1 Corintios 11 - DIOSPA QHELQACHISQ

Diosta yupaychana wasipi imatapis allinta ruwana

¹ Qankunaqa noqa jina ruwaychej, imaynatachus noqapis Cristo jina ruwani, ajinata.

² Mayta kusikuni noqamanta yuyarikusqaykichejmanta, yachachisqayman jina ruwasqaykichejmantapis.

³ Chaywanpis yachanaykichejta munani Cristoqa tukuy qharej uman jina kasqanta, qharitaj warminpaj uman jina, Diostaj Cristoj uman jina.

⁴ Pi qharichus umanta suk'umpaykukuspa Dioswan parlarikunman, chayrí Diospa simi nisqanta sut'inchanman chayqa, Cristota mana jatun respetowanchu qhawashan.

⁵ Ajinallataj warmipis mana uman suk'umpasqa Dioswan parlarikunman, chayrí Diospa simi nisqanta sut'inchanman chayqa, qosanta mana respetowanchu qhawashan. Mana umanta suk'umpakuspaqa, chujchantapis raphachikunman jina kanman.

⁶ Warmichus umanta mana suk'umpakunman chayqa, allin kanman chujchanta k'utuchikunan. Sichus warmipaj chujchanta k'utuchikunan chayrí raphachikunan p'enqay kanman chayqa, suk'umpakuchun.

⁷ Qhareqa ama umanta suk'umpakuchunchu, imaraykuchus payqa Diospa rijch'ayninman ruwasqa, rikuchintaj Diospa jatun kayninta. Warmitaj qosanpa jatun kayninta rikuchillantaj.

⁸ Ñawpaj kaj qhareqa mana warmimantachu ruwasqa karqa, manachayqa ñawpaj kaj warmi qharimanta ruwasqa karqa.

⁹ Nillataj qhareqa warmiraykuchu ruwasqa karqa, aswanpis warmi qharirayku ruwasqa karqa.

¹⁰ Chayrayku warmeqa angelkunata respetowan qhawasqanrayku, chantá qosanpa kamachiyninpi kasqanta yachayta qonanpaj umanta suk'umpakunan tiyan.

¹¹ Chaywanpis noqanchej Diosta qhatejkunapaj, qhareqa mana kanmanchu mana warmi kajtenqa, nitaj warmipis mana qhari kajtenqa.

¹² Ñawpaj kaj warmi qharimanta ruwasqa karqa chaypis, chaymantapacha tukuy qhari warmimanta paqarinku. Ajinaqa chay tukuy ima Diosmantamin.

¹³ Qankuna kikiykichej reparaychej: Allinchu kanman warmeqa umanta mana suk'umpakuspalla Dioswan parlarikunan? Mana, icharí?

¹⁴ Kay kawsaypi usu yachachiwanchej qharipajqa chujchanta wiñachikunan p'enqay kasqanta.

¹⁵ Warmipajrí chujchanta wiñachinan allin, imaraykuchus paymanqa chujchan qosqa karqa umanta qhatananpaj.

¹⁶ Chaywanpis, sichus pipis kaymanta churanakuspa, siminakuyta munanman chayqa, noqayku, jinataj Diospa iglesiankunapis mana waj usuta rejsiykuchu.

Tukuyta Kamachej Jesuspa Cenanta allinta ruwana

¹⁷ Kayta qankunaman qhelqamuspaqa, mana niykichejmanchu: Walejta ruwankichej, nispa. Manachayqa tantakusqaykichej qankunapaj allin kanantaqa, mana yanapasunkichejchu.

¹⁸ Uyarini iglesia jina tantakojtiykichej, mana allintachu apanakusqaykichejta, imaraykuchus t'aqaranakuspa, qankunapura churanakunkichej. Noqataj yuyani ajinapuni kasqanta.

¹⁹ Ajinaqa, qankuna ukhupi t'aqaranakuy kananpuni tiyan, yachakunanpaj mayqenkunachus cheqapuni Diospata kasqaykichej.

²⁰ Ajinata tantakuspaqa, Tukuyta Kamachej Jesuspa Cenanta mana tukuy sonqo mikhunaykichejpajchu tantakunkichej.

²¹ Tukuy khuska mikhunaykichej kashajtin, wakinkuna ñawpaykuspa, cenankuta mikhukapunku, wakinkunataj mana mikhusqa qhepakunku, wakinkunatajrí machakapunku.

²² Imataj chayri? Mikhunaykichejpaj, ujyanaykichejpajpis wasiykichej tiyan. Ajinata ruwaspaqa, mana imayojkunata p'enqachinkichej, Diospa Iglesiantataj pisipaj qhawankichej. Chaymanta imatataj nisqaykichej? Allinta ruwankichej, nispachu nisqaykichej? Ajinata ruwasqaykichejmanta mana niykichejmanchu walejta ruwasqaykichejta.

Jesuspa Cenanta maychus kajta ruwana

²³ Imatachus Tukuyta Kamachej Jesús yachachiwarqa, noqa chayllatataj qankunaman yachacherqaykichej: Maypachachus Tukuyta Kamachej Jesús jap'ichisqa kanan kasharqa, chay ch'isillataj t'antata oqharerqa.

²⁴ Diosta pachis niytawantaj, chay t'antata yachachisqankunaman rak'ispa, nerqa: Kaymin ukhoyqa, chaytaj qankunarayku jaywasqa kanqa. Kay t'antata mikhuychej, noqamanta yuyarikuspa, nispa.

²⁵ Ajinallatataj cenaytawankama copata jap'ispa, nerqa: Kay vinoyoj copaqa wañusqaywan uj mosoj tratota ruwasqayta sut'inchashan. Sapa kuti kay copamanta ujyaspa, noqamanta yuyarikunkichej, nispa.

²⁶ Ajina ari, qankunapis sapa kuti kay t'antata mikhuspa, kay copamanta ujyaspataj, Tukuyta Kamachej Jesús wañusqanmanta willankichej pay kutimunankama.

Imayna sonqowanchus Jesuspa Cenanta mikhuna

²⁷ Ajinallatataj sichus pipis kay t'antata mikhunman, kay copamantapis ujyanman mana chaypaj jina kashaspa chayqa, Tukuyta Kamachej Jesuspa ukhunpa, chantá wañuspa yawar jich'asqanpa contranpi juchallin.

²⁸ Chayrayku, manaraj t'antata mikhushaspa, nitaj copamanta ujyashaspa, sapa ujniykichej sonqoykichejta allinta qhawarikuychej, Jesuspa Cenanta mikhunapaj jinachus manachus kashasqaykichejta yachanaykichejpaj.

²⁹ Sichus pipis mikhun, ujyantaj Tukuyta Kamachej Jesuspa ukhunta mana maypaj qhawaspa, mayqenchus iglesian kashan, chayta, ajinata ruwasqanmanta Tata Dios payta juchachanqa.

³⁰ Chayraykumari, qankuna ukhumanta ashkha onqosqa kashankichej, pisi kallpayojtaj, wakinkunataj wañunkuña.

³¹ Sichus noqanchej kikinchej sonqonchejta allinta qhawarikusunman chayqa, Dios mana jasut'iwasunmanchu.

³² Chaywanpis, sichus Tukuyta Kamachej Jesús jasut'iwanchej chayrí, wanaspa yachananchejpaj jasut'iwanchej, ama Diosman mana kutirikojkunawan khuska juchachasqa kananchejpaj.

³³ Chayrayku, munasqa wawqe panaykuna, Tukuyta Kamachej Jesuspa Cenanta mikhunapaj tantakuspaqa, suyarinakuychej khuska mikhunaykichejpaj.

³⁴ Mayqenpis yarqhachikuspaqa, wasinpi mikhuchun, mana allinta ruwanaykichejpaj tantakusqaykichejmanta ama Tata Dios jasut'isunaykichejpaj. Chantá wakin imakunachus allinchanaraj kashan, chaykunata noqapuni jamuspa allinchasaj.