Josué 11 - DIOSPA QHELQACHISQAN DEUTEROCANONICAL

Josueqa Jabinta payta yanapajkunatawan atipan

¹ Chantá Jazormanta kuraj kamachej Jabín, israelitakuna imatachus ruwasqankuta yachaspa, Madonmanta kuraj kamachej Jobabta, jinallataj Simeronmanta kuraj kamachejta, chantá Acsafmanta kuraj kamachejta ima yanapanankuta nirikorqa.

² Chantá willachimullarqataj wichaynej orqorara cheqanejpi kuraj kamachejkunaman, Cineret qocha uraynej Arabapi kajkunaman, ura pampapi kajkunaman, Dormanta inti yaykuynejpi tiyakojkunaman ima.

³ Willachillarqataj inti llojsimuynejpi tiyaj cananeokunaman, inti yaykuynejpi kajkunaman, amorreokunaman, heteokunaman, ferezeokunaman, orqo kinraykunapi tiyakoj jebuseokunaman, Mispá jap'iypi Hermón orqo k'uchupi tiyakoj heveokunaman ima tantakuspa, uj tratota ruwanankupaj.

⁴ Ajinamanta tukuy chay kuraj kamachejkunaqa mama qochapi t'iyu jina, may chhika soldadokunawan, may chhika caballokunawan, carretakunawan ima maqanakoj llojsimorqanku.

⁵ Chantá chay kuraj kamachejkuna tantaykukuspa, israelitakunawan maqanakunankupaj Merón mayu chimpapi jarakorqanku.

⁶ Tata Diostaj Josueta nerqa: Ama paykunata manchachikuychu. Noqaqa q'aya kunanta jina tukuyninkuta wañusqata qankunaman jaywaykusqaykichej. Qantaj caballonkunaj chaki ankunkuta khuchuspa p'itiranki, carretankutataj ninawan kanaykunki, nispa.

⁷ Chaymanta Josueqa tukuy soldadonkunawan khuska, Merón mayu chimpapi kashajtinku kaymanta jinalla paykunawan maqanakoj yaykuykorqanku.

⁸ Tata Diostaj paykunata israelitakunawan atipaykucherqa, israelitakunataj paykunata wañuracherqanku. Wakinkunata Sidón jatun llajtakama qhatiykorqanku, chaymantataj Misrefot Mayinkama, inti llojsimuynejpi Mispá pampakama ima tukuyninkuta tukuchinankukama wañucherqanku.

⁹ Chantá Josueqa Tata Diospa kamachisqanta kasuspa, caballonkukunaj chaki ankunkuta khuchuspa, p'itirarqa, jinallataj carretakunatapis ruphaykucherqa.

¹⁰ Chaymanta kutimuspataj, Josuewan soldadonkunawan ima Jazor llajtata espadawan jap'erqanku, maypichus chay kuraj kamachejkuna tratota ruwasqanku, chayta. Jabín sutiyoj kuraj kamachejtapis chaypi wañucherqanku.

¹¹ Jazor llajtapi tiyakojkunata ni uj puchuyojta espadawan wañuracherqanku, llajtapi kaj chhikata phirispa. Jinaytawantaj, Jazor llajtata ruphaykucherqanku.

¹² Ajinata Josueqa tukuynejmanta tantakoj kuraj kamachejkunaj llajtankukunata jap'erqa, jinallatataj kuraj kamachejkunatapis espadawan wañuracherqa. Tukuy imankutataj phirerqanku, Tata Diospa kamachin Moisés kamachisqanman jina.

¹³ Chaywanpis israelitakunaqa orqokunapi kaj llajtakunata mana ruphacherqankuchu. Josueqa Jazor llajtallata ninawan kanaykorqa.

¹⁴ Israelitakunaqa chay llajtakunapi tiyakojkunata tukuyninta mana uj puchuyojta espadawan wañuracherqanku. Chaywanpis imankuchus kajta, jinataj uywankukunatawan ima jap'ikaporqanku.

Josué Moisespa kamachisqanta junt'an

¹⁵ Imaynatachus Tata Dios kamachin Moisesman nisqa, kikillantataj Moisesqa Josueman kamachisqa. Chantá Josueqa mana pantaspa kikinta ruwarqa.

¹⁶ Jinamanta Josueqa tukuy chay cheqanejta jap'erqa: Orqonejta, tukuy Néguev jap'iyta, tukuy Gosén jap'iyta, pampapi jallp'ata, Jordán valleta. Chantá Israel suyupi orqonejta, pampapi jallp'ata ima jap'illarqataj.

¹⁷ Josué atipaspa jap'isqanqa Jalac orqomantapacha Seirkama, chantá Hermón orqo k'uchupi Líbano pampapi Baal Gadkama karqa. Josueqa chay llajtakunamanta kuraj kamachejkunata jap'ispa, wañuracherqa.

¹⁸ Josueqa chay cheqanejmanta kuraj kamachejkunawan unayta maqanakorqa.

¹⁹ Chay cheqanejpi tiyakojkunaqa ni mayqen israelitakunawan tratota ruwarqankuchu. Gabaonpi tiyakoj heveokunalla tratota ruwarqanku. Chay waj llajtakunatarí israelitakuna maqanakuspa jap'erqanku.

²⁰ Tata Diospuni chay llajtayojkunaj sonqonkuta rumiyacherqa, israelitakunawan maqanakoj sayaykunankupaj. Ajinata Diosqa israelitakuna mana khuyakuspa tukuyninta wañuchinankupaj ruwarqa, Tata Dios Moisesman kamachisqanman jina.

²¹ Chaypachallataj Josueqa Hebrón orqopi tiyakoj anaquitakunaj tukuy llajtankutawan phiriykullarqataj: Debir llajtata, Anab llajtata, Judá jap'iypi orqorara cheqanejpi tiyakojkunata, Israelpi orqorara cheqanejpi tiyakojkunata ima.

²² Ajinamanta Israel suyupi jatunkaray runaj Anac sutiyoj ayllunmanta ni uj qhepakorqachu. Wakin anaquitakuna Gazapi, Gatpi, Asdodpi imalla kawsashaj qhepakorqanku.

²³ Ajinata Josueqa chay tukuy jallp'ata jap'erqa, Tata Dios Moisesman kamachisqanman jina. Chaymantataj israelitakunaman, mashkha jatun aylluchus kasqankuman jina paykunajta kananpaj rak'irarqa. Chay qhepata manaña maqanaku, ni ima ch'ajwapis karqañachu.