Jeremías 9 - DIOSPA QHELQACHISQAN DEUTEROCANONICAL

¹ 1 (8.23) Jeremiasqa nillarqataj: Imaynapichus ñaweyqa yaku juturi jina kanman, jinamanta tuta p'unchay paran paranta waqanaypaj llajtay ukhupi wañuchisqa kajkunamanta.

² 2 (1) Imaynapichus ch'innejpi uj ch'ujllallapis noqajta tiyapuwanman, llajtaymanta karunchakunaypaj, imaraykuchus tukuyninku khuchichakojkuna, puraj uyataj kanku.

³ 3 (2) Tata Diostaj nin: Paykuna llullakunapaj wakichisqapuni kashanku, imaynatachus runa arcota mat'iykun flechata kacharinanpaj, ajinata. Manapuni maychus kajta parlankuchu, manachayqa astawan astawan millay kajta ruwanku. Noqa Tata Diostataj mana rejsiwankuchu, nispa.

⁴ 4 (3) Kawsaqeykichejmanta qhawakuychej, amataj kikin wawqeykichejpipis atinikuychejchu, imaraykuchus wawqepurapis ch'awkiyanakunku. Kawsaqentinpurapis llullakuspa tumpanakunku.

⁵ 5 (4) Sapa ujpis runa masinmanta alqochakun, manataj pipis cheqanta parlaj kanchu. Llullakunallaman yachaykukunku. Millayllatapuni ruwanku nitaj chaymanta kutiriyta atinkumanchu.

⁶ 6 (5) Tata Dios nin: Qanqa, Jeremías, tiyakunki kay ch'awka runakunaj chawpinkupi, chay jina ch'awka kasqankuraykutaj mana rejsikapuwayta munankuchu.

⁷ 7 (6) Chayrayku noqa Tukuy Atiyniyoj Tata Dios nillanipuni: Imatañataj kay aylluywan astawan ruwayta atiymanri? Noqaqa qorita jina ninapi unuyachispa, paykunata ch'uwachasaj.

⁸ 8 (7) Qallunkoqa wañuchej flecha jina, siminkupis q'otiyanallamanta parlan. Runa masinkuman may misk'ita parlarinku, sonqonkupitajrí misk'anata churaspa, urmachinallapi yuyanku.

⁹ 9 (8) Manachu kay millayta ruwasqankumanta paykunata jasut'iymanri? Manachu ajinata ruwaj suyumanqa ruwasqanman jina qopuymanri? Ajinata noqa Tata Dios nini.

¹⁰ 10 (9) Chantá Jeremías nerqa: Orqokunarayku sonqo nanayta waqasaj, pastokunaraykutaj llakiy yarawita takisaj, imaraykuchus tukuy pastoqa ruphasqa kashan. Mana pipis chayninta purinñachu, manañataj wakakunaj waqasqanpis uyarikunñachu. P'isqokunapis, k'ita animalkunapis ayqekunkuña, nispa.

¹¹ 11 (10) Tata Dios nin: Jerusalén llajtata rumi qotuman tukuchisaj, k'ita alqokunaj tiyakunanman. Judá suyupi llajtakunata raqaykunaman tukuchisaj, manañataj pipis chaypi tiyakoj kanqachu, nispa.

¹² 12 (11) Pitaj yachayniyoj kanman kay imakunata sut'inchananpajri? Pimantaj Tata Dios chaykunamanta sut'incharqa, wajkunaman willananpajri? Imaraykutaj kay suyu ch'inyachisqa kashan, ch'aki pampa mana pejpa purinan jinari? nispa.

¹³ 13 (12) Tata Diostaj kuticherqa: Kay llakiykuna paykunata qhatirin, imaraykuchus kamachisqayta saqerpayaspa, mana kasuwarqankuchu, nitaj nisqayta ruwaspa junt'arqankuchu.

¹⁴ 14 (13) Manachayqa tatankoj yachachisqanta ruwarqanku. Baal lantikunata yupaycharqanku, ch'ichi sonqonkoj yuyasqantataj ruwarqanku.

¹⁵ 15 (14) Chayrayku noqa Israelpa Diosnin Tukuy Atiyniyoj Tata Dios kayta nini: Paykunaman jayaq'eta mikhuchisaj, venenoyoj yakutataj ujyachisaj.

¹⁶ 16 (15) Paykunata ñawpa tatankoj, nitaj paykunaj mana rejsisqanku suyukunaman ch'eqerachisaj. Chaypitaj paykunata espadawan qhatiykachachisaj, ni uj puchuyoj tukuchisqa kanankukama, nispa.

Jerusalenpi waqaykunku

¹⁷ 17 (16) Tukuy Atiyniyoj Tata Dios nin: Allinta qhawaychej. Qolqeta paganarayku waqaj warmikunata wajyachimuychej, sumajta waqayta yachajkunata wajyamuychej, nispa.

¹⁸ 18 (17) Arí, usqhayta jamuchunku noqanchejrayku llakiyta waqapunawanchejpaj. Ñawinchejmanta waqayqa mayu jina puririchun.

¹⁹ 19 (18) Sionmantapacha llakiymanta waqaspa qhaparisqanku uyarikun: Ay, imaynatataj mana imayoj llakiypi rikhurinchej. May p'enqachisqa kashanchej. Kay suyunchejta saqerparinanchej tiyan, imaraykuchus wasinchejqa raqaykunallaña, nispa.

²⁰ 20 (19) Warmikuna, Tata Diospa nisqanta uyariychej, parlasqanta allintapuni uyariychej. Ususiykichejman waqayta yachachiychej, jinallataj warmi masiykichejmanpis.

²¹ 21 (20) Wañoyqa wasinchejkunaman yaykuykamun, kamachina wasimanpis. Callekunapi wawakunata wañuchin, plazakunapitaj waynakunata.

²² 22 (21) Runakunaj ayankoqa wanu jina pampapi wijch'usqa kashan. Imaynatachus trigoj uman ruthoj qhepanpi t'akakojtin, mana pipis oqharej kanchu, ajina kanku. Ajinata Tata Dios nin.

²³ 23 (22) Tata Dios nillantaj: Yachayniyoj runa yachayniyoj kasqanmanta ama runaykachachunchu, nitaj atiyniyojpis atiyninmanta, nillataj qhapajpis kapuyninmanta umata oqharichunchu.

²⁴ 24 (23) Sichus pipis runaykachayta munanman chayqa, noqata rejsiwasqanmanta, kasuwasqanmanta ima runaykachachun. Noqa Tata Dios pichus kasqayta yachachun. Noqaqa kay pachapi imatapis ruwani khuyakuywan, justiciawan, cheqa kaywantaj, imaraykuchus chaymin sonqoyta kusichin. Noqa Tata Diosmin chayta nini.

²⁵ 25 (24) Tata Dios nillantaj: Uj p'unchay jamushan, chay p'unchaypitaj noqaqa circuncidasqa kajta, mana circuncidasqa kajta, tukuytapuni jasut'isaj.

²⁶ 26 (25) Kay suyukunata jasut'isaj: Egiptota, Judata, Edomta, Amonta, Moabtawan ima. Jinallataj ch'innejpi tukuy tiyakojkunata, pikunachus umankuta ruthuchikunku, chaykunatawan ima jasut'illasajtaj. Chayta ruwasaj, imaraykuchus chay suyukuna, jinataj israelitakunapis cheqapuni sonqonkupi mana circuncidasqachu kanku, nispa.