Josué 6 - DIOSPA QHELQACHISQAN DEUTEROCANONICAL

Jericó llajtata jap'inankupaj wakichikunku

¹ Chaypacha mana pipis Jericó llajtaman yaykuyta aterqachu, imaraykuchus llajtayojkunaqa israelitakunamanta jark'akunankupaj llajtaman yaykuna jatun punkuta sumajta wisq'asqanku.

² Tata Diostaj Josueta nerqa: Jericó llajtata, kuraj kamachejninta, chantá soldadonkunatawan ima, noqa makiykiman jaywayki.

³ Qan, chantá tukuy soldadoykikuna ima sapa p'unchay uj kutita Jericó llajtata muyurinkichej. Ajinata sojta p'unchayta ruwankichej.

⁴ Tata Diospa trato ruwasqan arcaj ñawpaqenta qanchis sacerdotekuna renqanku, sapa ujninku carneroj wajranmanta pututuyoj. Qanchis kaj p'unchaypitaj qanchis kutita llajtata muyurinkichej, chaykamataj sacerdotekunaqa pututunkuta waqachenqanku.

⁵ Maypachachus qankuna carnero wajramanta putututa unayta waqajta uyarinkichej chayqa, tukuy kallpawan qhapariychej, llajtaj perqankunataj ujllata thuñirparikonqanku. Chaymantataj sapa ujniykichej maypichus kashasqaykichejmanta cheqanta llajtaman phinkiykuychej, nispa.

⁶ Chantá Nunpa churin Josueqa sacerdotekunata wajyaspa, nerqa: Tata Diospa trato ruwasqan arcata apaychej, chaypa ñawpaqentataj qanchis sacerdotekuna carnero wajramanta pututuyoj richunku, nispa.

⁷ Chaymantaqa israelitakunatañataj nerqa: Rispa, Jericó llajtata muyumuychej. Maqanakunapaj wakichisqa tukuy kajkunataj Tata Diospa arcan ñawpaqenta richunku, nispa.

⁸ Josué ajinata kamachejtinkama, qanchis sacerdotekuna pututunkuta waqarichispa, Tata Diospa trato ruwasqan arcaj ñawpaqenta purirerqankupacha. Qhepankutataj waj sacerdotekuna Tata Diospa arcanta wantorqanku.

⁹ Maqanakupaj wakichisqa soldadokunarí pututuyoj sacerdotekunaj ñawpaqenkuta rerqanku, wakin soldadokunataj arcaj qhepanta rerqanku. Chaykamataj sacerdotekunaqa pututunkuta mana ch'inyayta waqacherqanku.

¹⁰ Josuetaj soldadokunata ch'inllamanta muyurinankuta kamacherqa: Maypachachus: Qhapariychej, nejtillay, sinch'ita qhaparinkichej, nispa.

Jericó llajtata jap'inku

¹¹ Josuéj kamachisqanman jina, Tata Diospa trato ruwasqan arcata Jericó llajtaj muyuyninta uj kutillata muyucherqanku. Chaymantataj jarankuman kutipuspa, chay ch'isi chaypi puñorqanku.

¹² Q'ayantin paqarintaj Josué tutamanta jatarerqa, sacerdotekunapis Tata Diospa trato ruwasqan arcata lijrariykukorqankupacha.

¹³ Tata Diospa arcanpa ñawpaqentataj qanchis sacerdotekuna mana sayaspa putututa waqachispallapuni rerqanku. Maqanakupaj sumaj wakichisqa soldadokunataj wakin ñawpajta risharqanku, wakintaj Tata Diospa trato ruwasqan arcaj qhepanta. Chaykamataj sacerdotekunaqa mana samarispa putututa waqachillarqankupuni.

¹⁴ Iskay kaj p'unchayta Jericó llajtaj muyuyninta ajinata muyurimullarqankutaj, chaymantataj jarankuman kutiporqanku. Ajinata sojta p'unchayta kikillantapuni ruwarqanku.

¹⁵ Qanchis kaj p'unchaytarí israelitakuna ñawpaj kutipi jinallatataj tutamanta jatariytawan, kikillantataj llajtaj muyuyninta muyurimorqanku. Chay p'unchayrí qanchis kutita llajtata muyurimorqanku.

¹⁶ Chantá qanchis kutita muyurisqankutawan, sacerdotekuna pututunkuta sinch'ita waqachejtinku, Josué israelitakunata nerqa: Qhapariychej, imaraykuchus Tata Dios kay llajtata makiykichejman jaywaykusunkichejña.

¹⁷ Kay llajta, jinataj chaypi imakunachá tiyan chaykunantin phirisqa kanqa, Tata Dios ajinata nisqanrayku. Sajra purikoj warmi Rajabtarí chantá pininchus wasinpi kajkunatawan ama wañuchinkichejchu, imaraykuchus payqa wateqajkunata kachamorqanchej, chaykunata wasinpi pakarqa.

¹⁸ Qankunatajrí, llajtapi imakunachus tiyan, chaykunata ama munapayaspa oqharikunkichejchu, ni llankharillankichejpischu. Chay llajtapi tukuy imaqa chinkachisqa kananpaj churasqa. Manachus kasukunkichej chayqa, maldicisqa kana pataykichejpi kanqa, jatun llakiytaj qhatiriwasunman.

¹⁹ Chaywanpis qori, qolqe, imakunachus broncemanta kaj, jinataj fierromanta kaj imakunaqa Tata Diospaj t'aqasqa kanqa. Chaykunaqa maypichus Tata Diospaj qolqe waqaychakun, chayman apamunkichej, nispa.

²⁰ Chantá sacerdotekunaqa pututunkuta waqacherqanku, soldadokunataj jatunmanta qhaparerqanku. Israelitakunapis pututu waqasqanta uyariytawan, kunkankoj atisqanta qhapariyta qallarerqanku. Chantá ujllata llajtaj perqan loqhekuspa urmaykorqa. Chaymantataj sapa soldado cheqanta llajtaman phinkiykorqapacha, ajinamantataj Jericó llajtata jap'erqanku.

²¹ Chantá qharikunata, warmikunata, waynakunata, machu runakunata ima espadawan wañuracherqanku. Wañuchillarqankutaj wakakunata, ovejakunata, burrokunata ima. Tukuy ima kajtapis phirillarqankutaj.

²² Chantá Josué, pikunachus Jericó llajtata qhawaj rerqanku, chaykunata nerqa: Sajra purikoj warmi Rajabpa wasinman rispa, payta, chantá pininchus wasinpi kashanku chaykunatawan orqhomuychej, payman tiluspa nisqaykichejman jina, nispa.

²³ Paykunataj rispa, Rajabta, tatanta, mamanta, turanta, pi ayllunchus paywan kasharqanku, chaykunata ima orqhomorqanku, pusarqankutaj israelitakunaj jarankumanta jawaman.

²⁴ Chantá israelitakunaqa Jericó llajtata, jinataj chaypi tukuy ima kajtawan ruphaykucherqanku. Kaykunallata orqhorqanku: Qolqe metalta, qorita, imakunachá broncemanta, fierromanta ima kajtawan, chaytataj Tata Diospaj qolqe waqaychanaman churarqanku.

²⁵ Josueqa Rajabta, aylluntawan ima mana wañucherqachu, imaraykuchus Josué Jericota qhawamunankupaj kachasqa, chaykunata Rajab pakaykusqa. Chaymantapacha Rajabpa miraynin kunankama israelitakuna ukhupi kashan.

²⁶ Chaypacha Josué tiluspa, nerqa: Pichus watej Jericó llajtata sayarichiyta munajqa Tata Diospa ñawpaqenpi maldicisqa kachun. Pichus watej sayarichiyta munaj cimientota churashajtin, kuraj kaj churin wañuchun. Llajtaj punkunta churashajtintaj, sullk'a kaj churin wañullachuntaj, nispa.

²⁷ Ajinata Tata Dios Josueta tukuy ima ruwasqanpi yanapasqanrayku, payqa tukuy chay cheqanejpi manchay uyarisqa karqa.