Jeremías 6 - DIOSPA QHELQACHISQAN DEUTEROCANONICAL

Asiriamanta soldadokuna Jerusalenta jap'inankupaj muyuykunku

¹ Benjamín ayllumanta kajkuna, pakakunata mask'aychej, Jerusalenmantataj ayqeychej. Tecoapi trompetata waqachiychej. Señal kananpaj ninata jap'ichispa, q'oshñichiychej Bet Haquerenpi, imaraykuchus wichaynejmanta jatun llakiy, manchay ñak'ariytaj jamushan.

² Sión llajtata, chay may k'achitu llajtata pampachaspa, raqayllamanña tukuchisaj.

³ Kuraj kamachejkunaqa soldadonkunawan Jerusalenpa muyuyninpi toldonkuta sayachispa, munasqankuta ruwanqanku.

⁴ Israelpa awqankunaqa nenqanku: Sión llajtaj contranta maqanakunapaj wakichikuychej. Jamuychej, chawpi p'unchaynejta chay llajtaman yaykuykusunchej. Chaywanpis intipis yaykupushanña, laqhayaykushanñataj.

⁵ Jinapis jatarispa, tutanñataj yaykuykunachej, sinch'i jark'achasqa wasinkutataj thuñiykunachej, nispa.

⁶ Tukuy Atiyniyoj Tata Dios kayta kamachin: Sach'akunata k'utuychej, chaywantaj patachata ruwaychej, Jerusalenman maqanakoj yaykunaykichejpaj. Kay llajta jasut'isqa kananpaj qhawasqaña, imaraykuchus millayta ruwaykunawan junt'a kashan.

⁷ Jerusalenmanta millayta ruwana llojsimullanpuni, imaynatachus uj pujyumanta yaku llojsimullanpuni, ajinata. Chay llajtapi suwanamanta chantá mana allinta ruwanamanta parlasqalla uyarikun. Chaypi onqoykunawan k'irisqa runakunallata rikuni.

⁸ Jerusalenpi tiyakojkuna, wanaychej. Pajtataj qanmanta karunchakuyman, jallp'aykitataj ch'inman tukuchiyman, mana pipis chaypi tiyakunanpaj jina, nispa.

Israelitakunapaj jasut'i kananmanta willaykuna

⁹ Tukuy Atiyniyoj Tata Dios nin: Chaypacha puchoj israelitakunata kutin kutinta mask'anqanku, imaynatachus uvata kutin kutinta chajmankichej, manaña ujpis qhepakunankama, ajinata, nispa.

¹⁰ Chantá noqa Jeremías kuticherqani: Pimantaj uyarinawankupaj willamusajri? Paykuna joq'araman tukunku, manataj uyariyta munankuchu. Tata Diospa nisqanta mana munakunkuchu, nitaj chaywan misk'ichikunkuchu.

¹¹ Noqatajrí Tata Diospa phiñakuyninwan junt'asqa kani. Manaña sonqoyta ñit'iykuyta atinichu, nispa. Chayrayku Tata Dios niwarqa: Callepi purishanku, chay wawakunaj patankuman phiñakuyniyta kachaykuy ari, jinallataj waynakunaj patankumanpis. Qharipis warmintin chaypacha presochasqa kanqanku, jinallataj machu runakuna, allin machu runakunapis presochasqallataj kanqanku.

¹² Wasinku, llank'ananku jallp'a, chantá warminkupis wajkunaj makinkuman chayanqanku, imaraykuchus noqa makiyta oqharisaj kay jallp'api tiyakojkunata jasut'inaypaj. Noqa Tata Diosmin chayta nini.

¹³ Tukuyninku jatunmanta juch'uykama, mana allinta ruwaspa qolqe mirachiyllapi yuyanku. Jinallataj sut'inchajkuna, sacerdotekunapis runakunata q'otiyanallapi yuyanku.

¹⁴ Aylluypa k'irisqanta tumpallata jampiykurinku. Paykunaqa tukuy imapis allillan kashasqanta ninku. Jinapis manapuni imapis allinchu kashan.

¹⁵ Chay millay imakunata ruwasqankumanta p'enqakorqankuchu? Mana, manapuni p'enqakorqankuchu, nitaj imachus p'enqakuy kasqanta yachankuchu. Chayrayku jasut'inay p'unchaypi ujkuna jina jayt'akuspa urmanqanku. Noqa Tata Diosmin chayta nini.

Israelqa Tata Diospa nisqanta mana kasunchu

¹⁶ Tata Dios ayllunman nillantaj: Ñankunapi sayaykuspa, qhawaychej. Chantá ñawpa ñankunamanta tapurikuychej, mayqenchus aswan allin ñan kasqanta. Chantá chay ñanta puriychej, sonqo samariytataj tarinkichej, nispa. Paykunatajrí nerqanku: Manapuni chayninta puriykumanchu, nispa.

¹⁷ Tata Diosqa llajtata qhawajkunata churaspa, ayllunman nerqa: Trompetaj waqasqanta allinta uyariychej, nispa. Israel ayllutajrí kuticherqa: Mana kasuta ruwayta munaykuchu, nispa.

¹⁸ Chayraykumin Tata Dios nillantaj: Suyukuna, uyariychej, yachaychejtaj imatachus kay aylluywan ruwanayta.

¹⁹ Kay pachapi tukuy runakuna, sumajta uyariychej: Kay aylluyman uj ñak'ariyta apachimusaj millay kajta umachakusqankurayku, imaraykuchus nisqayta mana kasuta ruwarqankuchu, jinataj kamachisqayta qhesacharqanku.

²⁰ Imapajtaj qankuna Sabamanta inciensota apamuwankichejri? Imapajtaj karu llajtamanta sumajta q'apaj qhorakunatapis apamullawankichejtajri? Uywa ñak'asqa q'olachisqata jaywawasqaykichejqa mana jap'ikunaypaj jinachu, nillataj waj jaywasqaykichejpis kusichiwanchu, nispa.

²¹ Chayrayku Tata Dios nin: Noqa kay aylluyta misk'achinaypaj tojllata churasaj. Tukuy tatakuna, wawakuna, qayllankupi kajkuna ima, jinallataj kawsaqenkupis, tukuyninku wañonqanku, nispa.

Wichaynejmanta Jerusalenta jap'inanpaj jamonqa

²² Tata Dios ajinata nin: Wichaynejmanta may jina atiyniyoj suyu jamunanpaj wakichikushan.

²³ Lanzakunawan, flechanapaj arcokunawan ima wakichisqaña kanku. Paykunaqa rumi sonqo kanku, mana uj chhika khuyakuyniyojtaj. Mama qochaj qhollchoqeyasqan jina qhaparisqankupis uyarikun. Caballokunapi jamushanku, Sionpa contranpi maqanakunankupaj, nispa.

²⁴ Jerusalenpi tiyakojkuna ninku: Chaymanta parlajta uyarispa, manchachikuywan kallpaykupis llawch'iyan, onqokoj warmi jinataj ñak'ariypi, nanaypitaj kashayku.

²⁵ Ama pipis campoman llojsiychejchu, amataj ñankunapi puriychejchu. Awqaqa armanwan sumaj wakisqa kashan. Chantá manchachikuy, kharkatitiy ima tukuynejpi kashan, nispa.

²⁶ Ayllúy, qhashqa p'achata churakuy, ushphapitaj qhoshpaspa, llakiyniykita rikuchiy. Luto p'achata churakuspa, sonqo nanayta waqay, imaynatachus pipis uj k'ata wawan wañupojtin waqan, ajinata, imaraykuchus wañuchejkuna contraykipi ñapis jamonqankuña, nispa.

²⁷ Tata Dios nillawarqataj: Jeremías, qanta churayki aylluypa kawsayninta waturinaykipaj, imaynachus purisqankuta allinta qhawarinaykipaj.

²⁸ Paykuna contraykipi oqharikojkuna, k'ullutaj kanku, jinataj cuento q'epi runakuna kanku. Tukuyninku millayta ruwaspa purejkuna kanku. Paykuna bronce, fierro jinataj kanku.

²⁹ Maypachachus phukuna fuelle sinch'ita phukun chaypacha, titeqa usqhayta unuyapun. Chaywanpis jich'ajqa qhasillata metalta ch'uwachayta munan, imaraykuchus millayta ruwajkuna manapuni chinkankuchu.

³⁰ Paykuna sutichasqa kanku: “Qhesachasqa qolqe metal”, nispa, imaraykuchus noqa, Tata Dios, paykunata qhesacharqani, nispa.