Josué 18 - DIOSPA QHELQACHISQAN DEUTEROCANONICAL

Wakin jatun ayllukunaj jap'isqanku jallp'a

¹ Israelitakuna jallp'ata jap'iyta tukuspaña, tukuyninku Silo llajtapi tantakorqanku, chaypi Dioswan Tinkukuna Toldota sayarichinankupaj.

² Chaywanpis israelitakunamanta qanchis jatun ayllukuna manaraj jallp'ata jap'isqankurajchu.

³ Chantá Josué israelitakunata nerqa: Imatataj suyashankichej ñawpa tataykichejkunajpa Tata Diosnin jallp'ata qosusqaykichejta mana usqhayta jap'inaykichejpajri?

⁴ Sapa jatun ayllumanta kinsa qharikunata ajllaychej, chay jallp'ata qhawamojta kachanaypaj. Chantá kutimuspa, imaynatachus jallp'ata rak'inakunankuta willawanqanku.

⁵ Jallp'ata qhawamoj rejkunaqa jallp'ata qanchisman t'aqanqanku. Uranejpi Judáj jap'iyninta saqenqanku, wichaynejpitaj Joséj mirayninpa jap'iyninta saqellanqankutaj.

⁶ Chantá chay jallp'ata qanchisman t'aqaspaña, imaynachus kasqanta willawajtinku, noqa Tata Diosta tapusaj, imaynatachus rak'inayta yachanaypaj.

⁷ Levitakunarí qankunaj chawpiykichejpi mana jallp'ayojchu kanqanku, imaraykuchus paykunaj chayaqenkoqa Tata Diospa sacerdotenkuna kana. Chantá Gad jatun aylluwan, Rubén jatun aylluwan, Manasés khuskan jatun aylluwanqa Jordán Mayoj chimpanpi, inti llojsimuynejpi ñapis jallp'ata jap'inkuña. Chay jallp'ataqa Tata Diospa kamachin Moisesña qorqa.

⁸ Chantá chay jallp'ata qhawamoj rejkunaqa llojsinankupaj wakichikorqankupacha, Josuetaj paykunata kachashaspa, nerqa: Tukuynin jallp'ata qhawaspa, mojonkunata churankichej. Chaymantataj kutimuspa, willawankichej, noqa Silopi Tata Diosta tapurispa rak'inaypaj, nispa.

⁹ Chantá chay runakunaqa tukuy chay jap'iynejta muyurimorqanku, qanchisman rak'ispataj, mojonarqanku. Chantá sapa rak'isqanku jap'iypi mashkhachus llajtakuna kasqantawan qhelqarqanku. Chaymantataj Silopi, Josué kasharqa, chayman kutimorqanku.

¹⁰ Josuetaj Silopi Tata Diosta tapuspa, sapa jatun aylluman jallp'ata suerteta choqaspa rak'irarqa.

Benjamín jatun aylloj jap'iynin

¹¹ Benjamín jatun ayllupaj suerteta choqajtinku jap'inanku jallp'aqa Judajpata, chantá Josejpatawan jap'iyninku chawpipi llojserqa.

¹² Chay jallp'aj mojonnenqa wichaynejman Jordán mayumantapacha karqa, chaymanta Jericój wichaynejninta rerqa, chaytaj orqorara cheqanejta inti yaykuynejman wicharillarqapuni. Chaymantataj Bet Avén ch'innejman rerqa.

¹³ Chaymanta mojonqa Betel llajtaj urannejta rerqa, chaymantataj Atarot Adarman urayk'orqa, Bet Joronpa ura chimpanpi orqo kashan, chaynejta.

¹⁴ Chaymanta mojonqa inti chinkaykuynejta muyurimorqa, uraynejpi Bet Jorón nisqa chimpanpi kashan, chay orqoj ñawpaqenta. Chaymantataj Quiriat Baalninta llojsimorqa, chay llajtaj ujnin sutenqa Quiriat Yearín karqa. Chay llajtaqa Judá jatun ayllojta karqa. Chantapis chayqa inti chinkaykuynejpiña karqa.

¹⁵ Uranejman mojonqa Quiriat Yearinpi qallarerqa, chantá inti yaykuynejmanta Neftoapi yaku juturinkama rerqa.

¹⁶ Chaymantataj mojonqa Ben Jinón vallej chimpanpi kaj orqoj tukukuyninnejta urayk'orqa, chayqa Refayin vallej patannejpi kashan. Chaymantataj Jinón valleman urayk'orqa, chantá Jebús wichaypa urannejman, chaymantataj Roguelpi yaku juturikama rillarqapuni.

¹⁷ Chaymantaqa wichaynejta kutirerqa, Ensemesmantaj llojserqa. Chaymantataj Gelilotman rerqa, chayqa Adumín wichaypa chimpanpi kashan. Chaymanta Rubenpa churin Boanpa qaqankama urayk'orqa.

¹⁸ Chaymantataj Jordán mayoj chimpan pata wichaynejta rerqa, chaymantataj Jordán mayukama urayk'orqa.

¹⁹ Chaymantataj mojonnenqa Bet Jogláj patannejman rerqa, chaymantataj Wañusqa Qochaj patannej q'enqopi tukukorqa, maynejpichus Jordán mayu Wañusqa Qochawan tinkun, chaypi. Uranejman mojonqa chay karqa.

²⁰ Inti llojsimuynejman mojonnenqa Jordán mayu karqa. Chaymin Benjamín jatun aylloj jap'iyninpa mojonnin karqa.

²¹ Benjamín jatun aylluman chayasqan llajtakunaqa kaykuna karqanku: Jericó, Bet Joglá, Casis valle nisqa,

²² Bet Arabá, Semarayin, Betel,

²³ Avín, Pará, Ofrá,

²⁴ Quefar Hamoní, Hofní, Geba ima. Tukuyninpi chunka iskayniyoj llajtakuna, chantá juch'uy llajtakunantin ima karqanku.

²⁵ Chantá kallarqataj: Gabaón, Ramá, Berot,

²⁶ Mispá, Cafira, Mosá,

²⁷ Requén, Irpel, Tarala,

²⁸ Selá, Elef, Jebús ima, chayqa Jerusalén llajta karqa. Chantá Gabaa, Quiriat llajta ima kallarqataj. Tukuyninpi chunka tawayoj llajtakuna, juch'uy llajtakunantin ima karqanku. Chaymin Benjamín jatun aylluman rikuchipusqan jallp'a karqa.