Josué 21 - DIOSPA QHELQACHISQAN DEUTEROCANONICAL

Levitakunapaj llajtakuna

¹ Chay qhepata jatun ayllumanta levitakunaj kurajninkukuna Eleazar sacerdoteman, Nunpa churin Josueman, chantá israelitakunaj kurajninkukunaman ima rerqanku.

² Canaanpi Siloman chayaspataj, nerqanku: Tata Dios Moisesnejta kamacherqa tiyakunaykupaj llajtakunata, jinallataj uywa michina cheqakunatawan qonawaykuta, nispa.

³ Chantá israelitakunaqa Tata Diospa kamachisqanman jina, paykunaj jap'iyninkupi llajtakunata, chantá uywa michinantinta ima levitakunaman qorqanku.

⁴ Ñawpajtaqa Coatpa miraynin levitakunamanraj qorqanku. Coatpa miraynenqa Aarón sacerdotej mirayninmanta karqa, paykunamantaj chunka kinsayoj llajtakunata qorqanku. Chay llajtakunaqa Judá jatun ayllupi, Simeón jatun ayllupi, Benjamín jatun ayllupi ima karqa.

⁵ Coatpa wakin ayllunmantaj suertepi chunka llajtakuna chayarqa, chay llajtakunataj Efraín jatun ayllupi, Dan jatun ayllupi, Manasés khuskan jatun ayllupi ima karqa.

⁶ Chaymantaqa Gersonpa jatun ayllunmanta levitakunamanñataj suerteta choqaspa chunka kinsayoj llajtakunata qorqanku. Chay llajtakuna Isacar jatun ayllupi, Aserpi, Neftalipi, Manasés khuskan jatun ayllupi ima karqanku. Chayqa Basán cheqanejpi kashan.

⁷ Merarij ayllunmanta levitakunapaj suerteta choqajtinku, chunka iskayniyoj llajtakuna chayarqa. Chay llajtakunataj Rubén jatun ayllupi, Gadpi chantá Zabulón jatun ayllupi ima karqa.

⁸ Ajinata israelitakunaqa levitakunaman llajtakunata qorqanku, jinallataj uywa michinatapis qollarqankutaj, Moisesnejta Tata Diospa kamachisqanman jina.

⁹ Chay qosqanku llajtakunaqa Judá jatun ayllojta, Simeón jatun ayllojta ima karqa.

¹⁰ Chay llajtakuna Coatpa mirayninmanta levitakunaman chayarqa. Paykunaqa Aaronpa ayllunmanta karqanku, imaraykuchus paykunamanraj ñawpajta suerte choqasqanku chayarqa.

¹¹ Judá orqorara cheqanejpi Arbá llajtata qorqanku. Chay llajta jatunkaray Anacpa tatanpa sutinwan sutichasqa karqa, chay llajtaj ujnin sutintaj Hebrón karqa. Chay llajtata uywa michinantinta qorqanku.

¹² Chaywanpis jallp'ata, jinataj juch'uy llajtakunata ima mana qorqankuchu, imaraykuchus chaykunata Yefunej churin Calebman qosqankuña.

¹³ Aarón sacerdotej ayllunman, mana yuyasqallamanta runata wañuchejkunaj ayqekunanku Hebrón llajtamanta jawa, kay llajtakunata qollarqankutaj: Libnata,

¹⁴ Jatirta, Estemoata,

¹⁵ Holonta, Debirta,

¹⁶ Ayinta, Yutata, chantá Bet Semesta ima. Sapa llajtata uywa michinantintakama qorqanku.

¹⁷ Benjamín jatun aylloj jap'iynin ukhupitaj kay llajtakunata qorqanku: Gabaonta, Gebata,

¹⁸ Anatotta, chantá Almonta ima. Chay llajtakunata uywa michinantinta ima qorqanku.

¹⁹ Ajinamanta Aarón sacerdotej ayllunpaj llajtakunaqa tukuyninpi chunka kinsayoj llajtakuna karqanku. Sapa llajtataj uywa michinantinkama karqa.

²⁰ Coatpa mirayninmanta levitakunamantaj Efraín jatun aylloj jap'iyninpi llajtakunata qorqanku.

²¹ Efraín jatun aylloj jap'iynin orqorara cheqanejpi Sichem llajtata uywa michinantinta qorqanku. Chay llajtaqa mana yuyasqallamanta runata wañuchejkunaj ayqekunanku llajta karqa. Chaymanta Guézer llajtata,

²² Quibsayinta, chantá Bet Joronta ima qollarqankutaj. Chay tawa llajtakunata uywa michinantinta ima qorqanku.

²³ Dan jatun aylloj jap'iyninmantataj kay llajtakunata qorqanku: Eltequeta, Gibetonta,

²⁴ Ayalonta, Tanacta chantá Gat Rimonta ima. Chay tawa llajtakunata uywa michinantinta qorqanku.

²⁵ Manasés khuskan jatun ayllupitaj kay llajtakunata qorqanku: Tanacta, chantá Gat Rimonta ima, chaykunatapis uywa michinantinta qorqanku.

²⁶ Coatpa mirayninpaj llajtakunaqa tukuyninpi chunka karqanku, sapa llajtataj uywa michinantinkama karqa.

²⁷ Gersonpa mirayninmanta levitakunamanqa iskay llajtakunata qorqanku. Chaykunataj Manasés khuskan jatun ayllu ukhupi karqa, sapa llajta uywa michinantin karqa: Golán llajta, chayqa Basán cheqapi kashan. Chantapis chay llajtaqa ayqekuna llajta karqa, jinataj Besterata ima qollarqankutaj.

²⁸ Isacar jatun ayllu ukhupitaj qorqanku Cisonta, Daberatta,

²⁹ Jarmutta, chantá Enganinta ima. Tawa llajtakuna karqanku, sapa llajta uywa michinantinkama karqa.

³⁰ Aser jatun ayllu ukhupitaj qorqanku Misalta, Abdonta,

³¹ Jelcatta, Rejobta ima. Ajinaqa tawa llajtakuna karqanku, sapa llajta uywa michinantinkama karqa.

³² Neftalí jatun aylloj jap'iyninpi kinsa llajtakunata qorqanku, sapa llajtata uywa michinantinkama karqa: Cedesta, chayqa Galilea cheqapi ayqekuna llajta kashan, jinallataj Jamot Dorta, chantá Cartanta ima qollarqankutaj.

³³ Ajinamanta Gersonpa mirayninpaj llajtakunaqa tukuyninpi chunka kinsayoj karqanku, sapa llajtataj uywa michinantinkama karqa.

³⁴ Merarij mirayninmanta levitakuna puchorqankuraj, chaykunamanqa Zabulón jatun aylloj jap'iynin ukhupi kay llajtakunata qorqanku: Jocneanta, Cartata,

³⁵ Dimnata, chantá Nalalta ima. Chay llajtakunaqa uywa michinantinkama tawa karqanku.

³⁶ Rubén jatun aylloj jap'iynin ukhupitajrí qorqanku Beserta, Yahasta,

³⁷ Cademotta, Mefagatta ima. Chay tawa llajtakuna uywa michinantinkama karqanku.

³⁸ Gad jatun aylloj jap'iynin ukhupitaj qorqanku Ramotta, chayqa kashan Galaadpi ayqekuna llajta. Chaymanta Majanayinta,

³⁹ Jesbonta, chantá Jazerta ima qollarqankutaj. Chay tawa llajtakunaqa uywa michinantinkama karqanku.

⁴⁰ Ajinata Merarij mirayninmanta levitakuna puchorqankuraj, chaykunaqa tukuyninpi chunka iskayniyoj llajtakunata jap'erqanku.

⁴¹ Israelitakunaj jap'iynin ukhupi levitakunapaj llajtakunaqa tukuyninpi tawa chunka pusajniyoj karqanku, sapa llajtataj uywa michinantinkama karqa.

⁴² Kay llajtakunaqa muyuyninpi uywa michinantinkama karqanku.

Tata Dios nisqanta junt'anpuni

⁴³ Ajinata Tata Dios tukuynin israelitakunaman jallp'ata qoporqa, imaynatachus ñawpa tatankukunaman tiluspa nisqanman jina. Paykunataj chay jallp'ata jap'ispa, chaypi tiyakorqanku.

⁴⁴ Tata Dios nisqanta junt'arqa, tukuy suyupitaj allin kawsaypi tiyakorqanku. Awqankukunapis manaña ujtawan paykunaman sayaykuyta aterqankuñachu, imaraykuchus Tata Diosqa awqankukunata atipaykuyta yanaparqa.

⁴⁵ Tata Diostaj israelitakunaman tukuy sumaj nisqanta junt'arqa. Mana ujpis mana junt'asqanqa karqachu.