanta kananpaj, imaraykuchus paypis noqa jinallataj Tukuyta Kamachej Jesuspa ruwananpi purishan.

¹¹ Chayrayku ama pipis paytaqa pisipaj qhawachunchu. Aswanpis, maypichus noqa kashani chayman kutimunanpaj, payta yanapaychej, imaraykuchus wawqe panakunawan khuska jamunanta suyashani.

¹² Wawqenchej Apolosta maytapuni nerqani wawqekunawan khuska qankunata watukoj rinanta. Paytajrí kunanpi mana qankunata watukoj riyta atenqachu. Chaywanpis, mayk'ajchus qankunaman rinanpaj jina kanqa, chaypacha renqa.

Pablo wawqe panakunata napaykun

¹³ Qhawaspallapuni kaychej, jinataj Diospi atinikuspa sinch'ita sayaychej. Wapu kaychej, kallpachakuychejtaj.

¹⁴ Imatapis ruwaspaqa, munakuywan ruwaychej.

¹⁵ Wawqe panakuna, yachankichejña Ajaya suyupi Estefanaspa ayllun ñawpajta Jesucristomanta sumaj willayta jap'ikusqankuta. Kunantaj paykuna Diosta qhatejkunata tukuy sonqo yanapashanku.

¹⁶ Noqa tukuy sonqo mañarikuykichej Estefanasta kasunaykichejta, jinallataj pay jina yanapakojkunata, chantá Diospa ruwananta tukuy sonqo ruwajkunata ima.

¹⁷ Noqa kusikuni Estéfanas, Fortunato, Ajaico ima jamusqankumanta, imaraykuchus qankuna mana kaypi kajtiykichej, paykuna ruwaysiwanku.

¹⁸ Paykuna sonqoyta kallpachawarqanku, jinallataj qankunajtapis. Paykuna jina allinta ruwajkunata allinpaj qhawaychej.

¹⁹ Asiapi kaj iglesiakuna napaykamusunkichej. Aquilawan, warmin Priscilawan, jinallataj wasinkupi tantakoj iglesiapis Tukuyta Kamachej Jesuspa sutinpi napaykamullasunkichejtaj.

²⁰ Jinallataj kaypi kaj tukuy wawqe panakuna napaykamusunkichej. Qankunapis ujkuna ujkuna tukuy sonqo napaykunakuychej.

²¹ Noqa kikiypuni kayta qhelqarimuspa, napaykamushaykichej.

²² Pichus Tukuyta Kamachej Jesucristota mana munakojqa maldicisqa kachun. Jamuy ari, Tukuyta Kamachej Jesusniyku.

²³ Tukuyta Kamachej Jesucristoj qhasilla k'acha yanapaynin qankunawan kachun.

²⁴ Noqa tukuyniykichejta munakuykichej Cristoman ujchasqa kasqanchejrayku. Ajina kachun.