Números 1 - DIOSPA QHELQACHISQAN DEUTEROCANONICAL

Israelitakunata Sinaipi yupanku

¹ Israelitakuna Egiptomanta llojsimusqanku uj wata kurajña kashajtin, iskay kaj killa qallariyta Sinaí ch'innejpi kasharqanku. Chantá Dioswan Tinkukuna Toldopi Moisés kashajtin, Tata Dios kay jinata nerqa:

² Israelitakunata ayllunkuman jina, jinataj wasi ayllunkuman jina tukuy qharej sutinkuta listaspa yupaychej, mashkhachus kasqankuta yachanapaj.

³ Iskay chunka watayojmanta pataman israelitakunata yupankichej. Qanwan, chantá Aaronwan ima maqanakoj rinankupaj jina kajkunaj sutinkuta listankichej.

⁴ Yupanaykichejpajqa sapa ayllumanta uj kuraka yanapasonqachej. Chay kurakaqa uj wasi aylluta kamachej kanan tiyan.

⁵ Yanapajkunaj sutinkoqa kaykuna kanku: Rubén jatun ayllumanta Sedeurpa churin Elisur.

⁶ Simeón jatun ayllumantataj Surisadaypa churin Selumiel karqa.

⁷ Judá jatun ayllumantaqa Aminadabpa churin Nasón karqa.

⁸ Isacar jatun ayllumantataj Suarpa churin Natanael karqa.

⁹ Zabulón jatun ayllumantarí Helonpa churin Eliab karqa.

¹⁰ Joséj churinkunaj jatun ayllunkumantarí kaykuna karqanku: Efraín jatun ayllumanta Amiudpa churin Elisama, Manasés jatun ayllumantataj Pedasurpa churin Gamaliel.

¹¹ Benjamín jatun ayllumantaqa Gedeonij churin Abidán karqa.

¹² Dan jatun ayllumantataj Amisadaypa churin Ajiezer karqa.

¹³ Aser jatun ayllumantaqa Ocranpa churin Pagiel karqa.

¹⁴ Gad jatun ayllumantarí Deuelpa churin Eliasaf karqa.

¹⁵ Neftalí jatun ayllumantataj Enanpa churin Ajirá karqa.

¹⁶ Chaykuna israelitakuna ukhumanta ajllasqa karqanku. Paykunaqa ñawpa tatankoj ayllunpi kurajkuna karqanku, jinallataj Israelpa jatun ayllunkunata kamachejkuna.

¹⁷ Chaymanta Moiseswan, Aaronwan ima, pikunachus jatun ayllunkumanta ajllasqa karqanku, chaykunawan tantakorqanku.

¹⁸ Chantá iskay kaj killa qallariyta tukuy israelitakunata wajyacherqanku. Chaypitaj wasi aylluman jina, chantá jatun aylluman jina, iskay chunka watayojmanta pataman sapa ujpa sutinkuta listarqanku.

¹⁹ Ajinata Moisesqa Tata Dios kamachisqanman jina Sinaí ch'innejpi israelitakunata yuparqa.

²⁰ Chantá Rubenpa jatun aylluman jina, wasi aylluman jina, tatankoj sutinkuman jinataj yupasqaña kasqankumanta, iskay chunka watayojmanta pataman tukuy qharej sutinkuta listarqanku. Yupasqa kasqankuman jinaqa ajina karqa:

²¹ Israelpa kuraj kaj churin Rubén jatun ayllumanta kajkuna, pikunachus maqanakoj rinankupaj jina qharikunamanta, 46.500 qharikuna karqanku.

^22-23 Simeón jatun ayllumanta yupasqa kajkunaqa 59.300 qharikuna karqanku.

^24-25 Gad jatun ayllumanta yupasqa kajkunataj 45.650 qharikuna karqanku.

^26-27 Judá jatun ayllumanta yupasqa kajkunatajrí 74.600 qharikuna karqanku.

^28-29 Isacar jatun ayllumanta yupasqa kajkunaqa 54.400 qharikuna karqanku.

^30-31 Zabulón jatun ayllumanta yupasqa kajkunarí 57.400 qharikuna karqanku.

^32-35 Joséj churinkunamantaqa Efraín jatun ayllumanta 40.500 qharikuna yupasqa karqanku. Manasés jatun ayllumantataj 32.200 qharikuna yupasqa karqanku.

^36-37 Benjamín jatun ayllumanta yupasqa kajkunaqa 35.400 qharikuna karqanku.

^38-39 Dan jatun ayllumanta yupasqa kajkunaqa 62.700 qharikuna karqanku.

^40-41 Aser jatun ayllumanta yupasqa kajkunataj 41.500 qharikuna karqanku.

^42-43 Neftalí jatun ayllumanta yupasqa kajkunataj 53.400 qharikuna karqanku.

⁴⁴ Ajinata Moiseswan, Aaronwan, chantá chunka iskayniyoj jatun ayllumanta yanapajkunapiwan ima israelitakunata yuparqanku.

⁴⁵ Israelitakunamanta maqanakoj rinankupaj jinaña kajkunata iskay chunka watayojmanta pataman yuparqanku.

⁴⁶ Yupasqa kajkunaqa tukuyninpi 603.550 qharikuna karqanku.

Levitakuna imatachus ruwananku

⁴⁷ Leví jatun ayllumanta kajkunaqa mana wakin ayllukunawan khuska yupasqachu karqanku,

⁴⁸ imaraykuchus Tata Diosqa Moiseswan parlaspa, nerqa:

⁴⁹ Tukuy israelitakunata yupashaspaqa, Leví jatun ayllumanta kajkunata ama yupankichu.

⁵⁰ Tukuynin levitakunata churanki Dioswan Tinkukuna Toldota, chantá chaypi tukuy ima kajta qhawanankupaj. Paykunaqa Dioswan Tinkukuna toldota, chantá chaypi tukuy ima kajtawan mayman rispapis apanqanku. Dioswan Tinkukuna Toldopi imachus ruwanatapis paykuna ruwanqanku. Jinallataj paykunaqa toldoj muyuyninpi muyurisqata jarakonqanku.

⁵¹ Dioswan Tinkukuna Toldota mayman apana kajtenqa, paykuna toldota phaskanqanku. Maymanchus chayaspataj, paykunallataj toldota sayarichenqanku. Sichus pillapis mana levita kaspalla chay toldoman qayllaykunman chayqa, wañuchisqa kanqa.

⁵² Israelitakunaqa soldadokuna jina sapa jatun ayllu t'aqa t'aqa jarakonqanku. Sapa t'aqaqa wiphalanta sayaykuchispa, jarakonqa.

⁵³ Levitakunaqa Dioswan Tinkukuna Toldoj muyuyninpi jarakonqanku, toldota qhawanankupaj, ama Tata Dios israelitakunaj contranta phiñakunanpaj, nispa.

⁵⁴ Ajinata israelitakunaqa Tata Dios imaynatachus Moisesman kamachisqanman jina kikinta ruwarqanku.