Josué 16 - DIOSPA QHELQACHISQAN DEUTEROCANONICAL

Joséj churinkuna jap'isqanku jallp'a

¹ Joséj churinkuna suerteta choqaspa jap'isqanku jallp'aj mojonnenqa uranejmanta, Jericó juturi chaynejmanta, Jordán mayu qayllamanta qallarerqa. Chaymantataj patanejman inti llojsimuynejman jina Jericonejta pasarqa, chaymantataj ch'innejta, orqorara cheqanejta rispa, Betelkama chayarqa.

² Betelmanta mojonqa Atarot cheqanejta pasarqa. Atarotpitaj arquitakuna tiyakorqanku.

³ Chaymantataj inti yaykuynejman, jafletitakunaj jallp'ankunanejta, uranejpi Bet Joronkama rerqa. Chaymantataj mojonqa Guezerkama, Jatun Mama Qochapi tukukunankama rerqa.

⁴ Joséj churinkuna Manaseswan, Efrainwan ima jap'isqanku jallp'aqa chay karqa.

⁵ Efraín jatun ayllu mashkhachus kasqankuman jina jap'isqankoj jallp'aj mojonnenqa kay jina karqa: Inti llojsimuynejmanta Atarot Adarmanta pata kaj Bet Joronkama karqa.

⁶ Chaymanta mojonqa Jatun Mama Qochakama rerqa. Patanejpi Micmetat karqa, chaymanta mojonqa Tanat Silokama rerqa, chaymantataj Yanojanejta pasarqa.

⁷ Chantá Yanojamanta Atarotman, Naratman ima urayk'orqa, chaymanta Jericonta pasaspa Jordán mayuman llojserqa.

⁸ Tapuajmanta mojonnenqa inti chinkaykuynejman Caná wayq'okama rillarqapuni, chaymantataj Jatun Mama Qochaman llojserqa. Efraín jatun ayllu mashkhachus kasqankuman jina jap'isqankoj jallp'aj mojonnenqa, ajina karqa.

⁹ Jinallataj Efraín jatun ayllupaj llajtakuna chantá juch'uy llajtakuna ima Manasés jatun aylloj jap'iynin ukhupi kallarqataj.

¹⁰ Chaywanpis Efraín jatun ayllumanta kajkunaqa Guezerpi tiyakoj cananeokunata mana wijch'orqankuchu. Chayrayku cananeokunaqa kunankama paykuna ukhupi tiyakushankuraj. Chaywanpis cananeokunata wata runata jina jap'erqanku.