Josué 9 - DIOSPA QHELQACHISQAN DEUTEROCANONICAL

Gabaón llajtayojkunawan tratota ruwanku

¹ Chay tukuy kasqanmanta kay kuraj kamachejkuna uyarerqanku: Jititakunamanta, amorreokunamanta, cananeokunamanta, ferezeokunamanta, heveokunamanta, jebuseokunamanta ima. Paykunaqa tiyakusqanku Jordán mayu kantupi inti yaykuyninnejpi, chantá chay orqorara cheqanejpi, Jatun Mama Qocha kantu pampankunapi, Líbano jap'iykama.

² Jinapi chay tukuynin kuraj kamachejkuna tantaykorqanku, Josuéj contranpi, chantá israelitakunaj contrankupi maqanakunankupaj.

³ Chaywanpis Gabaón llajtapi tiyakoj heveokuna Jericó llajtata, chantá Hai llajtatawan Josué imatachus ruwasqanta yachaspa,

⁴ Josueta imaynatachus q'otiyanankuta yuyaychakorqanku. Qoqawita thanta costalkunapi churaspa, t'irisqa thanta qara botakunata ima burrokunaman chajnariykukuspa purirerqanku.

⁵ Churakullarqankutaj thanta juk'utata, t'irisqa p'achakunata ima. Jinallataj ñanpi mikhunankupaj chojru qorwariyasqa t'antata apakullarqankutaj.

⁶ Chantá Gilgalpi jaraman chayaspa, Josueta, israelitakunata ima nerqanku: Allin karumanta jamushayku, qankunawantaj uj tratota ruwayta munayku, nispa.

⁷ Israelitakunatajrí heveokunaman kuticherqanku: Ichapis qankunaqa kay qayllallamanta kankichej. Imaynatataj qankunawan uj tratota ruwaykumanri? nispa.

⁸ Heveokunatajrí Josueta nerqanku: Noqaykoqa qankunaj kamachiyniykichejpi kayta munayku, nispa. Paytaj taporqa: Pikunataj qankuna kankichejri? Maymantataj jamunkichejri? nispa.

⁹ Paykunataj kuticherqanku: Noqaykoqa manchay karumanta jamuyku, imajtinchus Tata Diosniykichej manchay uyarisqa kasqanta uyariyku, yachaykutaj Egiptopi imatachus ruwasqanta.

¹⁰ Uyarillarqaykutaj imaynatachus Jordán mayu chimpapi amorreokunajpa iskaynin kuraj kamachejninkuta ruwasqanta, Jesbonmanta kuraj kamachej Sijonta, Basanmanta kuraj kamachej Ogtawan, pikunachus Astarotpi tiyakorqanku, chaykunata.

¹¹ Chayrayku kamachejniyku, jinataj llajta masiykukuna ima niwarqayku: Oqharikuychej ñanpaj imatachus apakunaykichejta, maypichus paykuna kashanku, chayman rinaykichejpaj. Chantá paykunata ninkichej: Noqayku qankunaj kamachiykichej kasqayku, qankunawantaj uj tratota ruwayta munayku, nispa.

¹² Maypachachus qankunata mask'aj llojsimorqayku chaypacha, kay t'anta q'oñillaraj karqa, kunantaj qorwariyasqaña, chojrutaj kashan.

¹³ Kay qara botakunapis vinota junt'achishajtiyku, mosojpacha karqa, kunantaj kay jina llik'isqaña kashan. Kikillantaj p'achayku, juk'utaykupis kay jina thantaña, karu ñanta unaypi jamusqaykurayku, nispa.

¹⁴ Chantá israelitakunaqa Tata Diosta mana tapurispalla, Gabaón llajtayojkunaj apamusqanku mikhunata jap'ikuspa, mikhorqanku.

¹⁵ Chaymanta Josueqa Gabaonmanta jamojkunawan k'achata kawsakunankupaj, jinallataj paykunata mana jayk'ajpis wañuchinankupaj uj tratota ruwarqa. Chantá israelita kurajkunapis tiluspa, nerqanku parlasqankuta junt'anankuta.

¹⁶ Israelitakunataj trato ruwasqankumanta kinsa p'unchayman Gabaón llajtayojkuna paykunaj qayllallankupi tiyakusqankuta yacharqanku.

¹⁷ Jinapi israelitakunaqa Gabaón llajtayojkunata mask'aj llojserqankupacha, kinsa p'unchayninmantaj llajtankukunaman chayarqanku. Chay llajtakuna karqanku Gabaón, Cafira, Berot, Quiriat Yearín ima.

¹⁸ Chaywanpis israelitakunaqa mana paykunata wañucherqankuchu, imajtinchus kurajninkukuna Israelpata Diosnin Tata Diospa sutinpi tilusqanku. Chayrayku israelitakunaqa kamachejninkukunaj contrankuta rimarqanku.

¹⁹ Kurajninkukunataj nerqanku: Noqayku Israelpa Tata Diosninpa sutinpi tilorqayku, paykunata mana wañuchinanchejpaj. Chayrayku paykunataqa mana imanayta atisunmanchu.

²⁰ Kayta ruwasunchej: Paykunata mana wañuchisunchu, tilusqanchejta p'akisqanchejrayku, Diospa phiñakuynin ama chayamunawanchejpaj, nispa.

²¹ Chantá israelitakunaj kurajninkukunaqa kamachillarqankutaj: Ama paykunata wañuchiychejchu, manachayqa paykuna tukuy israelitakunapaj llant'a ruwajkuna, yaku astajkuna ima kanqanku, nispa. Ajinata kamachejkunaqa tilusqankuta junt'arqanku.

²² Chaymanta Josueqa Gabaón llajtayojkunata wajyaspa, nerqa: Qankuna qayllallaykupi tiyakushaspa, imaraykutaj: Karumanta jamuyku, nispa, q'otiyawaykuri?

²³ Chayrayku kunan qankunaqa wata runallapuni kanaykichejpaj maldicisqa kankichej. Llant'ata ch'ejtankichej, yakuta ima Diosniypa wasinpaj aysamunkichej, nispa.

²⁴ Paykunataj Josueman kuticherqanku: Noqayku chayta ruwarqayku qankuna wañuchinawaykuta manchachikuspa, imaraykuchus yachayku Tata Diosniykichej kamachin Moisesman kamachisqanta, kay cheqanejpi tiyakojkunata wañurachispa, qankunaman kay jallp'ata qosunaykichejta.

²⁵ Kunanqa makiykipi kashayku. Qan noqaykuwan ruway imachá allin cheqantaj rijch'asunki, chayta, nispa.

²⁶ Jinamanta Josueqa Gabaón llajtayojkunata israelitakuna wañuchinankuta mana saqerqachu.

²⁷ Chaymantapacha Josueqa paykunata churarqa, Tata Diospa altarninpaj chantá israelitakunapaj ima llant'ata ruwanankupaj, yakuta aysamunankupaj ima, maynejtachá Tata Dios ajllakunan karqa, chaypi. Kunankama ajina ruwanayoj kashanku.