Josué 12 - DIOSPA QHELQACHISQAN DEUTEROCANONICAL

Moisespa atipasqan

¹ Israelitakunaqa Jordán mayoj inti llojsimuynejpi kay kuraj kamachejkunata atiparqanku. Jap'isqanku jallp'ataj Arnón wayq'omantapacha Hermón orqokama karqa, chantá Jordán mayoj inti llojsimuynejpi vallenkunantin ima.

² Amorreokunaj kuraj kamachejninkumanta ujnin Sijón karqa, paytaj Jesbonpi tiyakorqa. Payqa Galaad khuskanninkama kamacherqa, jap'iynintaj patanejman Jaboc mayumantapacha, uraynejman Arnón mayukama karqa. Inti llojsimuynejman, jinataj Aroer llajtakama jap'iynin karqa. Inti yaykuynejman jinataj jap'iynenqa Arnón vallej khuskanninmantapacha Wañusqa Qochakama karqa.

³ Inti yaykuynejman mojonnenqa Jordán mayu karqa, patanejmantaj Cineret qochakama karqa, uranejmantaj Wañusqa Qochakama karqa. Jinallataj jap'iynenqa Wañusqa Qochamanta inti llojsimuynejman jina Bet Yesimot llajtakama, chantá Pisga orqokama karqa.

⁴ Moisés chantá israelitakunaj atipasqanku ujnin kaj kamachejtaj, Basanmanta kuraj kamachej Og karqa. Payqa refaitakunamanta qhepa kaj karqa. Kamachej Ogqa Astarotpi chantá Edrey sutiyoj llajtakunapi kamacherqa.

⁵ Jap'iynenqa patanejman Hermón Orqokama karqa, inti llojsimuynejmantaj Salca llajtakama, inti yaykuynejmantaj tukuy Basanpa jap'iynin, Gesurpa jap'iynin, chantá Macáj jap'iyninwan tinkuykama karqa. Chay jawa Galaadmanta patanejman, Jesbonpi kuraj kamachej Sijonpa jap'iyninkama kamachillarqataj.

⁶ Chay kuraj kamachejkunata Tata Diospa kamachin Moiseswan, israelitakunawan atipasqanku. Moisestaj chay jap'isqanku jallp'ata Rubén jatun aylluman, Gad jatun aylluman, chantá Manasés khuskan jatun aylluman ima rak'irarqa.

Josuéj atipasqan

⁷ Josuewan, israelitakunawan imarí Jordán mayu inti yaykuynejpi kuraj kamachejkunata atiparqanku, Líbanoj vallenpi Baal Gadmantapacha, Edommanta uranejman Jalac orqokama. Josueqa chay jallp'ata israelitakunaman wiñaypaj paykunajta kananpaj rak'irarqa, mashkha jatun aylluchus kasqankuman jina.

⁸ Chay rak'isqan jallp'a karqa: Orqorara cheqanejpi jallp'a, Jordán mayunejpi valle, inti yaykuynejman orqorara jallp'a, uranejmantaj ch'innejpi jallp'a ima. Chaynejpi ñawpajta jeteokuna, amorreokuna, cananeokuna, ferezeokuna, heveokuna, jebuseokuna ima tiyakorqanku.

⁹ Israelitakunaqa kay llajtakunaj kuraj kamachejninkuta atiparqanku: Jericomanta, Haimanta ima. Chayqa Betel qayllallapi karqa.

¹⁰ Kay llajtakunamanta kuraj kamachejkunata atipallarqankutaj: Jerusalenmanta, Hebronmanta,

¹¹ Jarmutmanta, Laquismanta,

¹² Eglonmanta, Guezermanta,

¹³ Debirmanta, Gedermanta,

¹⁴ Jormamanta, Aradmanta,

¹⁵ Libnamanta, Adulanmanta,

¹⁶ Macedamanta, Betelmanta,

¹⁷ Tapuajmanta, Jefermanta,

¹⁸ Afecmanta, Saronmanta,

¹⁹ Madonmanta, Jazormanta,

²⁰ Simerón Meronmanta, Acsafmanta,

²¹ Tanacmanta, Meguidomanta,

²² Cedesmanta, Carmelo orqopi Jocneanmanta,

²³ Dormanta, Gilgalpi Goyinmanta,

²⁴ chantá Tirsamanta kuraj kamachejta ima atipallarqankutaj. Tukuyninpi israelitakunaj atipasqanku kuraj kamachejkunaqa kinsa chunka ujniyoj karqanku.