TAKIYKUNA 6 - DIOSPA QHELQACHISQAN DEUTEROCANONICAL

Kawsaqekunaj takisqanku

¹ K'achita warmikunamanta astawan k'achita warmi, maymantaj rin munasqaykiri? May ñantataj rinman karqa munasqaykiri? Qanwan khuska rispa, mask'amunachej.

Munasqa warmej takisqan

² Munasqayqa huertanman rin, ima munayta q'aparishaj huertanman, huertanpi michimunanpaj, lirio t'ikatawan pallamunanpaj.

³ Munasqayqa noqajta, noqapis paypata kani. Payqa lirio t'ika chawpillapi ovejankunata michin.

Munakoj qharej takisqan

⁴ Qanqa, munasqetáy, k'achita kanki, Tirsa llajta jina, Jerusalén llajta jinallataj may munana. Ch'askakuna jina manchay k'achitapuni kanki.

⁵ Amaña qhawawaychu ari, ñawisituykeqa sonqoyta suwawanña. Chujchaykeqa Galaad kinraypi cabrakuna phinkiririspa urayk'amushankuman jina.

⁶ Kiruykeqa chaypachallaraj millman ruthurasqa oveja jina kanku, yakuwan mayllasqamanta llojsimoj oveja jina. Sapa ujpis yananwan kaspa mana ch'usaj kanchu.

⁷ Uyitaykeqa granada phatasqa jina, suk'umpayki urapi pakasqa.

⁸ Qoyakuna sojta chunkapis kachunku, pusaj chunkataj kuraj kamachejpa waj warminkunapis, sipaskunapis yupay mana atina.

⁹ Noqaj urpilitayrí uj k'atalla, pay jinaqa ni ujpis kanchu. Pay k'atalla mamanpa ususin, mamanpa aswan munasqa kaj. Tukuy sipaskuna payta rikuytawan, ninku: Kusikuyniyojmin payqa, nispa. Paytaqa qoyakunawan, kuraj kamachejpa waj warminkunawan ima maytapuni jatunchanku.

Kawsaqekunaj takisqanku

¹⁰ Pitaj sut'iyayta intej k'anchaynin jina rikhurimunri, killa jina k'achita, inti jina k'ancharishajri, may chhika lliphipishaj ch'aska jina manchay t'ukunari?

Munasqa warmej takisqan

¹¹ Nogal sach'ayojkuna huertaman urayk'orqani, imachus chay vallepi poqon, chayta qhawarej. Uva sach'a ijimushajta, granadakunatapis t'ikashajta, chayta qhawarej rerqani.

¹² Chaymanta manaña yuyarikorqanichu imachus kasqanta, kamachejniypa carretanpiña rikhurinaykama.

Kawsaqekunaj takisqanku

¹³ 13 (7.1) Kutirimuy, kutirimuy ari Sulamita. Kutirimuy, kutirimullay ari, rikusuyta munayku. Imatataj rikuyta munankichej Sulamitamantari? Iskay jara chawpipi tusojta rikuyta munayku.