Sofonías 3 - DIOSPA QHELQACHISQAN DEUTEROCANONICAL

Jerusalén llajta jasut'isqa kanqa

¹ Ay, Jerusalenpi tiyakojkuna, mana kasukuyta munajkuna, juchawan junt'a kajkuna, runa masiykichejta ñak'arichejkuna.

² Tata Diospa parlasqanta mana uyariyta munarqankuchu, nitaj k'amisqantapis jap'ikorqankuchu. Tata Diospi mana atinikorqankuchu, nitaj payman chimpaykorqankuchu.

³ Kamachejninkukunaqa león jina qhaparirinku. Juezninkukunapis phiña k'ita alqo jina kanku, mayqenchus q'ayantinpaj ni uj tullullatapis puchuchinkuchu, ajina.

⁴ Diosmanta sut'inchajninkukunaqa jaramalla kanku, mana atinikunapaj jina. Sacerdotenkunapis Diospaj t'aqasqa imakunata pisipaj qhawanku, Tata Diospa kamachisqantataj p'akinku.

⁵ Chay tukuywanpis Tata Dios chay llajtawan kashan, paytaj cheqan kajtapuni ruwan manataj sajra kajtaqa. Sapa paqarin pay justiciata ruwan. Chay millay runakunarí mana p'enqakuyta yachankuchu.

⁶ Tata Dios nin: Suyukunata phiriykuni. Jark'achasqa torrenkukuna pampachasqa kanku, callenkukunatataj ch'inpachata saqerparini. Chaypi mana uj runapis purinchu. Saqerasqa ch'usaj llajtankupi mana uj runallapis tiyakoj kanchu.

⁷ Jinapi noqa yuyarqani: Jerusalén llajtapi tiyakojkuna manchachikuwanqanku, k'amisqaytapis jap'ikonqanku. Jinamantataj mana paykunata jasut'isajchu, nitaj tiyakunanku wasikunata thuñirparichisajchu, nispa. Paykunatajrí usqhayllata tukuy imaymana millay ruwanaman qokorqanku.

⁸ Chayrayku, qankuna suyariwaychej, maypachachus noqa sayarisaj contraykichejpi parlanaypaj, chay p'unchaykama. Noqa Tata Dios kayta nini: Yuyaychakuni, suyukunata, kamachejkunatawan tantamuyta, phiñakuyniyta patankuman jich'aykunaypaj, may k'ajashaj phiñakuyniyta paykunaman rejsichinaypaj. Chay k'araj phiñakuyniyraykutaj tukuy kay pacha t'usti ruwasqa kanqa.

⁹ Chay p'unchay chayamojtin, noqa tukuy runakunaj parlayninkuta mosojyachisaj, tukuyninku sutiyta oqharispa yupaychanawankupaj, uj sonqolla munayniyta ruwanankupaj ima.

¹⁰ Yupaychawajkunaqa kunan Etiopía mayukunaj chimpanpi ch'eqerasqa kashanku, paykunataj ofrendata apamuwanqanku.

¹¹ Munasqa ayllúy, chay p'unchaypi manaña p'enqakunkichejchu contraypi oqharikuspa millayta ruwasqaykichejmanta. Chaypacha noqaqa jatunchakojkunata, umata oqharejkunata ima qankuna chawpimanta wijch'usaj. Manataj jayk'ajpis ujtawan noqapaj t'aqasqa orqoypi wapuykachanqankuchu.

¹² Manachayqa noqa qankuna ukhupi llamp'u sonqoyoj runakunata, pisi kapuyniyoj runakunatapis kawsashajta saqesaj, pikunachus sutiypi atinikunku, chaykunallata.

¹³ Chaypacha Israel ayllumanta puchojkuna manaña mana cheqan kajta ruwanqankuchu, nitaj llullata parlanqankuchu, nillataj ch'awkiyaspa parlanqankuchu. Aswanpis paykuna mikhurikonqanku, samarikonqankutaj ni imamanta manchachikuspa.

Jerusalenpaj kusikuywan takina

¹⁴ Sión llajtayojkuna, takirikuychej. Israel ayllumanta kajkuna, kusiymanta qhapariychej. Jerusalenpi tiyakojkuna, kusikuychej, tukuy sonqoykichejwantaj kusirikuychej.

¹⁵ Tata Diosqa juchachasqa kasqaykichejta oqharipun. Pikunachus awqaykichej karqanku, chaykunatapis karunchan. Israelpa Kuraj Kamachejnin Tata Diosqa qankunawan khuska kashan. Mana ni imamanta manchachikunaykichej kanqañachu.

¹⁶ Jaqay p'unchaypi Jerusalenta nenqanku: Sión, ama manchachikuychu, makiykitaj ama llawch'iyachunchu.

¹⁷ Tata Diosniykeqa qanwan kashan. Payqa may atiyniyojmin, qhespichisonqataj. Tata Diosqa qanwan kusisqapuni kanqa. Munakuyninwan mosoj kawsayta qosonqa, qanmanta kusikuspataj, raymipi jina takirikonqa, nispa.

¹⁸ Tata Dios nin: Raymi p'unchaykunapi jina, noqa kacharichisqayki, ima llakiychus jamunayashasunki, chaymanta, ima p'enqaypis qanpaj kanman, chaymantapis.

¹⁹ Chay p'unchaypi noqa oqharikusaj, pikunachus ñak'arichisunku, chaykunaj contrankupi. Imaynatachus michejqa chakin p'akisqa ovejata yanapan, chinkasqa kajtataj pusakampun, ajinata yanapasqayki. Noqa pisipaj qhawasqa kasqaykichejta jatunchasqa kanaman, chantá may uyarisqa kanaman tijrasaj.

²⁰ Chay p'unchaypi qankunata pusamuspa, tantaykusqaykichej. Waj suyuman apasqa kasqaykichejmantataj kutichikampusqaykichej. Jinallataj ruwasaj qankuna tukuy runakuna ukhupi jatunpaj qhawasqa kanaykichejta, jinallataj allin ñawiwan qhawasqa kanaykichejta ima, nispa. Noqa Tata Diosmin chayta nini.