Josué 4 - DIOSPA QHELQACHISQAN DEUTEROCANONICAL

Israelitakuna mayumanta chunka iskayniyoj rumita oqharinku

¹ Chantá tukuy israelitakunaña Jordán mayuta chimpajtinku, Tata Diosqa Josueta nerqa:

² Israelitakunamanta chunka iskayniyoj qharikunata ajllay, sapa jatun ayllumanta ujta.

³ Paykunatataj kamachiy Jordán mayu chawpimanta, maynejpichá sacerdotekuna sayashanku, chaynejmanta sapa ujpis uj rumita oqharinanta. Chantá kunan ch'isi maypichá jarakunkichej, chayman apaspa, chaypi chay rumikunata churanankuta, nispa.

⁴ Chaymanta Josueqa chay chunka iskayniyoj jatun ayllumanta ajllasqan israelitakunata, wajyaspa

⁵ Josué nerqa: Yaykuychej Jordán mayu chawpikama, Tata Diosniykichejpa arcanpa ñawpaqenta. Chantá sapa ujniykichej uj rumita lijrariykukuspa, apamuychej. Tukuyninpi chunka iskayniyoj rumi kanqa, sapa jatun ayllupaj uj rumikama.

⁶ Chay rumikunaqa qankuna yuyarikunaykichejpaj señal jina kanqa. Qhepanejman wawaykichejkuna tapusojtiykichej: Kay rumikuna, ima niytataj munanri? nispa.

⁷ Chaypacha qankuna ninkichej: Maypachachus Tata Diospa trato ruwasqan arca Jordán mayuta chimparqa chaypacha, yakoqa arcaj ñawpaqenpi iskayman p'itikorqa. Kay tawqasqa rumeqa kaypi imachus kasqanta wiñaypaj yuyarikunanchejpaj kanqa, nispa.

⁸ Chantá chay chunka iskayniyoj israelitakuna Josuéj kamachisqanman jina ruwarqanku. Tata Dios kamachisqanman jina, sapa Israel jatun ayllumanta ujtakama Jordán mayumanta chunka iskayniyoj rumikunata oqharerqanku, chantá jarankukama apaspa, chaypi churarqanku.

⁹ Jinallataj Josuepis waj chunka iskayniyoj rumikunata oqharispa, Jordán mayupi tawqallarqataj, Tata Diospa arcan lijrarisqa sacerdotekuna maynejpichus sayarqanku, chaypi. Chay tawqasqa rumikunataj kunankama chaypi kashallanrajpuni.

¹⁰ Tata Diospa trato ruwasqan arcata apaj sacerdotekunaqa Jordán mayu chawpipi sayasharqanku, Tata Dios Josueman imatachus kamachisqanta israelitakuna ruwayta tukunankukama. Tukuy imata Moisés Josueman imaynatachus kamachisqanman jina ruwarqanku. Israelitakunataj usqhay usqhayllata mayuta chimparqanku.

¹¹ Tukuy chimpapiña kajtinkutaj, Tata Diospa arcanwan sayashaj sacerdotekunapis chimpallarqankutaj. Jinaspataj, israelitakunaj ñawpaqenkuman rerqanku.

¹² Jinataj paykunawan khuska maqanakunankupaj sumaj wakichisqa kajkunapis chimpallarqankutaj Rubén jatun ayllumanta, Gad jatun ayllumanta, Manasés khuskan jatun ayllumanta ima. Paykunaqa Moisespa kamachisqanman jina israelitakunaj ñawpaqenkuta risharqanku.

¹³ Tukuyninpi karqanku 40.000 qharikuna maqanakunankupaj sumaj wakichisqa. Tata Diospa ñawpaqenta Jericó pampakama rerqanku.

¹⁴ Chay p'unchay Tata Dios Josueta israelitakunaj rikunankuta jatun respetowan qhawanaman tukucherqa. Israelitakunataj Josueta wañupunankama manchay respetowan qhawarqanku, imaynatachus Moisesta jatunpaj qhawarqanku, ajinata.

¹⁵ Ñawpajta Tata Dios Josueta nisqa:

¹⁶ Trato ruwasqay arcata apaj sacerdotekunata kamachiy Jordán mayumanta llojsinankuta, nispa.

¹⁷ Josuetaj sacerdotekunata Jordán mayumanta llojsinankuta kamacherqa.

¹⁸ Chantá Tata Diospa arcanta apaj sacerdotekuna Jordán mayumanta llojsimuspa, ch'aki jallp'aman chakinkuta churaykusqankutawankama, mayumanta yakoqa ñawpajta jina wasaykuspa, maychus rinanta riporqa.

¹⁹ Israelitakunaqa wata qallariy killata chunka kaj p'unchayninpi Jordán mayumanta llojserqanku. Chantá Gilgalpi, Jericój inti llojsimuyninnejpi jarakorqanku.

²⁰ Gilgalpi Josueqa, Jordán mayumanta apamusqanku, chay chunka iskayniyoj rumikunata tawqarqa.

²¹ Chantá israelitakunata nerqa: Sichus qhepaman wawaykichejkuna tapusonqachej: Kay rumikuna, ima niytataj munanri? nispa chayqa,

²² paykunaman ajinata ninkichej: Noqayku israelitakuna kay Jordán mayuta ch'aki jallp'ata jina chimparqayku, nispa.

²³ Tata Diosniykichej kay Jordán mayupi yakuta sayacherqa, chayninta chimpanaykichejpaj, imaynatachus Puka Mama Qochatapis chayninta chimpanaykichejpaj ch'akicherqa, ajinata.

²⁴ Ajinata Tata Dios ruwarqa, kay pachapi tukuy runakuna Tata Dios may jina atiyniyoj kasqanta yachanankupaj, qankunataj Tata Diosniykichejta yupaychanaykichejpaj, nispa.