Marcos 7 - DIOSPA QHELQACHISQAN DEUTEROCANONICAL

Imachus runaj sonqonta ch'ichichan

¹ Uj p'unchay wakin fariseokuna, Diospa kamachisqanmanta wakin yachachejkunawan ima Jerusalenmanta jamorqanku Jesuswan parlaj.

² Jinapi, paykuna repararqanku Jesuspa wakin yachachisqankuna judiokunaj maki mayllana usunkuman jina, mana makinkuta mayllasqankuta, manachayqa jinalla mikhushajta rikorqanku.

³ Chaypachaqa fariseokuna, tukuy judiokunapis ñawpa tatakunaj usunkuman jina, mana makinkuta mayllakuspaqa, mana imatapis mikhojchu kanku.

⁴ Qhatumanta kutimuspapis, imatachus rantisqankuta mana ñawpajta mayllaspaqa, mana mikhojchu kanku. Ajinallatataj waj ñawpa usunkutapis ruwaj kanku. Chayrayku vasokunata, mankakunata, metal yurukunatapis mayllaj kanku. Jinallatataj phullunkutapis t'ajsaj kanku, Diospa ñawpaqenpi llimphupaj qhawasqa kanankupaj.

⁵ Chayrayku fariseokuna, Diospa kamachisqanmanta yachachejkunawan ima Jesusta taporqanku: Imaraykutaj yachachisqaykikuna ñawpa tatakunaj usunkuta mana ruwankuchuri? Paykunaqa makinkuta mana mayllakuspalla mikhushanku, nispa.

⁶ Jesustajrí paykunaman kuticherqa: Puraj uya, qankunamanta Diosmanta ñawpa sut'inchaj Isaías maychus kajta sut'inchaspa, kay jinata nerqa: Dios nin: Kay runakunaqa simillankuwan jatunchawanku, sonqonkurí noqamanta karupi kashan.

⁷ Qhasillata yupaychawanku. Paykuna runaj wakichisqallanta yachachinku noqaj kamachisqaypis kanman jina, nispa.

⁸ Jesús nillarqataj: Qankunaqa Diospa kamachisqanta qhesachaspa, runakunaj usullanta ruwankichej.

⁹ Kayta ruwaspa, Diospa kamachisqanta qhesachankichej, ñawpa tataykichejkunaj yachachisqankuta ruwanaykichejpaj:

¹⁰ Moisés kay jinata kamacherqa: Tataykita, mamaykitapis jatunpaj qhawanki, nispa. Nillarqataj: Pichus tatanta, chayrí mamanta maldicejqa wañuchisqa kachun, nispa.

¹¹ Qankunarí ninkichej: Pillapis tatanta, chayrí mamanta niyta atin: Imawanchus qankunata yanapanay karqa, chayqa Diospaj t'aqasqaña, nispa.

¹² Ajinamanta pichus chay jinata nejqa mana imallawanpis tatanta nitaj mamantapis yanapayta atinmanchu.

¹³ Ajinata Diospa nisqanta mana valechinkichejchu ñawpa tataykichejkunaj usunkuta ruwanaykichejpaj. Jinallataj qankuna chayman rijch'akojta ashkha imatawan ruwankichej, nispa.

¹⁴ Chantá Jesús ujtawan runakunata wajyaspa, nerqa: Tukuyniykichej uyariwaychej, sumajtataj entiendeychej:

¹⁵ Mana imapis jawamanta runaj wijsanman yaykojqa payta Diospa ñawpaqenpi ch'ichichanchu. Manachayqa imachus runaj sonqonmanta llojsimun, chaymá runataqa Diospa ñawpaqenpi ch'ichichan.

¹⁶ Pichus kay nisqayta jap'ikuyta munajqa allinta uyarichun, nispa.

¹⁷ Chantá Jesús runakunamanta karunchakuspa, wasi ukhuman yaykorqa, chaypitaj yachachisqankuna chay rijch'anachina ima niytachus munasqanta taporqanku.

¹⁸ Jesustaj paykunata nerqa: Qankunapis mana yuyayniyojllatajchu kankichej? Manachu yachankichej ima mikhunapis runaj wijsanman yaykojqa mana Diospa ñawpaqenpi payta ch'ichichasqanta?

¹⁹ Mikhunaqa mana runaj sonqonmanchu yaykun, manachayqa wijsallanman, chaymantataj llojsipun. Chayta nispa, Jesús tukuy mikhuna llimphupaj qhawasqa kasqanta niyta munarqa.

²⁰ Jesús nillarqataj: Imachus runaj sonqonmanta llojsimoj, chaymá runataqa Diospa ñawpaqenpi ch'ichichan.

²¹ Runaj sonqon ukhumanta kay imakuna llojsimun: Millayta yuyay, khuchichakuy, suwakuy, runata wañuchiy,

²² khuchichakuspa qhenchachakuy, qolqeta munapayay, millayta ruway, wajkunata q'otiyay, millay ruwayta munapayay, envidiakuy, cuento q'epi kay, runaykachay, mana yuyayniyoj kay ima.

²³ Chay tukuy millay ruwaykunamá runaj sonqonmanta llojsimuspa, Diospa ñawpaqenpi payta ch'ichichan, nispa.

Cananea warmeqa Jesuspi atinikun

²⁴ Chay qhepata Jesusqa Tiro cheqanejman rerqa. Paytaj chaypi kasqanta mana pipis yachananta munaspa, uj wasiman yaykorqa. Chaywanpis mana pakakuyta aterqachu.

²⁵ Jinapi uj warmi chaypi Jesús kasqanta uyarerqa. Chay warmej ususenqa supayniyoj karqa. Chayrayku chay warmi jamuspa, Jesuspa ñawpaqenpi pampakama k'umuykorqa.

²⁶ Chantá pay Jesusmanta maytapuni mañakorqa wawanmanta supayta qharqonanpaj. Chay warmi mana judío miraymantachu karqa, manachayqa griego parlayniyoj Siria jap'iypi Fenicia cheqamanta karqa.

²⁷ Chayrayku Jesús uj rijch'anachinata nerqa: Ñawpajtaqa wawakunaraj mikhunanku tiyan. Mana allinchu wawakunamanta t'antankuta qhechuspa, alqokunaman qaranaqa, nispa.

²⁸ Warmitajrí kuticherqa: Arí, Wiraqochíy, chaywanpis alqokunaqa wawakunaj t'anta t'akasqankuta mesa urapi mikhullankutaj, nispa.

²⁹ Chantá Jesús warmita nerqa: Chayta nisqaykirayku, ama llakikuspa ripullayña. Wawaykimanta supayqa llojsinña, nispa.

³⁰ Jinapi warmeqa wasinman chayaspa, wawanta puñunanpi sirishajta tarerqa, supaytaj paymanta llojsipusqaña.

Jesús joq'ara khaku runata qhaliyachin

³¹ Tiro nisqa cheqamanta llojsispa, Jesús Sidonnejta rerqa, Galilea qochamantaj chayarqa, Decápolis cheqanejpi.

³² Chaymanta runakunaqa joq'ara khaku uj runata pusamuspa, Jesusmanta mayta mañakorqanku, makinta paypa patanman churaykunanta qhaliyachinanpaj.

³³ Chantá, Jesús runa chawpimanta chay onqosqa runata wajnejman pusarqa, chaypitaj ruk'anankunata joq'araj ninrinman sat'iykorqa. Ujnin ruk'ananman thoqaykuspataj, Jesús chay runaj qalluntapis llankhaykullarqataj.

³⁴ Chayta ruwaytawan, Jesús janajta qhawarerqa, ukhuta samarispataj, nerqa: Efata, nispa. Chay niyta munan: Kicharikuychej, nispa.

³⁵ Chayta nisqantawankama chay runaj ninrin kicharikorqa, qallunpis phaskarakorqa, paytaj ch'uwata parlarerqa.

³⁶ Jinapi Jesusqa chayta rikoj runakunata kamacherqa imatachus rikusqankuta ama pimanpis willanankuta. Ajinata kamachejtinpis, paykuna astawan tukuyman willararqanku.

³⁷ Chayta uyarejkunataj maytapuni t'ukuspa, nerqanku: Kay Jesusqa tukuy imata allinta ruwan. Joq'arakunata uyarichin, opakunatapis parlarichin, nispa.