1 Corintios 10 - DIOSPA QHELQACHISQ

Diosllata yupaychana

¹ Munasqa wawqe panakuna, noqa munani qankuna yuyarikunaykichejta ñawpa tatanchejkuna ch'innejta rishajtinku imachus kasqanta. Paykunaqa tukuyninku phuyoj llanthusqan risqanku, tukuyninkutaj Puka Mama Qochata ch'aki pampata jina chimpasqanku.

² Ajinamanta tukuyninku phuyupi chantá Puka Mama Qochapi ima bautizasqa kaspa, Moisesman ujchasqa karqanku.

³ Chantá tukuyninku Diospa qosqan mikhunata mikhorqanku.

⁴ Jinallataj tukuyninku Diospa qosqan yakuta ujyarqanku. Chaytaj paykunawan khuska purej chhankamanta phullchimusqa, chay chhankataj Cristo karqa.

⁵ Chaywanpis, paykunamanta ashkhawan Dios mana kusisqachu karqa. Chayrayku chay ch'innejpi wañorqanku, ayankutaj pachanpi qhepakorqa.

⁶ Chay tukuy ima llakiy paykunata qhatirerqa, noqanchejtaj chaymanta yachaqakunanchej tiyan, ama paykuna jina mana allin kajta munapayananchejpaj.

⁷ Chayrayku qankunaqa lantikunata ama yupaychaychejchu, imaynatachus paykunamanta wakin yupaycharqanku, jinataqa. Diospa Qhelqachisqanpi nin: Chay runakunaqa mikhunankupaj, chantá ujyanankupaj ima tiyarikorqanku. Chaymantataj tukuy imaymanata ruwaspa kusiririkorqanku, nispa.

⁸ Ama noqanchejqa paykunamanta wakinkuna jina khuchiriyoman qokunachejchu. Chaypacha khuchiriyoman qokojkunaqa uj p'unchaylla 23.000 wañuchisqa karqanku.

⁹ Jinallataj Cristo imata ruwananpaj atiyniyojchus manachus kasqanta yachariyta munaspa ama imatapis ruwanachu, imaynatachus paykunamanta wakin ruwarqanku, jinataqa. Chayta ruwasqankuraykutaj katarikunaj khanisqan wañurarqanku.

¹⁰ Nillataj Diospa contranta thutunachu, imaynatachus paykunamanta wakin thutorqanku, jinataqa. Chaypacha Diospa angelninñataj paykunata wañuracherqa.

¹¹ Chay tukuy llakiykuna paykunata qhatirerqa noqanchej yachaqakunanchejpaj. Chaytaj qhelqasqa kashan kay qhepa p'unchaypi kawsajkuna ama paykuna jinallataj ruwananchejpaj.

¹² Ajinaqa, pichus sinch'ita sayashasqanta yuyajqa ama urmananpaj allinta qhawakuchun.

¹³ Qankuna juchallinaman tanqasqa kaspaqa, yachaychej wajkunapis qankuna jinallataj juchallinaman tanqasqa kasqankuta. Diostajrí nisqanta junt'aj kasqanrayku mana saqesonqachejchu mana awantay atinata juchallinaman tanqasqa kanaykichejta. Aswanpis juchallinapaj tanqasqa kashajtiykichej, Diosllataj chaymanta maynintachus llusp'inaykichejta rikuchisonqachej, ajinamanta sinch'ita sayaykuyta atinaykichejpaj.

¹⁴ Chayrayku munasqa wawqe panaykuna, lantikunata yupaychanamanta ayqeychej.

¹⁵ Noqa parlashaykichej yuyayniyoj runakunaman jina. Chayrayku qankuna kikiykichej kay nisqay jinachus manachus kasqanta watuychej.

¹⁶ Tukuyta Kamachej Jesucristoj Cenanpi copamanta Diosta pachis nispa, manachu Cristoj ruwasqanwan ujchakushanchej, maypachachus cruzpi wañuspa yawarninta jich'arqa, chaypacha? Jinallataj t'antata partispa mikhuspapis, manachu Cristoj ruwasqanwan ujchakushanchej, maypachachus cruzpi wañorqa, chaypacha?

¹⁷ Noqanchej ashkha kaspapis, uj t'antallamanta mikhunchej. Ajinata ruwaspataj, uj ukhullamanta kasqanchejta yachayta qoshanchej.

¹⁸ Israelitakuna imatachus ruwanku, chaymanta unancharina: Paykuna Diosman uywa ñak'asqata altarpi jaywasqankumanta mikhuspa, Dioswan, chantá paykunapura ima ujchasqa kasqankuta rejsichinku.

¹⁹ Kayta nispa, imatataj niyta munashani? Lantikunaman jaywasqa mikhuna aswan kasqantachu, chayrí lantikuna cheqapuni dioskuna kasqankutachu niyta munashani?

²⁰ Manapuni. Noqa nini: Mana judío kajkuna uywa ñak'asqata jaywaspaqa, supaykunaman jaywanku, manataj Diosmanchu. Noqataj mana munanichu supaykunawan ujchasqa kanaykichejta.

²¹ Qankuna mana atinkichejchu Tukuyta Kamachej Jesuspa copanmanta ujyashaspa, supaykunaj copanmantapis ujyayta. Nillataj atinkichejchu Tukuyta Kamachej Jesuspa Cenanmanta mikhuyta, supaykunaj mikhunanmantapis mikhuyta.

²² Chayta ruwaspa manachu yachankichej Tukuyta Kamachej Jesucristota celosachishasqanchejta? Chayrí yuyankichejchu paymanta aswan atiyniyoj kasqanchejta?

Diosta qhatej masinchejpa allinninta mask'ana

²³ Qankuna ninkichej: Noqaqa imatachus munasqayta ruwayta atini, nispa. Arí, jinapuni. Chaywanpis mana tukuychu walej. Arí, imatachus munasqanchejta ruwayta atinchej. Chaywanpis mana tukuyninchu yuyayninpiña kanaman chayananchejpaj yanapawanchej.

²⁴ Chayrayku mana noqanchejpa allinnillanchejtachu mask'ana tiyan, aswanpis wajkunaj allinninkuta.

²⁵ Ajinaqa qankuna qhatumanta rantikuspa, aychata mikhuyta atinkichej, ama sonqoykichej iskayrayananpaj ni imata tapukuspa.

²⁶ Diospa Qhelqachisqanpi nin: Kay pachaqa Tukuyta Kamachej Diospata, jinallataj chaypi tukuy ima kajpis, nispa.

²⁷ Sichus Diosman mana kutirikoj runa mikhunaykichejpaj wajyasunkichejman, qankunataj riyta munankichej chayqa, tukuy ima qosqanta mikhuychej, ama imata tapuspa sonqoykichej ama iskayrayananpaj.

²⁸ Chaywanpis mikhushajtiykichej, sichus pipis willasunkichejman: Kay aychaqa lantikunaman jaywasqa karqa, nispa chayqa, willasqanrayku ama mikhuychejchu, willasojpa sonqon ama nanachisqa kananpaj.

²⁹ Kayta nispaqa, noqa wajpa sonqonmanta parlashani, mana sonqoykichejmantachu. Imaraykutaj waj runa imatachus yuyasqanrayku noqa ruwayta atisqaymanta jark'asqa kaymanri?

³⁰ Sichus ima mikhunamantapis Diosta pachis nini chayqa, imaraykutaj mikhusqaymanta pipis rimanan kanmanri?

³¹ Ajinaqa mikhuspapis, ujyaspapis, chayrí imata ruwaspapis, tukuy imata ruwaychej Dios chaynejta jatunchasqa kananpaj.

³² Ama imatapis ruwaychejchu judiokuna, chantá mana judío kajkuna Diosman kutirikuyta mana munanankupaj jinaqa. Nillataj imatapis ruwaychejchu Diospa iglesianmanta kajkuna juchallinankupaj jina.

³³ Noqapis tukuy imata ruwani tukuyta kusichiyta munaspa. Mana noqaj allinnillaytachu mask'ashani, aswanpis wajkunaj allinninkuta paykuna qhespichisqa kanankupaj.