Josué 22 - DIOSPA QHELQACHISQAN DEUTEROCANONICAL

Kinsa jatun ayllukuna jap'iyninkuman kutipunku

¹ Chay qhepata Josueqa Rubén jatun aylluta, Gad jatun aylluta, chantá Manasés khuskan jatun ayllutawan ima wajyaspa, nerqa:

² Qankunaqa Tata Diospa kamachin Moisés kamachisusqaykichejta junt'ankichejña. Jinallataj noqaj kamachisqaytapis kasullawarqankichejtaj.

³ Kunankama qankunaqa wawqeykichejkunata mana sapallankuta saqerparerqankichejchu, manachayqa Tata Diosniykichejpa kamachisqantaqa sumajta junt'arqankichej.

⁴ Tata Diospis imatachus nisqanta junt'arqa, wawqeykichejkunataj sumaj kawsaypiña kashanku. Chayrayku kunanqa jap'isqaykichej jallp'aman kutipuychej, Jordán mayu chimpapi Tata Diospa kamachin Moisés qosorqachej, chayman.

⁵ Chaywanpis kayllata mañakuykichej: Tata Diospa kamachin Moisés imatachus kamachisusqanta sumajta junt'aychej. Tata Diosniykichejta munakuychej, munasqanta ruwaspataj, puriychej. Kamachisqantapis kasuychejpuni. Jinataj tukuy sonqowan, tukuy kayniykichejwan ima munaynintapuni ruwaychej, nispa.

⁶ Chantá Josué paykunata saminchaykuytawan, kacharpayarqa, paykunataj wasinkuman riporqanku.

⁷ Moisesqa Basán nisqa chaynejpi Jordán mayoj inti llojsimuynejpi jallp'ata qosqa Manasespa khuskan jatun ayllunman. Manasespa wakin khuskan jatun ayllunmanrí, Josueqa israelita wawqenkunaj chawpinkupi Jordán mayoj inti yaykuynejpi jallp'ata qorqa. Chantá Josueqa paykunata saminchaspa, wasinkuman kachaporqa.

⁸ Paykunamantaj kay jinata nerqa: Kunanqa qankuna ashkha imayoj, ashkha uywayoj, jinataj ashkha qoriyoj, qolqe metalniyoj, bronceyoj, fierroyoj, jinallataj ashkha p'achayoj ima jallp'aykichejman kutipushankichej. Chayrayku awqaykichejmanta qhechusqaykichejtaqa wakinta jaqaypi qhepakoj wawqeykichejkunaman qorinkichej, nispa.

⁹ Ajinata Rubén jatun ayllu, Gad jatun ayllu, chantá Manasés khuskan jatun ayllu ima Canaán suyupi, Silo llajtapi, chay waj israelitakunamanta t'aqakorqanku, Galaadpi jallp'ankuman kutipunankupaj. Chay jallp'a karqa, mayqentachus Tata Dios Moisesman kamacherqa paykunaman qonanta, chay.

¹⁰ Chantá Rubén jatun ayllu, Gad jatun ayllu, chantá Manasespa khuskan jatun ayllu ima Canaán suyupi Jordán mayu kantuman chayaytawan, uj jatun altarta ruwarqanku.

¹¹ Chantá israelitakuna yacharqanku wawqenkunaqa Canaán suyupi uj altarta ruwasqankuta, Jordán mayu kantupi.

¹² Israelitakunarí yachaytawankama Silopi tantakorqanku, paykunawan maqanakoj kachaykukunankupaj.

¹³ Manaraj imapis kashajtin, Rubén jatun aylluman, Gad jatun aylluman, chantá Manasés khuskan jatun aylluman ima Eleazar sacerdotej churin Finesta kacharqanku.

¹⁴ Paywantaj israelitakunaj kurajninkukunamanta chunka rerqanku, sapa jatun ayllumanta ujkama.

¹⁵ Galaadman chayaspataj, Rubén jatun aylluman, Gad jatun aylluman, chantá Manasespa khuskan jatun aylluman ima nerqanku:

¹⁶ Noqaykoqa Tata Diospa tukuy jatun ayllunpa sutinpi kayta niyku: Imaraykutaj israelitakunaj Diosninta wasanchashankichejri? Imajtintaj Tata Diospa contranpi oqharikuspa kay altarta ruwankichejri?

¹⁷ Manachu Peor nisqa cheqapi juchallisqanchejta yuyarikunkichej? Chaypi juchallisqanchejrayku Tata Diosqa wañuchej onqoywan jasut'iwarqanchej, ashkhataj wañorqanku. Juchallisqanchejraykutaj kunankama ñak'arishanchej.

¹⁸ Manachu wanankichej? Imapajtaj kunan qankunapis Tata Diospa contranta oqharikushankichejri? Kunanqa Tata Diospa contranta juchallisqaykichejrayku, q'aya Diosqa israelitakunaj contrankuta phiñakonqa.

¹⁹ Sichus jap'isqaykichej jallp'a mana llimphuchu kasqanta qhawankichej chayqa, Tata Dios payta yupaychanapaj ajllakusqan cheqaman jampuychej ari. Noqaykoj jap'iyniykupitaj tiyakunaykichejpaj jallp'ata mask'akuychej ari. Ama Tata Diospa contranta juchallikuychejchu, nitaj noqaykoj contraykupi sayariychejchu, Tata Diosninchejpa altarnin kashajtin waj altarta ruwakuspa.

²⁰ Yuyarikullaychejtaj Zeraj churin Achán, Tata Diospaj t'aqasqa phirikunan karqa chayta oqharikuspa, juchallikusqanta. Chay juchanmanta tukuy israelitakunaj contrankuta Tata Dios phiñakorqa. Mana Achanllachu juchanrayku wañorqa, nispa.

²¹ Chantá Rubén jatun ayllu, Gad jatun ayllu, Manasés khuskan jatun ayllu imaqa israelitakunaj kurajninkukunaman kuticherqanku:

²² Tukuy dioskunaj Diosnin yachan, mana paypa contranpichu, nitaj paymanta karunchakuyta munaspachu kay altarta ruwasqaykuta. Pay yachan imaraykuchus ruwasqaykuta, kunantaj qankunapis yachallaychejtaj. Sichus Tata Diospa contranta oqharikuyta munaspa, paymanta t'aqakunaykurayku kay altarta ruwayku chayqa, kunanpacha wañurachiwayku.

²³ Sichus kay altarta ruwayku Tata Diosta wasanchaspa, paymantataj t'aqakunaykurayku chayqa, chayrí uywa wañuchisqa q'olachinata, ch'aki mikhuymanta jaywanata, chayrí allinyakuy jaywanata kaypi jaywanaykurayku chayqa, kikin Tata Dios cuentata mañawachuyku.

²⁴ Noqaykoqa kayta ruwayku, yuyaspa, mayk'ajpis wawaykichejkuna wawaykukunaman ama kay jinata ninankupaj: Qankunarí israelitakunaj Tata Diosninkuwan ima ruwanaykichej tiyanri?

²⁵ Rubén jatun aylluta, Gad jatun aylluta noqaykumanta t'aqananpaj Tata Diosqa Jordán mayuta mojonta jina churarqa. Chayrayku qankunaqa Tata Dioswan mana imatapis ruwanaykichej kanchu, nispa. Wawaykichejkunata ajinata nejta uyarispa, wawaykukunaqa Tata Diosta yupaychayta qonqapunkuman.

²⁶ Chayrayku uj altarta ruwayta yuyarqayku, mana chaypi Diosman jaywanata jaywanaykupajchu, nitaj uywa ñak'asqata q'olachinaykupajchu.

²⁷ Manachayqa, qankunapaj, noqaykupajpis, wawaykichejkunapaj chantá wawaykukunapajpis yuyarikunapaj uj señal kanqa. Ajinata noqaykoqa Tata Diosninchejta yupaychayta atisqayku, jinallataj uywa wañuchisqa q'olachinata, jucharayku jaywanata, jinallataj allinyakuy jaywanata jaywaspa paypa ñawpaqenman riyta atisqayku. Ajina kajtin, qhepanejman wawaykichejkuna mana wawaykukunata nenqankuchu: Qankunaqa Tata Dioswan mana ni ima ruwanaykichej tiyanchu, nispa.

²⁸ Yuyarqayku, sichus chaymanta noqaykuta chayrí wawaykukunatapis imatapis niwaykuman chayqa, noqayku kutichiyta atisqayku: Qhawaychej, ñawpa tataykukuna kay altarta Tata Diospaj ruwasqanku, mana uywa ñak'asqa q'olachinata, nitaj jucharayku jaywanata chaypi q'olachinankupajchu, manachayqa qankunapaj noqaykupajwan uj yuyarikuna jina kananpaj, nispa.

²⁹ Noqaykoqa mana jayk'ajpis Tata Diospa contranpi oqharikuykumanchu, nitaj qonqaykumanchu, uywa ñak'asqata q'olachinapaj, ch'aki mikhuy jaywanata jaywanapaj, chayrí jucharayku jaywanata q'olachinapaj waj altarta ruwaspaqa. Tata Diosninchejpa altarnin Dioswan Tinkukuna Toldoj ñawpaqenpi kashajtinñaqa, mana waj altarta ruwaykumanchu, nispa.

³⁰ Chantá Finés sacerdotewan, israelitakunaj kurajninkukunawan, wasi ayllukunamanta kurajkunapiwan ima, Rubén jatun ayllumanta, Gad jatun ayllumanta, chantá Manasespa khuskan jatun ayllumanta kajkunaj nisqankuta uyarispa, allillan kasqanta repararqanku.

³¹ Sacerdote Eleazarpa churin Finestaj Rubenpa, Gadpa, Manasespa churinkukunata nerqa: Kunan Tata Dios noqanchejwan kashasqanta allinta yachayku, imaraykuchus qankunaqa mana Tata Diosta wasanchayta yuyasqankichejchu. Ajinata ruwaspa. Qankunaqa Tata Dios jasut'inawanchejmanta qhespichiwarqayku, nispa.

³² Chaymanta sacerdote Eleazarpa churin Finés, paywan rejkuna ima Galaadmanta Canaanman kutiporqanku, maypichus israelitakuna kasharqanku, chayman. Chantá paykunaman imatachus kutichisqankuta willarqanku.

³³ Chay jatun ayllukuna imatachus nisqankoqa israelitakunaman allillan rijch'arqa, chantá Diosta yupaycharqanku. Chaymantapacha israelitakunaqa manaña parlarqankuchu Rubén jatun aylluta, jinataj Gad jatun aylluta maqanakuspa chinkachimuyta, nitaj jallp'ankuta ch'inman tukuchimuyta.

³⁴ Rubén jatun ayllumanta kajkuna, Gad jatun ayllumanta kajkunawan ima altarta suticharqanku “Yuyarikuna”, nispa. Nerqankutaj: Kay altarqa noqanchej ukhupi yuyarikuna jina kanqa, Tata Diosqa Diospuni kasqanmanta, nispa.