Josué 23 - DIOSPA QHELQACHISQAN DEUTEROCANONICAL

Josué israelitakunata k'amin

¹ Tata Dios israelitakunata awqankukunawan maqanakunamanta samarichisqanqa unayña karqa. Josuetaj allin machituña kashaspa,

² tukuy israelitakunata wajyacherqa, kurajkunata, kamachejkunata, juezkunata, kamachinankupaj churasqa karqanku, chaykunantinta. Chantá paykunata nerqa: Noqaqa allin machituña kashani.

³ Qankunaqa Tata Diosniykichej qankunarayku kay llajtayojkunawan imatachus ruwasqanta rikorqankichej. Tata Diospuni qankunarayku maqanakorqa.

⁴ Noqaqa suerteta choqaspa tukuy jatun aylluykichejman jallp'ata qopuykichejña. Mana qhechusqaña kaj jallp'allatachu qorqaykichej. Manaraj qhechusqachu jallp'atapis qollarqaykichejtaj, Jordán mayoj inti llojsimuynejmanta Jatun Mama Qochaj inti yaykuynejkama.

⁵ Qankuna qhawashajtiykichej, Tata Diosniykichejqa chay jallp'api tiyakojkunata wijch'ullanqataj, qankunataj chay jallp'ata jap'ikapunkichej, imaynatachus Tata Diosniykichej nerqa, chayman jina.

⁶ Chayrayku kallpachakuychej ari, Moisespa qhelqasqan qhelqapi imatachus nisqanta junt'anaykichejpaj. Ama ni imata qonqaspa, junt'aychejpuni.

⁷ Ama qankuna ukhupi tiyakoj waj llajtayojkunawan chhapukunkichejchu, nitaj qonqorikuspa diosninkuta yupaychankichejchu. Amallataj diosninkuta kasunkichejchu, ni paykunamanta parlallankichejpischu, nillataj sutinkupi tilunkichejchu.

⁸ Manachayqa Tata Diosniykichejtapuni qhatikunkichej, imaynatachus kunankama ruwashankichej, ajinata.

⁹ Tata Diosqa kay jallp'ata jap'ej yaykusqaykichejman jina, jatuchaj atiyniyoj suyukunata atipachisorqachej. Kunankama mana pipis qankunaman sayaykuyta aterqachu.

¹⁰ Qankunamanta ujnillaykichej 1.000 runakunata ayqechiyta atin, imaraykuchus nisqanman jina Tata Diosmin qankunarayku maqanakushan.

¹¹ Chayrayku qankunaqa imaynatachus purisqaykichejta allinta qhawakuychej, jinataj Tata Diosniykichejta munakuychej.

¹² Sichus Diosta mana kasuspa, qankuna ukhupi tiyakushankuraj chay llajtayojkunawan chhapukunkichej chayqa, sitajchus paykunawan casarakunkichej chayqa, kayta sut'ita yachaychej:

¹³ Tata Diosniykichejqa chay llajtayojkunata ñawpaqeykichejmanta mana wijch'onqachu, manachayqa paykuna urmanaykichejpaj tojlla jina kanqanku. Paykuna wasaykichejpaj seq'ona jina kanqanku, jinataj ñawiykichejpi q'opa jina kallanqankutaj, kay chhika sumaj jallp'ata Tata Diosniykichej qosusqaykichejmanta ni uj puchuyoj chinkanaykichejkama.

¹⁴ Noqaqa wañuy patapiña kashani. Manaraj wañupushaspa, tukuy sonqo munani, tukuy kayniykichejwan ima rejsikapunaykichejta Tata Diosqa tukuy sumaj nisqanta junt'asqanta. Tukuy imata nisqanqa junt'akorqapuni.

¹⁵ Chaywanpis imaynatachus Tata Diosniykichej sumaj nisqanta junt'arqa, ajinallatataj Tata Diosqa tukuy imaymana llakiykunawan ñak'arichisonqachej, sumaj jallp'ata qosusqaykichejmanta mana uj puchuyoj tukukunaykichejkama.

¹⁶ Ajina kanqa sichus Tata Dios qankunawan trato ruwasqanta mana junt'ankichejchu chayqa. Sitajchus Tata Diosta wasanchaspa waj dioskunata yupaychankichej, chantá qonqorikunkichej ima chayqa, Tata Dios qankunapaj phiñakonqa, manaraj imapitaj kay sumaj jallp'amanta chinkachisqa kankichej, nispa.