TAKIYKUNA 4 - DIOSPA QHELQACHISQAN DEUTEROCANONICAL

Munakoj qharej takisqan

¹ Qanqa k'achita kanki, munasqetáy, may k'achitapuni kanki. Ñawisituykeqa iskay urpi jina, suk'umpayki urapi pakasqa. Chujchaykeqa Galaad kinraypi cabrakuna phinkiririspa urayk'amushankuman jina.

² Kiruykeqa chaypachallaraj millman ruthurasqa oveja jina kanku, yakuwan mayllasqamanta llojsimoj oveja jina. Sapa ujpis yananwan kaspa, mana ch'usaj kanchu.

³ Simisituykeqa puka q'aytitu jina. Parlakusqaykipis misk'i, sonqo suwaj. Uyitaykeqa granada phatasqa jina, suk'umpayki urapi pakasqa.

⁴ Kunkitaykeqa Davidpa torren jina, sumaj k'achitu rumimanta ruwasqa. Chay torrepitaj waranqa escudokuna warkhusqa kashanku, wapu soldadokunaj escudonku.

⁵ Iskaynin ñuñituykeqa iskay taruka uñaman rijch'akunku, awachupis kankuman jina, lirio t'ikakuna chawpipi mikhushankuman jina.

⁶ P'unchay chayamushajtin, laqhayay chinkapushajtin, noqaqa, mirra tiyan, chay orqoman wicharisaj. Jinallataj risaj maypichus incienso tiyan, chay lomamanpis.

⁷ Qanqa k'achitapuni kanki, munasqetáy, chakiykimanta umaykikama k'achita kanki. Qanpeqa manapuni ima mana allinpis kanchu.

⁸ Libanomantapacha jamuy ari, munasqetáy, arí, Libanomantapacha jamuy. Amana orqomanta urayk'amuy ari, jinallataj Senirmanta, Hermón orqomantawan. Maypichus leonkunaj jusk'unku tiyan, onzakuna tiyakunku, chaymanta urayk'amuy.

⁹ Sonqoyta suwawanki, chunkitúy, munasqetáy. Ujta qhawarispalla, sonqoyta suwawanki. Sonqoyqa qanpata, kunkaykipi walqawan wataykuwasqaykiwan.

¹⁰ Ima munayta munarikuwanki chunkitúy, munasqetáy. Munarikuwasqaykeqa vinomantapis astawan misk'i. Q'aparishaj jawinawan jawikusqaykeqa astawan sumaj tukuy q'apaj jawinamanta nisqaqa.

¹¹ Ay, munasqetáy, simiykimanta abeja misk'i surumun. Qalluykipeqa abeja misk'iwan, lechewan ima tiyan. P'achaykeqa Libanopi sach'a jina k'achituta q'aparishan.

¹² Qanqa, chunkitúy, munasqetáy, perqawan muyurisqa huerta jina kanki. Kanchachasqa yaku jina kanki, yaku juturi jina sumaj wisq'asqa.

¹³ Granada sach'ayoj huerta jina kanki, sumaj misk'i poqoyniyoj. Chaypeqa nardo t'ika tiyan,

¹⁴ nardo t'ika, azafrán t'ika, sumajta q'aparishaj caña, canelapiwan, tukuy imaymana incienso sach'a ima. Kallantaj mirra, áloe sach'a, tukuy sumajta q'aparishaj jawinakunapiwan.

¹⁵ Qanqa huertapi yaku juturi jina kanki, ashkha purishaj yaku jina, Líbano orqomanta phajchamoj yaku jina.

¹⁶ Wichaynejmanta wayra, sayarikuy. Uranejmanta wayra, jamuy kayman. Huertaypi wayraripuway, tukuy t'ikakunaj q'apayninta junt'aykuchipuway. Huertaykiman jamuy ari, munasqáy. Sumaj misk'i poqoykunata mikhurispa, misk'irichikuy.