Josué 7 - DIOSPA QHELQACHISQAN DEUTEROCANONICAL

Achán sutiyoj runaj juchan

¹ Judá jatun ayllumanta uj runa Achán sutiyoj karqa. Payqa Carmij churin karqa, Zabdij allchhin, chantá Zerajpa allchhinpa churintaj. Payqa Tata Diospa nisqanman jina phirisqa kanan karqa, chaykunamanta wakinta jap'ispa, pakaykorqa. Chayrayku tukuy israelitakuna Tata Diospa ñawpaqenpi juchayoj rikhurerqanku, phirisqa kanan karqa chaymanta wakinta Achán suwasqanmanta. Chaynejta Diospa phiñakuynin israelitakunaj contrankuta k'ajarerqa.

Uj runaj juchanrayku israelitakuna atipachikunku

² Josueqa Jericomantapacha Hai llajtata qhawamunankupaj runakunata kacharqa. Chay llajtaqa Betelmanta inti llojsimuyninnejpi, Bet Avén qayllapi karqa. Chantá Josué paykunata nerqa: Rispa, chay cheqata qhawamuychej, nispa. Paykunataj rispa, Hai llajtata sumajta qhawamorqanku.

³ Kutimuspataj, Josueta nerqanku: Hai llajtata jap'ejqa mana tukuychu rinanchej tiyan, 2.000, chayrí 3.000 jinalla richunku, imaraykuchus Hai llajtayojkunaqa pisilla kanku, nispa.

⁴ Jinataj israelitakunamanta 3.000 soldadokuna jinalla Hai llajtata jap'inankupaj rerqanku. Hai llajtayojkunarí llojsimuspa, israelitakunata atipaykorqanku, paykunatataj imata jina ayqecherqanku.

⁵ Chaypacha Hai llajtamanta soldadokunaqa kinsa chunka sojtayoj israelitakunata wañucherqanku. Wakintataj llajta punkumanta rumi orqhona cheqanejkama qhatiykorqanku, chantá chay uraynejpi paykunata mayta t'ustiykorqanku. Chayrayku israelitakunaqa maytapuni q'ewayarqanku, manañataj maqanakuyta munarqankuchu.

⁶ Chayta yachaytawan, Josuewan, israelitakunaj kurajninkukunawan ima sinch'i llakisqa kasqankuta rikuchispa, p'achankuta llik'ikorqanku, umankumantaj jallp'awan qhalliykukorqanku. Chantá Tata Diospa arcanpa qayllanpi pampakama k'umuykuspa, chaypi ch'isiyanankama karqanku.

⁷ Josuetaj nerqa: Ay, Tukuyta Kamachej Tata Dios. Imapajtaj kay runakunata Jordán mayuta chimpachimorqankiri? Amorreokunaman jaywaykuspa paykuna tukuchinawaykupajchu chimpachimuwarqayku? Walej kanman karqa Jordán mayu chimpallapi qhepakunayku.

⁸ Ay, Tata Dios. Imá nisajtaj kunanri? Soldadoykunaqa awqaykukunamanta ayqerikampunku.

⁹ Cananeokuna, chantá kaynejpi tukuy tiyakoj runakuna atipachikusqaykuta yachanqanku, tantaykuykuspataj, tukuyniykuta tukuchiwasqayku. Sichus ajina kanman chayqa, imataj kanqa chay jina may uyarisqa sutiykiwanri? nispa.

¹⁰ Tata Diostajrí Josueman kuticherqa: Sayariy. Imaraykutaj pampakama k'umuykusqa kashankiri?

¹¹ Israelitakunaqa trato ruwasqayta p'akispa juchallikunku. Imakunachus phirisqa kanan karqa chaykunata jap'ikapunku, yachashaspa mana allintachu ruwashasqankuta. Aswanpis imatachus suwasqankuta imankuchus tiyapusqantawan pakaykunku.

¹² Chayrayku israelitakunaqa awqankuta mana atipayta atenqankuchu. Aswanpis awqankoqa israelitakunata ayqechimullanqankupuni, imaraykuchus phirisqa kanankupaj jina kanku. Sichus qankuna, imachus phirisqa kananta nerqani, chaykunata mana usqhayta phirinkichejchu chayqa, mana noqapis qankunawanñachu kasaj.

¹³ Sayariy, israelitakunata tantachispataj, llimphuchachimuy, Diospa ñawpaqenpi llimphupaj qhawasqa kanaykichejpaj. Chantá niy, q'aya ñawpaqeyman chimpamunankupaj wakichikunankuta, imaraykuchus noqa Tata Dios, Israelpa Diosnin ajinata nini: Qankunaqa imakunatachus phirinaykichej karqa, chaykunata mana phirerqankichejchu. Manachus tukuyninta phirinkichej chayqa, manapuni awqaykichejta atipayta atinkichejchu.

¹⁴ Q'aya, jatun ayllumanta sapa ayllu chimpamunkichej. Chantá mayqen ayllutachá noqa nisaj, chay ayllumanta sapa wasi ayllu chimpamonqa. Mayqen toldotachá noqa nisaj, chay toldomanta sapa qhari chimpamonqa.

¹⁵ Pejpa makinpichá imakunachus phirisqa kanan karqa chay rikhurenqa chayqa, chay runa tukuy ayllunwan, chantá imanchá tiyapun, chaykunawan ima ruphachisqa kanqa. Payqa wañuchisqa kanqa, imajtinchus Tata Diospa trato ruwasqanta p'akispa, Israelpi mana ruwanata ruwarqa, nispa.

Achanta wañuchinku

¹⁶ Josueqa q'ayantin paqarin tutamanta jatarispa, israelitakunata ayllumanta ayllu chimpacherqa. Tata Diostaj Judá jatun aylluta ajllarqa.

¹⁷ Chantá Josué Judá aylluta qayllachejtin, Zeraj ayllun ajllasqa karqa, Zeraj ayllunmantataj Zabdij toldon ajllasqa karqa.

¹⁸ Zabdij toldonmanta ujmanta uj chimpajtinkutaj, Achán juchayoj rikhurerqa. Payqa Judá jatun ayllumanta Carmij churin karqa, Zabdij allchhin, chantá Zerajpa churinpa allchhintaj.

¹⁹ Chantá Josueqa Achanta nerqa: Wawáy, Israelpa Tata Diosninta jatunchaspa, imatachus ruwasqaykita ama pakaspa sut'inta willaway, nispa.

²⁰ Chantá Achán Josueta nerqa: Arí, cheqapuni Israelpa Tata Diosninpa contranta juchallini. Kayta ruwarqani:

²¹ Jericopi chay tukuy ima qhechusqayku ukhupi, Babiloniamanta manchay sumaj mantata rikorqani, 200 qolqeta, khuskan kilo kuraj jina qoritawan ima. Chaykunata anchatapuni moq'erisqayrayku oqharerqani. Chantá toldoy uraman p'ampaykorqani, qolqetataj aswan ukhuman churaykorqani, nispa.

²² Josuetaj chayta uyarispa, Achanpa toldonman runakunata kacharqa, paykunataj phawarishaj rispa, imakunachus pakasqa kasharqa, chaykunata tarimorqanku. Qolqetapis aswan ukhunejpi tarerqanku.

²³ Chay imakunata orqhoytawantaj, Josueman, chantá israelitakunaman ima apamorqanku, chaykunatataj Tata Diospa ñawpaqenman churarqanku.

²⁴ Chantá Josuewan, israelitakunawan ima Zeraj churin Achanta jap'ispa, Acor sutiyoj valleman pusarqanku, jinataj mantata, qorita, qolqe pakasqantawan apallarqankutaj. Jinallataj Achanpa churinkunatawan, ususinkunatawan, wakankunatawan, burronkunatawan, ovejankunatawan, toldontawan, imanchá tiyaporqa chaytawan apallarqankutaj.

²⁵ Chantá Josué Achanta nerqa: Imarayku qan kay jina llakiyman churawarqaykuri? Kunanqa Tata Dios qanpa pataykiman chay llakiyllatataj urmachimuchun, nispa. Chayta nisqantawan, tukuy israelitakuna Achanta, aylluntawan ima rumiwan ch'anqaykuspa, wañucherqanku, jinaytawantaj ruphaykucherqanku.

²⁶ Chaymantataj patanman ashkha rumita tawqaykorqanku, chaytaj kunankama kashan. Chayrayku chay cheqata Acor Valle nispa suticharqanku. Tata Diostajrí Israelpa contranpi manaña phiñasqachu karqa.