Números 31 - DIOSPA QHELQACHISQAN DEUTEROCANONICAL

Israelitakuna madianitakunata atipanku

¹ Tata Dios Moisesta nillarqataj:

² Israelitakunaj sutinpi madianitakunamanta vengakamuy, chaymantataj wañupunki, nispa.

³ Chantá Moisesqa israelitakunata nerqa: Madianitakunawan maqanakoj rinaykichejpaj wakinkuna oqharikuychej. Tata Diospa sutinpi paykunamanta vengakamusunchej.

⁴ Sapa jatun ayllumanta waranqa soldadokuna maqanakoj richunku, nispa.

⁵ Ajinaqa israelitakuna sapa jatun ayllumanta waranqa soldadokunata maqanakoj rinankupaj ajllarqanku. Tukuyninpi 12.000 soldadokuna karqanku.

⁶ Moisesqa paykunata maqanakoj kacharqa, paykunawan khuskataj sacerdote Eleazarpa churin Finés rerqa. Payqa Diospaj t'aqasqa imakunata, chantá maqanakuyta qallarinankupaj waqachinapaj trompetakunatawan aparqa.

⁷ Jinataj israelitakunaqa Tata Dios Moisesman kamachisqanman jina, madianitakunata atipaykuspa, tukuyninta wañucherqanku.

⁸ Paykunatawan khuska Madianmanta kay phishqa kuraj kamachejkunata wañuchillarqankutaj: Evita, Requenta, Surta, Jurta, Rebata ima. Beorpa churin Balaamtapis espadawan wañuchillarqankutaj.

⁹ Chaypacha israelitakunaqa madianitakunaj warminkukunata, chantá wawankukunatawan ima jap'ispa, apakaporqanku. Jinallataj tukuy uywankukunata, tukuy imaymana valorniyoj imakunatawan ima qhechullarqankutaj.

¹⁰ Jinallataj tukuy llajtankukunata, chantá toldonkukunatapis ruphaykuchillarqankutaj.

¹¹ Chantá tukuy ima qhechusqankuta tantaykuspa, runakunata, uywakunata ima,

¹² Moisesman, sacerdote Eleazarman, israelitakunaman ima aparqanku. Paykuna jarasqa kasharqanku Moab pampapi, Jordán mayu kantupi, Jericó llajtaj chimpanpi.

¹³ Chantá Moiseswan, sacerdote Eleazarwan, israelitakunamanta tukuy kurajkunawan ima jarankumanta llojserqanku maqanakumanta kutimojkunata taripaj.

¹⁴ Moisestajrí soldadokunata kamachejkunapaj, waranqata kamachejkunapaj, pachajta kamachejkunapaj ima phiñakorqa.

¹⁵ Chantá Moisés paykunata nerqa: Imaraykutaj kay warmikunata mana wañucherqankichejchuri?

¹⁶ Kay warmikuna Balaam yuyaychasqanrayku israelitakunata Tata Diospa contranpi juchallicherqanku, Baal Pegor lantinta yupaychanaman pusaspa. Chayrayku Tata Dios israelitakunata millay onqoywan ñak'aricherqa.

¹⁷ Jinaqa kunanpacha Madianmanta tukuy qhari wawakunata, jinallataj qharita rejsej tukuy warmita wañuchiychej.

¹⁸ Qharita mana rejsej sipaskunatarí ama wañuchiychejchu, chaykunaqa qankunapaj kachunku.

¹⁹ Pikunachus qankunamanta runata wañucherqankichej, chayrí wañusqata llankharqankichej, chaykunaqa jaramanta jawapi qanchis p'unchayta qhepakunkichej. Kinsa kaj p'unchaypi, qanchis kaj p'unchaypiwan qankuna, chantá jap'ispa apamusqaykichej runakuna ima llimphuchakunaykichej tiyan Diospa ñawpaqenpi llimphu kanaykichejpaj.

²⁰ Jinallataj tukuy p'achata, qaramanta ruwasqa kajta, jinataj cabra millmamanta awasqata, chantá maderamanta ruwasqa kajtapis llimphuchanaykichej tiyan, nispa.

²¹ Chantá sacerdote Eleazar maqanakuman rej tukuy soldadota nerqa: Tata Dios Moisesnejta kamachisqanpi ajinata nin:

²² Qorimanta, qolqemanta, broncemanta, fierromanta, estañomanta, chayrí titimanta tukuy ima ruwasqa,

²³ chantá imatachus nina mana q'olanchu chaykunata, ninapi q'asparankichej. Chantá llimphuchana yakuwan mayllaspa, llimphuchankichej. Tukuy imatachus nina q'olan chaykunatarí, yakullawan mayllaspa llimphuchankichej.

²⁴ Qanchis kaj p'unchaypitaj p'achaykichejta t'ajsakunkichej. Ajinamanta llimphupaj qhawasqa kankichej. Chaymantaraj jaramanqa yaykuyta atinkichej, nispa.

Maqanakupi qhechusqankuta rak'inakunku

²⁵ Chantá Tata Dios Moisesta nillarqataj:

²⁶ Qanwan, sacerdote Eleazarwan, chantá israelitakunaj kurajninkukunawan ima madianitakunamanta imatachus qhechusqankuta yupaychej, runakunata, chantá uywakunata ima.

²⁷ Chantá iskayman uj rejta t'aqaspa, khuskanta maqanakoj rejkunaman qoychej, khuskantataj mana rerqankuchu, chaykunaman.

²⁸ Chay jawa wakinta noqapaj t'aqapuwanki: Soldadokunaman chayajmanta, jinallataj runakunamanta, wakakunamanta, burrokunamanta, ovejakunamanta ima sapa phishqa pachajmanta ujta t'aqapuwanki.

²⁹ Soldadokunaman chayajmanta noqaman jaywasqa kajta sacerdote Eleazarman qonki.

³⁰ Israelitakunaman chayajmantataj kikillantataj sapa phishqa chunkamanta ujta t'aqankichej: Runakunamanta, wakakunamanta, burrokunamanta, ovejakunamanta, ima uywachá tiyan, chaykunamanta. Chaytataj Tata Dioswan Tinkukuna Toldopi imachus ruwanata ruwashanku, chay levitakunaman qonki, nispa.

³¹ Chantá Moiseswan, Eleazarwan ima Tata Dios kamachisqanman jina, kikinta ruwarqanku.

³² Israelita soldadokuna madianitakunamanta qhechusqankoqa kaykuna karqa: 675.000 ovejakuna.

³³ 72.000 wakakuna,

³⁴ 71.000 burrokuna ima karqa.

³⁵ Jinallataj 32.000 qharej mana chayasqan sipaskuna ima karqanku.

³⁶ Chaymanta soldadokunaman chayaj karqa: 337.500 ovejakuna.

³⁷ Chaymanta Tata Diospaj t'aqasqankutaj 675 ovejakuna karqanku.

³⁸ 36.000 wakakunamantataj qanchis chunka iskayniyoj wakakunata Tata Diospaj t'aqarqanku.

³⁹ 30.500 burrokunamantataj sojta chunka ujniyoj burrokunata Tata Diospaj t'aqarqanku.

⁴⁰ 16.000 sipaskunamantataj kinsa chunka iskayniyojta Tata Diospaj t'aqarqanku.

⁴¹ Tata Diosman jaywanapaj t'aqasqa kajmanta Moisesqa sacerdote Eleazarman qorqa, Tata Dios kamachisqanman jina.

⁴² Chaymantataj Moisesqa soldadokuna qhechuspa apamusqankumanta khuskanninta israelitakunapaj t'aqarqa.

⁴³ Chaytaj soldadokunajta jinallataj karqa: 337.500 ovejakuna,

⁴⁴ 36.000 wakakuna,

⁴⁵ 30.500 burrokuna

⁴⁶ 16.000 sipaskuna ima.

⁴⁷ Chaykunamanta Moisesqa sipaskunamanta, jinallataj uywakunamantapis sapa phishqa chunkamanta ujta t'aqarqa. Chaykunatataj Tata Dioswan Tinkukuna Toldopi ruwaj levitakunaman qorqa, Tata Dios payman kamachisqanman jina.

⁴⁸ Chaymantataj waranqa soldadokunata kamachejkuna, jinallataj pachajta kamachejkuna ima Moisesman rerqanku.

⁴⁹ Nerqankutaj: Noqaykoqa soldadonchejkunata sumajta yupayku, manataj ujpis wañusqachu.

⁵⁰ Chayrayku qorimanta imatachus tarisqaykuta apamushayku: Makiman añukunata, makiman churakunata, anillokunata, jaluchukunata, walqakunata ima. Chaytaqa Tata Diosman qoyku juchayku pampachasqa kananpaj, nispa.

⁵¹ Chantá Moiseswan, Eleazarwan ima qorimanta ruwasqa tukuy ima apamusqankuta jap'erqanku.

⁵² Waranqa soldadota kamachejkuna, jinataj pachajtakama kamachejkuna Tata Diosman jaywanankupaj apamusqanku qoreqa tukuyninpi 184 kuraj kilo pesarqa.

⁵³ Israelita soldadokuna imatachus madianitakunamanta qhechusqankurí paykunallapaj karqa.

⁵⁴ Ajinata Moiseswan, chantá sacerdote Eleazarwan ima waranqatakama, pachajtakama kamachejkuna apamusqanku qorita jap'erqanku. Chantá Dioswan Tinkukuna Toldoman chay qorita apaykorqanku, Tata Dios israelitakunamanta yuyarikunanpaj.