Josué 20 - DIOSPA QHELQACHISQAN DEUTEROCANONICAL

Pakakunapaj llajtakuna

¹ Chantá Tata Dios Josueta nerqa:

² Israelitakunata niy ayqekuspa pakakunapaj llajtakunata ajllanankuta, imaynatachus Moisesnejta kamachisqayman jina.

³ Sichus pipis mana yuyasqallamanta runata wañuchinman chayqa, chay llajtakunamanta mayqellanmanpis pakakoj ayqekuyta atinman, wañojpa aswan qaylla ayllun vengakuyta munaspa ama payta wañuchinanpaj.

⁴ Sichus pillapis pakakunanpaj mayqen llajtallamanpis ayqekunman chayqa, llajtaj punkunman chayaspa, chay llajtapi kurajkunaman imaraykuchus ayqemusqanta willakonqa. Paykunataj chay llajtaman yaykuchenqanku, rikuchenqankutaj maypichus tiyakunanta.

⁵ Sichus wañojpa aswan qaylla ayllun ayqekoj runata chay llajtakama qhatiykunman chayqa, chay llajtamanta kurajkuna ayqekoj runata mana jaywaykonqankuchu, imaraykuchus runa masinta mana wañuchiyta munaspachu, nitaj chejnikusqanraykuchu wañucherqa.

⁶ Ayqekoj runataj chay llajtapi tiyakonqa, chay llajtayojkunaj ñawpaqenpi pay juchayojchus manachus kasqan sut'inchakunankama. Chantá chaypacha kuraj kaj sacerdote jina kashaj wañupojtin, ayqekoj runaqa, maymantachus ayqemorqa, chay llajtanpi wasinman kutipuyta atenqa, nispa.

⁷ Chantá israelitakunaqa pakakuna llajtakunata ajllarqanku: Neftalíj jap'iynin orqorara cheqapi Galileapi Cedes llajtata, Efrainpa jap'iynin orqorara cheqanejpi Sichem llajtata, Judá jatun aylloj jap'iynin orqorara cheqapitaj Quiriat Arba llajtata. Chay llajtaj ujnin sutenqa Hebrón karqa.

⁸ Jordán mayu chimpapitaj, Rubén jatun aylloj jap'iynin ukhupi Jericó llajtaj inti llojsimuynej ch'innejpi Beser llajtata ajllarqanku. Gad jatun aylloj jap'iyninpitaj Galaad cheqapi Ramotta ajllarqanku. Manasés jatun aylloj jap'iynin ukhupitaj Basán cheqanejpi Golán llajtata ajllallarqankutaj.

⁹ Israelitakuna, chantá waj llajtayojkuna ima pakakoj ayqekunankupaj ajllasqa llajtakuna chaykuna karqanku. Chay llajtakunapi pakakunanku karqa, pikunachus mana yuyasqallamanta runa masinta wañuchejkuna. Ajinamanta wañojpa ayllun vengakuspa mana payta wañuchenqachu, juchayojchus manachus juchayoj kasqan manaraj runakunaj ñawpaqenkupi sut'inchasqa kashajtin.