Josué 15 - DIOSPA QHELQACHISQAN DEUTEROCANONICAL

Judá jatun aylloj jap'iynin

¹ Judá jatun ayllu mashkhachus kasqankuman jina suerteta choqaspa jap'isqanku jallp'aqa Edompa jap'iyninwan tinkuykama karqa, uraynejmantaj Zin nisqa ch'innejkama karqa.

² Uraynejman mojonqa Wañusqa Qocha kantumantapacha karqa.

³ Chaymanta mojonnenqa uraynejman Acrabín q'asanta, Zin nisqa ch'innejkama rillarqapuni, chaymanta Cadés Barneakama wicharerqa, chaymantataj Jesronman rerqa. Adarninta wicharispataj, Carcanta muyuykamorqa.

⁴ Chaymanta mojonnenqa Asmón llajtakama karqa, chaymantataj Egipto mayuman llojserqa, Jatun Mama Qochapitaj tukukorqa. Uranejman mojonqa chay karqa.

⁵ Inti llojsimuynejman mojonqa Wañusqa Qochawan, Jordán mayuwan tinkuykama karqa. Chaymanta wichaynejman mojón qallarerqa,

⁶ chaynejmanta Bet Joglanejta wicharerqa, chaymantataj wichaynejpi Bet Arabanejta pasarqa, Rubenpa churin Boán nisqa qaqamantaj chayarqa.

⁷ Chaymanta mojonqa Acor vallemantapacha Debirman wicharerqa, chaymantataj Gilgalman kutirimorqa, chaytaj Adumín q'asaj ñawpaqenpi karqa. Chaymanta mojonqa Ensemes yaku juturikama rillarqapuni, Roguel nisqa juturikama llojserqa.

⁸ Chaymanta mojonqa Ben Jinón vallenejta, Jebuspa uray kantunta rillarqapuni, chay niyta munan Jerusalennejta. Chaymanta Jinón vallej inti chinkaykuy chimpan orqo puntannejta rerqa, chantá Refayin valleman urayk'amorqa.

⁹ Chay mojonmanta orqo puntanta Neftoapi yaku juturikama muyuykamorqa, chaymantaqa Efrón orqopi llajtankunata, Baalá nisqa chayninta pasarqa, chaytaj Quiriat Yearín, nisqa kashan.

¹⁰ Baalapi chay mojonmanta inti chinkaykuynejta Seir orqokama kutirimorqa, chaymanta Yearín orqoj patannejta rillarqapuni, chaytaj Quesalón nisqa kashan. Chaymanta mojonqa Bet Semeskama urayk'orqa, chaymantataj Timnaman chayarqa.

¹¹ Jinallataj mojonqa Ecronpa wichaynin inti llojsimuyninnejta rillarqataj, chaymantataj Sicronpa wasanta muyuykamuytawan, Baalá orqonejta rerqa, chaymantaqa Jabnelman llojserqa, Jatun Mama Qochapitaj tukukorqa.

¹² Inti yaykuynejman mojonnenqa Jatun Mama Qochakama karqa. Judá jatun aylloj jap'iyninpa mojonnenqa tukuy muyuynintinpi chaykunamin karqa, mashkhachus kasqankuman jina.

Calebqa Hebronta, chantá Debir llajtatawan jap'in

¹³ Josueqa, Tata Diospa kamachisqanman jina Judá jatun aylloj jap'iynin ukhupi Yefunej churin Calebman jallp'ata qorqa. Payman Quiriat Arbá llajtata qorqa. Chay llajtaqa Anacpa churinkunaj jatun llajtanku karqa. Quiriat Arbá llajtata aswan qhepanejman Hebrón, nispa suticharqanku.

¹⁴ Chay llajtamanta Calebqa Anacpa kinsantin churinkunata wijch'orqa: Sesayta, Ajimanta chantá Talmayta ima.

¹⁵ Chaymantataj Debir llajtapi tiyakojkunawan maqanakoj rerqa. Chay llajtaj ñawpa sutin Quiriat Séfer karqa.

¹⁶ Chaypacha Calebqa nerqa: Pichá kay Quiriat Séfer llajtata maqanakuspa jap'ejman ususiy Acsata warminpaj qosaj, nispa.

¹⁷ Chantá Cenazpa churin Otoniel chay llajtata jap'erqa. Payqa Calebpa wawqenpa churin karqa. Calebtaj Otonielman Acsa sutiyoj ususinta warmin kananpaj qorqa.

¹⁸ Warminta wasinman pusakapushajtin, Otoniel Acsata nerqa tatan Calebmanta llank'ana jallp'ata qochikunanta. Acsataj rispa, burronmanta urayk'uspa, tatanman qayllaykorqa. Calebtaj payta taporqa: Imatataj munashanki, wawáy? nispa.

¹⁹ Acsataj nerqa: Ujta qonawaykita mañakuyki. Néguev ch'innejpi jallp'ata qowankiña, jinaqa yaku juturiyoj jallp'ata qollawaytaj ari, nispa. Tatan Calebtaj patanejpitaj, uranejpitaj yaku juturiyoj jallp'ata qorqa.

Judá jatun aylloj llajtankuna

²⁰ Judá jatun ayllumanta mashkhachus kasqankuman jina jallp'a jap'isqanku kaykuna karqa:

²¹ Uranejman Edompa jap'iyninwan tinkuypi jap'isqan Judáj chay llajtankuna kaykuna karqanku: Cabsel, Edar, Jagur,

²² Cina, Dimona, Adada,

²³ Cedes, Jazor, Itnán,

²⁴ Zif, Telén, Bealot,

²⁵ Jazor Jadatá, Queriot, Jesrón ima, Jesronpa ujnin sutintaj Jazor karqa,

²⁶ Amán, Semá, Molada,

²⁷ Jasar Gadá, Jesmón, Bet Pélet,

²⁸ Jasar Súal, Berseba, Bizotia,

²⁹ Baalá, Iyín, Esén,

³⁰ Eltolad, Quesil, Jormá,

³¹ Siclag, Madmana, Sansana,

³² Lebaot, Siljín, Ayin chantá Rimón ima. Tukuyninpi iskay chunka jisq'onniyoj llajtakuna, juch'uy llajtakunantin ima karqanku.

³³ Pampapi kaj llajtakunataj kaykuna karqanku: Estaol, Sorá, Asena,

³⁴ Zanoaj, Enganín, Tapuaj, Enam,

³⁵ Jarmut, Adulán, Soco, Azeca,

³⁶ Sagarayin, Aditayin, Gedera, chantá Guederotayin ima. Tukuyninpi chunka tawayoj llajtakuna, tukuy juch'uy llajtakunantin ima karqanku.

³⁷ Chantá kallarqataj kay llajtakuna: Senán, Jadasá, Migdal Gad,

³⁸ Dileán, Mispá, Yoctel,

³⁹ Laquis, Boscat, Eglón,

⁴⁰ Quebón, Lamán, Quitlís,

⁴¹ Gederot, Bet Dagón, Noamá, Maceda ima. Tukuyninpi chunka sojtayoj llajtakuna, chantá tukuy juch'uy llajtakunantin ima karqanku.

⁴² Kallarqataj: Libna, Eter, Asán,

⁴³ Yiftá, Asena, Nesib,

⁴⁴ Keila, Aczib, Maresa ima. Tukuyninpi jisq'on llajtakuna, tukuy juch'uy llajtakunantin ima karqanku.

⁴⁵ Chantá Ecrón llajta, juch'uy llajtakunantin ima kallarqataj.

⁴⁶ Kallarqataj Ecronmanta mama qocha nisqakama, Asdod qayllapi kaj jallp'antin, juch'uy llajtakunantin ima.

⁴⁷ Chantá Asdod llajta, juch'uy llajtantinkuna ima kallarqataj. Jinallataj Gazapis, juch'uy llajtakunantin ima kallarqataj, Egipto mayukama, chantá Jatun Mama Qocha nisqa kantunkama.

⁴⁸ Orqonejpipis kay llajtakuna Judaman chayallarqataj: Samir, Jatir, Soco,

⁴⁹ Daná, Quiriat Saná, ujnin sutin Debir karqa,

⁵⁰ Anab, Estemoa, Anín,

⁵¹ Gosén, Holón, Gilo ima. Tukuyninpi chunka ujniyoj llajtakuna, juch'uy llajtakunantin ima karqanku.

⁵² Chaymantaqa kallarqataj Arab, Duma, Esán,

⁵³ Yanún, Bet Tapuaj, Afeca,

⁵⁴ Jumetá, Quiriat Arbá, chayqa Hebrón karqa, Sior ima. Chaykuna jisq'on llajtakuna, juch'uy llajtakunantin ima karqanku.

⁵⁵ Kallarqataj Maón, Carmel, Zif, Yutá,

⁵⁶ Jezrel, Jocdeán, Zanoaj,

⁵⁷ Caín, Gabaa, chantá Timna ima. Chaykuna chunka llajtakuna, chantá juch'uy llajtakunantin ima karqanku.

⁵⁸ Chaymanta Jaljul, Betsur, Gedor,

⁵⁹ Marat, Bet Anot, chantá Eltecón ima kallarqataj. Sojta llajtakuna, juch'uy llajtakunantin ima karqanku.

⁶⁰ Kallarqataj Quiriat Baal, chay karqa Quiriat Yearín, chantá Rabá ima. Chaykuna iskay llajtakuna, juch'uy llajtakunantin ima karqanku.

⁶¹ Ch'in pampapi Bet Arabá, Midín, Secocá llajta ima kallarqataj,

⁶² Nibesán, Kachi llajta, chantá Engadí ima. Chaykuna sojta llajtakuna, juch'uy llajtakunantin ima karqanku.

⁶³ Chaywanpis Judá jatun ayllumanta kajkunaqa Jerusalenpi tiyakoj jebuseokunata mana wijch'uyta aterqankuchu. Chayrayku paykunaqa kunankama Judá jatun aylluwan khuska Jerusalenpi tiyakushanku.