Oseas 3 - DIOSPA QHELQACHISQAN DEUTEROCANONICAL

Oseas khuchichakoj warminwan

¹ Tata Dios ujtawan nillawarqataj: Rispa, watej munakamuy waj qharej munakusqan khuchi warmiykita. Ajinatamin noqa Tata Dios israelitakunata munakuni, waj dioskunaj qhepankuta ripushajtinkupis, waj dioskunaman jaywasqanku mikhunata mikhushajtinkupis, nispa.

² Chantá chay warmita rantikaporqani chunka phishqayoj qolqewan, 330 kilo cebadawan ima.

³ Paytataj nerqani: Unaypaj noqaypata kanki. Chantá chaykama ama khuchichakuyñachu, nitaj pi qhariwanpis puñuykuyñachu. Noqapis qanwan manallataj puñusajchu, nispa.

⁴ Chayqa yachayta qon israelitakuna unayta mana kuraj kamachejniyoj, nitaj kurajkunayoj kanankuta. Mana uywa ñak'asqa q'olachina kanqachu, nitaj yupaychanapaj rumikunapis, nitaj sacerdotej p'achankunapis, nillataj lantikunapis.

⁵ Chaymanta qhepamanrí israelitakuna kutimuspa, Tata Diosninkuta mask'anqanku, jinallataj kuraj kamachej Davidpa kamachiyninpi kawsanqanku. Qhepa p'unchaykunapitaj tukuy sonqo Tata Diosta may jatunpaj qhawaspa, t'ukurenqanku pay may k'acha kasqanrayku.