TAKIYKUNA 2 - DIOSPA QHELQACHISQAN DEUTEROCANONICAL

Munasqa warmej takisqan

¹ Noqaqa Sarón vallemanta t'ika kani, pampamanta lirio t'ika.

Munakoj qharej takisqan

² Munasqetayqa sipaskunaj chawpinkupi, imaynachus lirio t'ika khishkaj chawpinpi kashan, ajina.

Munasqa warmej takisqan

³ Munasqayqa waynakunaj chawpinkupi, manzana sach'a jina sach'akunaj chawpinkupi kashan. Chay sach'aj llanthunpi noqaqa ima munayta tiyarikuni. Poqoynintataj manchay misk'ita mikhurikuni.

⁴ Jatun mikhuyta mikhunku, chay wasiman pusawarqa, chaypitaj mayta munanakorqayku.

⁵ Uva k'isamanta t'antata, manzanatapis mikhuchiwaspa, kallpachawaychej, imaraykuchus munakunawanmanta wañushaniña.

⁶ Lloq'e makinta kunkay uraman churachun, paña makinwantaj ojllaykuriwachun.

Munakoj qharej takisqan

⁷ Jerusalenmanta sipaskuna, tiluwaychej, campopi tarukarayku, uña tarukarayku ima. Munasqetayta ama rijch'arichipuwaychejchu. Puñukojta saqepullawaychej, payllamanta rijch'arinankama.

Munasqa warmej takisqan

⁸ Munasqayqa jamushanña, parlasqanta uyarishaniña. Payqa orqo patata, loma patatataj phinkirispa, jamushan.

⁹ Munasqayqa taruka jina, uña tarukita jina. Kaypi, perqa wasapiña kashan. Ventanamanta qhawamushan, perqa jusk'unmantataj wateqarimushan.

¹⁰ Munasqayqa kay jinata niwarqa: Sayariy, munasqetáy, chunkitúy, k'acha warmisita, jakullaña.

¹¹ Qhawariy, chiri mit'a ripunña, parapis tukukunña.

¹² Campopi t'ikapis t'ikashanña, takirikuna p'unchaypis chayamunña. Llajtanchejpipis urpej waqasqan uyarikunña.

¹³ Higo sach'api poqoynin kanña, uva sach'aj t'ikasqanpis ima munayta q'aparishanña. Sayariy, munasqetáy, chunkitúy, k'acha warmisita, jakullaña.

¹⁴ Urpilitáy, qaqa jusk'upi manchachikuna chhankapi pakakusqaykimanta uyaykita rikurichikuway ari. Parlarisqaykita uyarichiway á. Parlasqaykeqa sonqoyta t'ikarichiwan, uyaykitaj may k'achitumin.

Iskayninkoj takisqanku

¹⁵ Ch'ila atojkunata jap'iyta yanapawayku. Chaykuna uva huertaykuta mast'aykushanku, imaraykuchus uva sach'aykoqa t'ikapiña kashan.

Munasqa warmej takisqan

¹⁶ Munasqayqa noqajta, noqapis paypata kani. Payqa lirio t'ika chawpillapi ovejankunata michin.

¹⁷ P'unchay manaraj chayamushajtin, laqhayaypis chinkapushajtin, kutimpuway ari, munasqáy. Taruka jina usqhayta jamuy, Beter orqopi uña taruka jina.