1 Corintios 12 - DIOSPA QHELQACHISQ

Santo Espíritu ruwanapaj atiyta qon

¹ Munasqa wawqe panaykuna, noqa munani Santo Espíritu ruwanapaj atiyta qosqanmanta yachanaykichejta.

² Qankuna yachankichej, manaraj Cristopi atinikushaspa, qankuna mana parlayta atej lantikunata yupaychanaykichejpaj qhatatasqa kasqaykichejta.

³ Chayrayku kayta yachanaykichejta munani: Mana pipis Diospa Espiritunnejta parlajqa ninmanchu: Jesús maldicisqa kachun, nispa. Nillataj pipis niyta atinchu: Jesusqa Tukuyta Kamachejmin, nispa, manachus Santo Espíritoj yanapasqan kanman chayqa.

⁴ Iglesiamanta kajkunapaj imaymana atiykuna tiyan ruwanankupaj. Chaykunata qojrí Santo Espiritulla.

⁵ Iglesiamanta kajkunaqa tukuy imaymanamanta Diospaj llank'ayta atinchej. Chaywanpis tukuyninchej Tukuyta Kamachej Jesusllapaj llank'anchej.

⁶ Jinallataj Iglesiamanta kajkunaqa tukuy imaymana ruwanayoj kanchej. Chaywanpis uj k'ata Dioslla tukuyninchejman atiyta qowanchej tukuy ruwanata ruwananchejpaj.

⁷ Diosqa Santo Espiritunejta sapa ujman ruwanapaj atiykunata qon, purajmanta yanapanakunanchejpaj.

⁸ Santo Espíritu wakinman qon yuyaywan, yachaywan ima sumajta yuyaychayta atinankupaj. Wakinmantaj kikin Santo Espiritullataj atiyta qon sumajta yachaspa parlanankupaj.

⁹ Chay kikin Espiritullataj wakinman atiyta qon Diospi sinch'ita atinikuyta atinankupaj, wakinmantaj atiyta qon onqosqakunata qhaliyachinankupaj.

¹⁰ Ujmanqa atiyta qon t'ukuna imakunata ruwananpaj, ujmantaj atiyta qon Diosmanta sut'inchananpaj. Ujmanqa atiyta qon reparananpaj iglesiapi wajkunaj yachachisqanku Diospa Espiritunmantachus kasqanta, chayrí manachus, chayta. Ujmantaj mana rejsisqa parlaykunata parlananpaj atiyta qon. Ujmantaj atiyta qon, chay waj parlaypi parlasqankuta sut'inchananpaj.

¹¹ Chay tukuy imata ruwanapaj atiyta qoj Santo Espiritoqa ujlla. Paytaj munasqanman jina ruwanapaj atiyta sapa ujman rak'iran.

Iglesiapeqa tukuy ruwanayoj kanchej

¹² Kayta nisunman: Runaj ukhunpataqa ashkha iman tiyan. Chaywanpis ukhu ashkha imayoj kashaspapis, ukhoqa ujlla. Ajinallataj Cristoj ukhunwanpis kashan, mayqenchus Iglesian, chaywan.

¹³ Jinallataj Santo Espiritulla tukuyta bautizawarqanchej, uj ukhu jinalla kananchejpaj judiokuna, mana judiokuna, wata runakuna, mana wata runa kajkuna ima. Diostaj chay kikin Santo Espiritullantataj tukuyninchejman qowarqanchej.

¹⁴ Chaywanpis runaj ukhonqa mana uj imayojllachu, manachayqa ashkha imayoj.

¹⁵ Chakichus ninman: Mana maki kasqayrayku, mana ukhojtachu kani, nispa chayqa, chayraykuchu mana ukhumanta kanman?

¹⁶ Ninrichus nillanmantaj: Mana ñawi kasqayrayku mana ukhojtachu kani, nispa chayqa, chayraykuchu mana ukhumanta kanman?

¹⁷ Sichus tukuy ukhu ñawilla kanman chayqa, imaynatataj uyarisunmanri? Chayrí, tukuy ukhuchus ninrilla kanman chayqa, imawantaj muskhirisunmanri?

¹⁸ Chaywanpis ukhunchejqa ashkha imayoj, Diostaj munasqanman jina sapa imanta maypichus kananman churarqa.

¹⁹ Ukhunchejpa imankuna tukuyninchus uj imalla kanman chayqa, mana runachu kanman.

²⁰ Ajinaqa ukhunchej ashkha imayoj, chaywanpis ujlla.

²¹ Ñaweqa mana makita niyta atinmanchu: Mana qanta necesitaykichu, nispa. Nitaj umapis chakita niyta atinmanchu: Mana qankunata necesitaykichejchu, nispa.

²² Aswanpis ukhoj imankunamanta wakin mana kasu ruwanapaj qhawasqa kajraj astawan yanapawanchej.

²³ Jinallataj ukhunchejpi wakin imankuna mana maypaj qhawasqata aswan allinpaj qhawanchej. Chayrayku chay mana rikuchinapaj jina kajkunata pakanchej.

²⁴ Ukhunchejpi kaj allinpaj qhawasqa imakunaqa mana allinpaj qhawanata necesitankuchu. Aswanpis Dios ukhunchejta sumajta wakicherqa, mana allinpaj qhawasqa kajkunata maypaj qhawananchejpaj.

²⁵ Ajinata Dios ruwarqa ukhunchejpi ama t'aqanaku kananpaj, manachayqa ukhoj tukuy iman paykunapura qhawarinakunankupaj.

²⁶ Sichus ukhunchejmanta ujnin iman ima nanayta ñak'arinman chayqa, paywan khuska tukuyninku ñak'arinku. Sitajchus ujnin iman jatunchasqa kanman chayqa, tukuyninku paywan kusikullankutaj.

²⁷ Qankunaqa tukuyniykichej Cristoj ukhunmanta kankichej, sapa ujtaj chay ukhoj imankuna kankichej.

²⁸ Diostaj Iglesiapi sapa ujta ruwanayojta churan: Ñawpajta Jesuspa kuraj kachankunata, qhepanta Diosmanta sut'inchajkunata, chaymanta nisqanta yachachejkunata, chaymantataj t'ukuna imakunata ruwajkunata, onqosqakunata qhaliyachejkunata, yanapajkunata, iglesiata pusarejkunata, chantá mana rejsisqa parlayta atejkunata ima.

²⁹ Tukuychu Jesuspa kuraj kachan kanku? Tukuychu Diosmanta sut'inchajkuna kanku? Tukuychu yachachejkuna, chayrí t'ukuna imakunata ruwajkunapis kanku?

³⁰ Jinallataj tukuyninkuchu onqosqakunata qhaliyachiyta atinku? Tukuyninkuchu mana rejsisqa parlaykunata parlanku? Tukuyninkuchu chay parlaykunata sut'inchanku? Mana, icharí?

³¹ Chayrayku qankuna imata jina munanaykichej, ima atiykunachus iglesiata astawan yanapanman, chaykunata. Chaywanpis kunan noqa imachus aswan sumaj kashan, chayta yachachisqaykichej.