Marcos 2 - DIOSPA QHELQACHISQAN DEUTEROCANONICAL

Jesús suchu runata puririchin

¹ Chaymanta mana unaymanchu Jesús Cafarnaunman kutirerqa. Wasinman kutimusqanta yachaspataj,

² ashkha runakuna tantakamorqanku. Chayrayku ni punkullamanpis chimpaykuna jinachu karqa. Jesustaj chaypi Diosmanta yachachisharqa.

³ Jinapi tawa runakuna uj suchu runata wantupi apamorqanku.

⁴ Chay wasi punkupi runakuna ancha k'iski kajtinkutaj, mana ni imaynamanta chay onqosqata Jesusman qayllaykuchiyta aterqankuchu. Chayrayku wasej qhatanta qhataraspa, maypichus Jesús kasharqa, chaynejman suchu runata phullupi urayk'ucherqanku.

⁵ Chay tawa runakuna paypi atinikusqankuta rikuspataj, Jesusqa suchu runata nerqa: Wawáy, juchaykeqa pampachasqaña, nispa.

⁶ Chaypi tiyasharqanku Diospa kamachisqanmanta wakin yachachejkuna. Paykunataj sonqonku ukhupi kay jinata yuyarqanku:

⁷ Imaraykutaj kay runa chay jinata parlanri? Diospa contranta rimashan. Ni pi runapis juchata pampachayta atinchu, manachayqa Dioslla, nispa.

⁸ Jesustajrí sonqonpi yacharqapacha imatachus yuyashasqankuta. Chayrayku paykunata taporqa: Imaraykutaj chay jinata yuyankichejri?

⁹ Imataj aswan atikojlla kanman suchu runata ninaypaj: Juchayki pampachasqaña, nispa ninaychu? Chayrí: Sayariy, phulluykita oqharispa ripuy, nispa ninaychu?

¹⁰ Chayrayku kunan kayta nisaj yachanaykichejpaj Runaj Churenqa kay pachapi atiyniyoj kasqanta juchata pampachananpaj, nispa. Chantá Jesusqa suchu runata nerqa:

¹¹ Sayariy, phulluykita oqharispataj, wasiykiman ripuy, nispa.

¹² Tukuy qhawashajtinkutaj, suchu runaqa ujllata sayarerqa, phullunta oqharispataj, riporqa. Chayta rikuspa, tukuy runakuna manchayta t'ukorqanku, Diosta jatunchaspataj, nerqanku: Kunankama kay jinataqa mana jayk'ajpis rikorqanchejchu, nispa.

Jesús Leví sutiyoj runata wajyan

¹³ Jesús ujtawan Galilea qocha kantuman kuterqa. Jinapi maypichus Jesús kasharqa, chaynejman ashkha runakuna tantakorqanku, paytaj paykunaman yachachiyta qallarerqa.

¹⁴ Chantá Jesús chaynejta rishaspa, Alfeoj churinta rikorqa, Leví sutiyojta. Payqa Romapaj impuesto cobrananpi tiyakusharqa. Jesustajrí payta nerqa: Yachachisqay kanaykipaj noqawan jamuy, nispa. Levitaj sayarispa, Jesuswan rerqa.

¹⁵ Aswan qhepaman Jesuswan, yachachisqankunawan ima Levijpa wasinpi mikhusharqanku. Chayllapitaj impuestota cobrajkuna, juchasapapaj qhawasqa kajkuna ima paykunawan khuska mikhushallarqankutaj, imaraykuchus chay jina runakunamanta ashkha Jesusta qhaterqanku.

¹⁶ Jinapi Diospa kamachisqanmanta wakin yachachejkuna, fariseo kajkuna ima Jesusta chay juchasapakunawan, impuestota cobrajkunawan khuska mikhushajta rikuspa, Jesuspa yachachisqankunata nerqanku: Imataj kayri? Yachachejniykichejqa impuestota cobrajkunawan, juchasapakunawan ima mikhushan, ujyashantaj, nispa.

¹⁷ Jesustajrí chayta uyarispa, nerqa: Qhalilla kajkunaqa jampikamayojta mana wajyanankuchu tiyan, manachayqa onqosqa kajkunalla. Noqaqa mana cheqan runa kasqankuta yuyakojkunatachu wajyaj jamuni, manachayqa juchasapa kasqankuta reparakojkunata, nispa.

Ayunomanta tapukunku

¹⁸ Uj kuti Bautizaj Juanpa yachachisqankuna, fariseokunaj yachachisqankunapis ayunasharqanku. Waj runakunataj Jesusman rispa, taporqanku: Juanpa yachachisqankuna, fariseokunaj yachachisqankuna ima ayunanku. Yachachisqaykikunarí imaraykutaj mana ayunankuchuri? nispa.

¹⁹ Jesustaj uj rijch'anachinawan paykunaman kuticherqa: Yuyankichejchu casamientoman wajyarisqa kajkuna ayunanankuta, chaypi casarakoj kashajtin? Casarakoj paykunawan kashajtin, mana ayunankumanchu.

²⁰ Uj p'unchay chayamonqa, chaypachataj casarakoj paykunamanta qhechusqa kanqa. Chaypachamá ayunanqanku, nispa.

²¹ Jesús kay rijch'anachinata nillarqataj: Mana pipis mawk'a p'achamanqa mosoj telawan t'irinmanchu, imaraykuchus chay p'achata t'ajsajtinku, mosoj tela q'entirparinman, mawk'a p'achataj astawan jatunta llik'irparikunman.

²² Manallataj pipis mosoj vinota mawk'a qara botaman jich'anmanchu. Mosoj vinoqa poqoykuspa, chay mawk'a qarata phatachinman, jinapitaj vinoqa jich'akunman, qara botapis usunman. Chayrayku mosoj vinotaqa mosoj qara botamanpuni jich'ana, nispa.

Samarina p'unchaymanta churanaku

²³ Uj samarina p'unchaypi Jesús trigo chajraj chawpinta risharqa, yachachisqankunataj purej jina trigo umakunata t'ipiyta qallarerqanku.

²⁴ Chayta rikuspa, fariseokunaqa Jesusta nerqanku: Qhaway, imaraykutaj yachachisqaykikuna samarina p'unchaypi imatachus mana ruwanata ruwashankuri? nispa.

²⁵ Jesustajrí paykunaman kuticherqa: Manachu jayk'ajpis ñawirerqankichej David, chantá paywan kajkuna ima yarqhachikuspa imatachus ruwasqankumanta?

²⁶ Abiatar kuraj kaj sacerdote kashajtin, Davidqa Diospa wasinman yaykorqa. Chaypitaj Diospaj t'aqasqa t'antata mikhorqa, paywan kajkunamanpis mikhuchillarqataj, chay t'anta sacerdotekunallapaj kajtinpis, nispa.

²⁷ Jesús nillarqataj: Runaqa mana samarina p'unchayta junt'ananpajchu ruwasqa karqa, manachayqa samarina p'unchay ruwasqa karqa runaj allinninpaj.

²⁸ Chayta niykichej, imaraykuchus Runaj Churenqa samarina p'unchaypi imatachus ruwana, chayrí mana ruwana, chayta ninanpaj atiyniyojmin, nispa.