Josué 13 - DIOSPA QHELQACHISQAN DEUTEROCANONICAL

Manaraj jap'isqanku jallp'a

¹ Josué machituña kashajtin, Tata Dios payta nerqa: Qanqa ancha machuña kashanki. Chaywanpis jallp'a jap'inaqa ashkharaj kashan.

² Jap'inaraj kashan, chay jallp'aqa kaykuna kanku: Filisteokunajta chantá gesureokunajta tukuy jallp'anku,

³ Sijor wayq'omantapacha, Egiptomanta inti llojsimuyninnejpi, Ecronwan mojonkama. Chayqa cananeokunaj jallp'anku kashan. Cananeokunaj jap'iyninpi phishqa kuraj kamachejkuna kanku, paykunaqa Gazapi, Asdodpi, Ascalonpi, Gatpi, Ecronpi ima tiyakunku. Jinallataj aveokunaj jallp'anku jap'inaraj kashallantaj.

⁴ Uraynejmantaj tukuy cananeokunaj jap'iyninku kashan, sidoniokunaj llajtanku Megaramantapacha Afeckama, amorreokunaj jap'iyninkoj mojonkama.

⁵ Guiblitakunaj jap'iyninkuta jap'ina kashallantaj tukuy Líbano inti llojsimuynejkama, Baal Gadmanta Hermón Orqomanta uraynejman, Jamatman yaykunakama.

⁶ Israelitakuna yaykusqankuman jina noqaqa orqorara cheqanejpi, Libanomanta Misrefot Mayinkama tiyakoj sidoniokunata wijch'usaj. Qantaj chay jallp'ata israelitakunaman chayaqenkupaj rak'irapunki, imaynatachus kamachishayki, chayman jina.

⁷ Chay jallp'ataqa jisq'on jatun aylluman, chantá Manasés khuskan jatun aylluman ima qonki, nispa.

⁸ Rubén jatun aylluwan, Gad jatun aylluwan, chantá Manasés khuskan jatun aylluwanqa Jordán mayu chimpapi, inti llojsimuynejpi, jallp'ata jap'isqankuña, imaraykuchus Moisés paykunaman chayaqenkupaj rikuchipusqaña.

⁹ Jap'iyninkoj tinkuynenqa karqa: Arnón wayq'o kantupi Aroermantapacha, Dibonkama, valle chawpipi llajtantin, Medeba tukuy pampannintin ima.

¹⁰ Jinallataj amorreokunaj kuraj kamachejninku Sijonpa tukuy llajtantinta, amonitakunaj jap'iyninku tinkuykama jap'erqanku. Sijonqa Jesbonpi kamacherqa.

¹¹ Paykunallapajtaj Galaad jap'iy karqa, gesureokunaj jap'iyninku, macateokunaj jap'iyninku ima, jinallataj Hermón Orqo, tukuy Basán jap'iy Salcakama karqa.

¹² Chantá Basanmanta kuraj kamachej Ogpa jap'iyninta jap'ikapullarqankutaj. Payqa Astarotpi, Edreypi ima kamacherqa, payqa refaitakunamanta qhepa kaj karqa. Paykunatamin Moisesqa atipaspa chinkachisqa.

¹³ Gesureokunatawan, macateokunatawan ima israelitakuna mana wijch'usqankuchu. Chayrayku paykunaqa Israel suyupi kunankama tiyakushankuraj.

¹⁴ Leví jatun ayllumanrí Moisés mana jallp'ata qosqachu. Paykunaqa israelitakuna Tata Diosman jaywanata apamusqankumanta kawsananku karqa, Tata Diospa kamachisqanman jina.

¹⁵ Moisesqa Rubén jatun aylluman, mashkhachus kasqankuman jina jallp'ata qosqa.

¹⁶ Jallp'a jap'isqankoqa Arnón Wayq'o kantupi Aroermantapacha, valle chawpipi llajtantin, Medeba tukuy pampantinkama karqa.

¹⁷ Chaymanta Jesbón, pampapi kaj tukuy llajtantin karqa: Dibón, Bamot Baal, Bet Baal Megón,

¹⁸ Yahás, Cademot, Mefagat,

¹⁹ Quiriatayin, Sibemá, vallepi kaj moqopi Séret Sajar,

²⁰ Bet Pegor, Pisga orqoj kinraykunan, Bet Yesimot,

²¹ chantá pampapi llajtakuna ima karqa. Chayqa amorreokunaj kuraj kamachejninku Sijonpa tukuy jap'iynin karqa, pichus Jesbonpi kamacherqa, chaypata. Moisesqa Sijonta, chantá payta yanapajkuna Madianmanta kurajkunata atipallasqataj: Evita, Requenta, Surta, Jurta, Rebata ima.

²² Jinallataj israelitakunaqa Beorpa churin watoj Balaamtapis wañuchillarqankutaj.

²³ Rubén jatun aylloj jap'iynin, mashkhachus kasqankuman jina jap'isqanku jallp'a, llajtakunayoj, juch'uy llajtakunayoj karqa, chay jap'iyninkutaj Jordán mayu tinkuykama chayarqa.

²⁴ Gad jatun ayllumanpis Moisesqa jallp'ata qollasqataj, mashkhachus kasqankuman jina.

²⁵ Paykunamantaj Galaad jap'iymanta kaj tukuy llajta, chantá Jazerpa jap'iynin ima chayarqa, chantá amonitakunaj khuskan jap'iyninku ima, chaytaj Rabá chimpapi Aroer llajtakama karqa.

²⁶ Gad jatun ayllojta jap'iyninku kallarqataj Jesbonmanta, Ramat Mispakama, chantá Betonín, Majanayinmanta Debirwan tinkuykama.

²⁷ Vallenejpitaj Bet Aram, Bet Nimrá, Sucot, chantá Safón ima paykunaman chayarqa. Chay jallp'aqa Jesbonpi Sijonpa kuraj kamachejmanta puchoj karqa. Ajinaqa jap'iyninkoqa Jordán Mayoj inti llojsimuynejmanta, Cineret Qochaj uran kantunkama karqa.

²⁸ Chaymin Gad jatun ayllupaj mashkhachus kasqankuman jina jallp'anku karqa. Chay jallp'aqa jatuchaj llajtakunayoj, chantá juch'uy llajtakunayoj ima karqa.

²⁹ Chaymanta Moisesqa Manasés khuskan jatun aylluman, mashkhachus kasqankuman jina jallp'ata qopullasqataj.

³⁰ Paykunaj jallp'ankoqa Majanayinmantapacha tukuy Basanpa jap'iyninkama karqa, chay niyta munan Basanmanta kuraj kamachej Ogpa kamachisqan jap'iy chantá Yairpa jap'iynin ima. Tukuyninpi sojta chunka llajtakuna karqanku.

³¹ Kay khuskan jatun aylluman, pikunachus Manasespa wawan Maquirpa mirayninmanta karqanku, chaykunaman Moisés Galaad jap'iypa khuskanninta qosqa. Chaytawan khuska Astarot llajtata chantá Edrey llajtatawan qollasqataj. Kay llajtakunapi Og sutiyoj kuraj kamachej kamachisqa.

³² Ajinata Moisesqa Jericomanta inti llojsimuynejpi Jordán mayu chimpapi, Moabpa jap'iyninta paykunaman qosqa.

³³ Leví jatun ayllumanrí Moisés mana jallp'ata qosqachu, imaraykuchus paykunaj chayaqenkoqa Israelpa Tata Diosnin karqa, Tata Diospa nisqanman jina.