Josué 24 - DIOSPA QHELQACHISQAN DEUTEROCANONICAL

Josueqa wañupunan qayllapi israelitakunata parlapayaykun

¹ Aswan qhepaman Josueqa tukuy Israel jatun ayllukunata Sichem llajtapi tantacherqa. Wajyarqa kuraj runakunata, kamachejkunata, juezkunata, chantá qhelqerikunata ima Tata Diosta yupaychana cheqapi tantakunankupaj.

² Josuetaj tukuynin israelitakunata nerqa: Diosniykichej Tata Diosqa ajinata nisunkichej: Unay ñawpa tataykichej Téraj, chantá churinkuna Abraham, Najor ima Éufrates mayu kantupi tiyakorqanku, chaypitaj waj dioskunata yupaycharqanku.

³ Noqarí ñawpa tataykichej Abrahamta chay mayu kantumanta pusamuspa, tukuynin Canaán jap'iynejta puricherqani. Chantá payta miracherqani. Ñawpajta Isaac churinta qorqani,

⁴ Isaacmantaj iskay churikunata qorqani, Jacobta, Esautawan. Esaumanqa Seirpi orqorara cheqata qorqani. Jacobtajrí wawankunawan ima Egiptoman riporqanku.

⁵ Jacobpa miraynin Egiptopi kashajtinku, Moisesta, Aarontawan ima kacharqani. Chantá Egipto llajtayojkunata wañuchej onqoykunawan ñak'aricherqani, chaymanta qankunata orqhomunaykama.

⁶ Ñawpa tataykichejkunata Egiptomanta orqhomusqaytawan, Egipto llajtayoj soldadokuna caballokunapi, carretakunapi ima Puka Mama Qochakama paykunata qhatiykorqanku.

⁷ Ñawpa tataykichejkunataj yanapanayta mañakuwarqanku, noqataj Egiptomanta soldadokuna israelitakunata ama taripanankupaj laqhayaykucherqani. Chantá mama qocha yakuta kachaykorqani, chaytaj paykunata wañuracherqa. Qankunaqa Egiptopi imatachus ruwasqayta rikorqankichej, chay qhepatataj qankunaqa unayta ch'innejta purerqankichej.

⁸ Chantá noqaqa amorreokunaj jap'iyninkuman pusamorqaykichej, Jordán mayu inti llojsimuynejman. Amorreokunaqa qankunawan maqanakorqanku, noqataj paykunata atipaykucherqaykichej. Jinamanta qankunaqa jallp'ankuta jap'erqankichej.

⁹ Chaymantaqa Moab suyuta kuraj kamachej Siporpa churin Balacñataj qankunawan maqanakoj llojsimorqa. Paytaj qankunata maldicisunaykichejpaj Beorpa churin Balaamta wajyachimorqa.

¹⁰ Noqatajrí Balaam maldicisunaykichejta mana saqerqanichu, manachayqa pay saminchasorqachej. Ajinatamin qankunata Balacmanta kacharicherqaykichej.

¹¹ Chay qhepata qankunaqa Jordán mayuta chimpaspa, Jericokama chayarqankichej. Chay llajtayojkunaqa qankunawan maqanakorqanku, jinallataj amorreokuna, ferezeokuna, cananeokuna, jititakuna, gergeseokuna, heveokuna, jebuseokuna ima qankunawan maqanakoj llojsimullarqankutaj. Noqatajrí paykunata atipaykucherqaykichej.

¹² Amorreokunaj iskaynin kuraj kamachejninkukunata mana espadaykichejwanchu nitaj flechaykichejwanchu atipaykorqankichej, manachayqa noqa ñawpaqeykichejta wayronqokunata kachaykorqani. Chayrayku manaraj chayashajtiykichej, paykunaqa ñapis ayqerqankuña.

¹³ Noqa qankunaman mana llank'asqaykichej jallp'akunata qorqaykichej, mana qankunaj ruwasqaykichej llajtakunata ima. Kunanqa chaykunapi tiyakushankichej, mana mallkisqaykichej uvata, aceitunata imataj mikhushankichej, nispa.

¹⁴ Chantá Josué nillarqataj: Chayrayku Tata Diosta may jatun respetowan jatunpaj qhawaychej, paytataj tukuy sonqo yupaychaychej. Ñawpa tataykichejkuna imatachus Éufrates mayu chimpapi, chantá Egiptopi ima yupaycharqanku, chay dioskunata wijch'uspa, qankunaqa Tata Diosllatapuni kasuychej.

¹⁵ Sichus Tata Diosta mana kasuyta munankichejchu chayqa, kunanpacha pitachus kasunaykichejta ajllakuychej: Mayqen dioskunatachus ñawpa tataykichejkuna mayu chimpapi yupaycharqanku, chaykunata, chayrí, maypichus kunan tiyakushankichej, chay amorreokunaj diosninkukunatachus. Noqarí tukuy aylluywan Tata Diostapuni yupaychanaykuta niyku, nispa.

¹⁶ Chantá israelitakuna kuticherqanku: Noqaykoqa mana jayk'ajpis Tata Diosta saqesqaykuchu waj dioskunata yupaychanaykupajqa.

¹⁷ Egiptopi wata runa kashajtinchej, Tata Diosninchej noqanchejta, jinallataj ñawpa tatanchejkunatapis orqhomuwarqanchej. Pay rikunanchejta t'ukuna imakunata ruwarqa. Paymin ñanta jamushajtinchej, jinallataj tukuy llajtaj chawpinta pasamushajtinchej waqaychawarqanchej.

¹⁸ Tata Diosqa tukuy runata ñawpaqenchejmanta wijch'orqa, jinallataj kay suyupi tiyakoj amorreokunatapis. Chayrayku noqaykupis kunanqa Tata Diostapuni yupaychasqayku, imaraykuchus paymin Diosniykoqa, nispa.

¹⁹ Josuetajrí israelitakunata nerqa: Qankunaqa Tata Diosta kasuspa puriyta mana atinkichejchu, imaraykuchus payqa manchay llimphu Diosmin, celosotaj. Payqa mana qhawallanqachu contranpi oqharikusqaykichejta nitaj juchallisqaykichejtapis.

²⁰ Sichus qankuna waj dioskunata yupaychaspa Tata Diosmanta qonqapunkichej chayqa, payqa qankunata llakiykunawan ñak'arichisonqachej. Diosqa qankunapaj allin imakunata ruwapusorqachej chaypis, tukuchisonqachej, nispa.

²¹ Israelitakunatajrí Josueta nerqanku: Mana chayta ruwasqaykuchu. Noqaykoqa Tata Diosllatapuni kasuspa purisqayku, nispa.

²² Chantá Josué kuticherqa: Tata Diosllata kasuspa purinaykichejta ajllakusqaykichejmanta qankunallataj testigo kankichej, nispa. Israelitakunataj kuticherqanku: Arí, noqallaykutaj kayku, nispa.

²³ Josuetaj kuticherqa: Jina chayqa, jap'ishankichejraj, chay dioskunata wijch'uychej, tukuy sonqotaj Israelpa Tata Diosninman kutirikuychej, nispa.

²⁴ Israelitakunataj Josueta nerqanku: Noqaykoqa Tata Diosnillaykuta kasuspa purisqayku, imatachus niwasqaykutataj junt'asqayku, nispa.

²⁵ Chay p'unchaypacha Sichem llajtapi Josuewan israelitakunawan uj tratota ruwarqanku. Chay tratopi ima kamachisqakunatachus junt'anankuta, chantá imaynatachus kawsanankuta nerqanku.

²⁶ Imatachus parlasqankutataj Josueqa Tata Diospa qhelqanman qhelqarqa. Chaymantataj uj jatun rumita oqharispa, Dioswan Tinkukuna Toldoj qayllanpi encina sach'a uraman sayacherqa.

²⁷ Chantá israelitakunata nerqa: Tata Dios kay tukuy imata niwasqanchejmanta kay rumi testigo kanqa. Jinallataj qankunaj contraykichejpi testigo jina kallanqataj, ama Tata Diosniykichejta wasanchanaykichejpaj, nispa.

²⁸ Chaymantataj Josueqa sapa ujninkuta kachaporqa, maypichus tiyakorqanku, chayman.

Josué wañupun

²⁹ Chaymanta mana unaymanchu Tata Diospa kamachin Nunpa churin Josué, 110 watayoj kashaspa, wañuporqa.

³⁰ Chantá Gaas orqomanta wichaynejpi, Efraín jatun aylloj jap'iynin orqorara cheqapi, Timnat Seraj jallp'anpi israelitakunaqa Josuéj ayanta p'amparqanku.

³¹ Josué kawsashajtin, israelitakunaqa Diosllata kasuspa purerqanku. Chantá Josué wañupusqanmanta qhepamanpis kurajkuna kawsanankukama Tata Diosllata kasuspa purillarqankutaj. Chay kurajkunaqa israelitakunapaj Tata Dios imatachus ruwapusqanta allinta yacharqanku.

Israelitakuna Joséj tullunta p'ampanku

³² Israelitakunaqa Joséj tullunta Egiptomantapacha apamusqankuta Sichem llajtapi p'amparqanku. Chay jallp'ataqa tatan Jacob, Sichem sutiyojpa tatan Jamormanta pachaj qolqewan rantikusqa. Qhepanejmantaj chay jallp'ataqa Joséj churinkuna jap'isqanku.

Eleazar wañupun

³³ Aaronpa churin kuraj kaj sacerdote Eleazarpis wañupullarqataj, ayantataj Efraín jatun aylloj jap'iyninpi, orqorara cheqapi, churin Finespa orqonpi p'amparqanku.