Josué 14 - DIOSPA QHELQACHISQAN DEUTEROCANONICAL

Josué Canaán jallp'ata rak'iran

¹ Eleazar sacerdotewan, Nunpa churin Josué chantá israelitakunaj kurajninkukuna ima israelitakunaman Canaán suyoj jap'iyninta qorqanku.

² Jisq'on jatun ayllukuna chantá Manasespa khuskan jatun ayllu ima chay jallp'ata suerteta choqaspa rak'inakorqanku, Tata Dios Moisesman kamachisqanman jina.

³ Israelitakuna manaraj Jordán mayuta chimpashajtinku, Moisesqa Rubén jatun aylluman, Gad jatun aylluman, chantá Manasés khuskan jatun aylluman ima jallp'ata qosqaña. Leví jatun ayllumanrí manapuni jallp'ata qosqachu.

⁴ Joséj churinkunaj mirayninmanta iskay ayllu karqanku, Manaseswan, Efrainwan ima. Leví jatun ayllumanrí mana uj chhikan jallp'allapis chayarqachu. Paykunamanqa tiyakunankupaj Moisés llajtakunata, uywa michinantinta imalla qorqa.

⁵ Ajinata israelitakunaqa Tata Dios Moisesman kamachisqanman jina, jallp'ata rak'inakorqanku.

Calebman jallp'ata qonku

⁶ Uj kuti Judá jatun ayllumanta kajkuna Josuewan parlaj Gilgalman rerqanku. Chantá Cenazpa mirayninmanta Yefunej churin Caleb Josueta nerqa: Cadés Barneapi qanmanta, noqamantawan Tata Diosqa kamachin Moisesman imatachus nisqanta qan allinta yachanki.

⁷ Tawa chunka watayoj kashajtiy, Moisesqa Cadés Barneamanta jallp'ata qhawamojta kachawarqa. Kutimuspataj, noqaqa imatachus rikusqayta maychus kajta willarqani.

⁸ Noqawan rejkunarí mana cheqanta willaspa, israelitakunaj sonqonkuta iskayrayacherqanku. Noqarí Tata Diosniy imatachus nisqanta junt'arqani.

⁹ Chaypacha Moisés tiluspa, niwarqa: Maynejmanchá chakiykita churanki, chay jallp'a qanpaj, wawaykikunapaj ima wiñaypaj kanqa, Tata Diosniypa nisqanta junt'asqaykirayku, nispa.

¹⁰ Tata Dios ajinata Moisesman nisqanqa tawa chunka phishqayoj wataña kashan. Chayta nerqa israelitakuna ch'innejllataraj jamushajtinku, nisqanman jinataj Diosqa kunankama kawsachiwan. Qhaway, kunanqa ñapis pusaj chunka phishqayoj watayojña kashani.

¹¹ Jinapis kallpaypiraj kani, maypachachus Moisés jallp'ata qhawajta kachawarqa, chaypacha jina. Ñawpajta jina maqanakuyta atiniraj, jinallataj maymanpis riyta.

¹² Chayrayku orqorara jallp'ata qoway ari, mayqentachus Tata Dios qonawanta nerqa, chayta. Qan yachanki chaynejpi jatunkaray runa Anacpa churinkuna sumaj phatu perqawan muyuykusqa llajtakunapi tiyakusqankuta. Chaywanpis noqaqa Tata Diospa yanapawasqanwan chay runakunata wijch'usaj, Tata Diospa nisqanman jina, nispa.

¹³ Chantá Josueqa Yefunej churin Calebta samincharqa. Chantá paypata, jinataj churinkunajtawan kananpaj, Hebrón cheqanejta qoporqa.

¹⁴ Ajinamanta Hebrón cheqanejqa kunankama Yefunej churin Calebpata chantá churinkunajpata ima jap'iynin kashan, Israelpa Tata Diosninta kasusqanrayku.

¹⁵ Hebronpa ñawpaj sutenqa Quiriat Arbá karqa, imaraykuchus Arbaqa jatunkaray runa Anacpa mirayninmanta karqa. Chaymanta qhepamanqa chay cheqanejpi manaña ni ima maqanaku karqachu.