Jeremías 52 - DIOSPA QHELQACHISQAN DEUTEROCANONICAL

Sedequiaspa kamachisqan

¹ Sedequías kamachiyta qallarishaspa, iskay chunka ujniyoj watayojña karqa, chunka ujniyoj watatataj Jerusalenpi kamacherqa. Mamanpa sutin Jamutal karqa, paytaj Libnamanta waj Jeremiaspa ususin karqa.

² Sedequiasqa manapuni Tata Diospa munayninman jinachu ruwarqa. Imaynatachus kuraj kamachej Joacín ruwarqa, ajinata paypis ruwallarqataj.

³ Chayrayku Tata Dios Jerusalén llajtapaj, chantá Judá suyupajpis phiñakorqa. Chantá ñawpaqenmanta paykunata wijch'orqa. Chantá Sedequías Babiloniata kuraj kamachejpa contranpi oqharikorqa.

Babiloniata kuraj kamachejqa Jerusalenta jap'in

⁴ Chayrayku Sedequías jisq'on watataña kamachishajtin, chunka kaj killaj chunka kaj p'unchayninpi kuraj kamachej Nabucodonosor, tukuy soldadonkuna ima Jerusalenta atipaspa jap'inankupaj jamorqanku. Paykunataj Jerusalén llajtaj ñawpaqenpi jaraykukuspa, muyuyninpi jallp'a moqota sayaricherqanku llajtaman yaykunankupaj.

⁵ Sedequías chunka ujniyoj watata kamachinankama Jerusalén llajta soldadokunawan muyuykusqa karqa.

⁶ Chay watamanta tawa kaj killanpi, jisq'on kaj p'unchayninpi Jerusalenpi yarqhayqa may sinch'i karqa, manataj imapis mikhunapaj karqachu.

⁷ Chantá llajtaj perqanta jusk'uspa, chay ch'isi tukuy soldadokuna, kuraj kamachej ima Jerusalén llajtamanta ayqerqanku, caldeokunawan Jerusalén llajta muyuykusqa kashajtinpis. Maypichus iskay perqa tinkuy chawpipi uj punku karqa, chayninta llojserqanku. Kuraj kamachejpa huertanman rina ñannejta rispataj, chaymanta Jordán valleman rej ñanta jap'irerqanku.

⁸ Chaywanpis caldeokunamanta soldadokunaqa kuraj kamachej Sedequiasta qhatiykuspa, Jericó pampapi taripamorqanku. Sedequiaspa soldadonkunataj payta saqerparispa, tukuynejman ch'eqeraporqanku.

⁹ Chantá caldeokunaqa kuraj kamachejta jap'ispa, Babiloniata kuraj kamachejpa ñawpaqenman aparqanku. Chaypacha Nabucodonosorqa Jamat suyupi Ribla llajtapi kasharqa. Chaypi Nabucodonosor kuraj kamachej Sedequiaswan imatachus ruwanankuta kamacherqa.

¹⁰ Sedequías rikushajtin, churinkunaj umankuta qholurparerqanku, jinallataj Judamanta kamachejkunaj umankutapis.

¹¹ Chantá Nabucodonosor kamachillarqataj Sedequiaspa ñawinta orqhonankuta, chantá cadenawan wataykunankuta Babiloniaman payta apanankupaj. Chaypi Sedequías wañunankama kawsarqa.

Jerusalén llajtapi Templota thuñinku

¹² Babiloniata kuraj kamachej Nabucodonosor chunka jisq'onniyoj watataña kamachishajtin, phishqa kaj killaj chunka kaj p'unchayninpi kuraj kamachejta yanapaj soldadokunata kamachej Nabuzaradán Jerusalenman chayamorqa.

¹³ Payqa Tata Diospa Templonta ruphaykucherqa. Jinallataj kuraj kamachejpa kamachinan wasita, chantá Jerusalén llajtapi tukuy wasikunata ruphaykuchillarqataj, astawanqa kurajkunaj wasinkukunata.

¹⁴ Nabuzaradanwan khuska Caldeamanta soldadokuna Jerusalenpa muyuyninpi kaj perqata thuñiykorqanku.

¹⁵ Chaymantaqa Nabuzaradanllataj Babiloniaman apacherqa wakin wajchakunata, chay llajtapi puchojkunatawan, jinataj Babiloniata kuraj kamachejman k'askakojkunatawan ima.

¹⁶ Nabuzaradanqa wakin allin wajcha kajkunallata Judapi saqerqa, uva huertakunata qhawanankupaj, jallp'ata llank'anankupaj ima.

¹⁷ Chantá caldeo soldadokunaqa Tata Diospa Templonpi broncemanta tukuy imata t'unararqanku: Bronce sayantakunata, chukukunata, jatun yaku churanatapis. Jinaytawantaj, chay tukuy bronceta Babiloniaman apakaporqanku.

¹⁸ Ajinallatataj mankakunata, lampakunata, mecha k'utunata, jatuchaj vasokunata, jatuchaj wisllakunata aparqanku. Jinallataj Diosta yupaychanapaj broncemanta kaj waj imakunatapis apallarqankutaj.

¹⁹ Jinallataj qorimanta, qolqe metalmanta tukuy kaj imakunatawan apakapullarqankutaj: Mayllakuna ch'illamita, nina oqharinata, jatuchaj vasokunata, ushpha orqhonata, k'anchanakunata, jatuchaj wisllakunata, Diosman vino jaywana vasokunatapis.

²⁰ Chay iskay sayantamanta, jatun yaku churanamanta, chunka iskayniyoj toromanta, jinataj uran chukukunamanta ima, mayqenkunatachus kuraj kamachej Salomón ruwachisqa Tata Diospa Templonpaj, chaykunamanta bronce mashkhachus kasqan mana yachakorqachu.

²¹ Chay iskay jatuchaj sayantaqa sapa uj sayayninman pusaj metroyoj karqa, muyuyninmantaj phishqa metro khuskanniyoj. Sonqonqa soqolla karqa. Chay broncej phatuntaj uj t'ajllu jina karqa.

²² Sapa sayantaqa broncemanta ruwasqa pilluyoj karqa. Chaytaj sayayninman iskay metro kuraj jina karqa. Chaypa muyuynintaj broncemanta ch'ipawan muyuykuchisqa karqa, chantá broncemanta granadakunawan k'achanchasqataj. Iskaynin sayantan kikinkamalla karqanku.

²³ Broncemanta ch'ipaj patanpi sapa ujpi pachaj granadakuna karqa, chay tukuymanta jisq'on chunka sojtayoj sut'ipi kasharqanku.

Judiokuna waj suyuman apasqa kanku

²⁴ Soldadokunata kamachejqa kuraj kaj sacerdote Seraiasta jap'erqa, sacerdote masin Sofoniastawan. Chantá Temploj pationpi kinsa soldadokuna punkuta qhawarqanku, chaykunatapis jap'illarqataj.

²⁵ Llajtallapiraj kasharqanku, chaykunamanta soldadokunata kamachejta, kuraj kamachejta umachajkunamantataj qanchis runata jap'icherqa. Jap'ichillarqataj, maqanakupaj soldadokuna tantarqa, chay runatapis. Jinallataj llajta ukhupi sojta chunka runakunatawan jap'ichillarqataj.

²⁶ Nabuzaradanqa chay tukuy runakunata Babiloniata kuraj kamachejpa ñawpaqenman aparqa, Jamat suyupi Ribla llajtapi kashajtin.

²⁷ Ribla llajtapitaj Babiloniata kuraj kamachejqa paykunata wañurachinankuta kamacherqa. Ajinatamin Judá suyupi tiyakojkuna waj suyuman apasqa karqanku.

²⁸ Nabucodonosor qanchis watataña kamachishaspa, Judá suyumanta 3.023 runakunata Babiloniaman apacherqa.

²⁹ Chunka pusajniyoj watataña Nabucodonosor kamachishaspataj, 832 runakunatawan Jerusalenmanta Babiloniaman apachillarqataj.

³⁰ Iskay chunka kinsayoj watataña Nabucodonosor kamachishajtintaj, Nabuzaradán 745 runakunata Judá suyumanta apacherqa. Chay apasqa runakunaqa tukuyninpi karqanku 4.600.

Kuraj kamachej Joaquinta kacharipunku

³¹ Judamanta kuraj kamachej Joaquín apasqa kasqanmanta kinsa chunka qanchisniyoj watanman, chunka iskayniyoj killamanta iskay chunka phishqayoj kaj p'unchayninpitaj kuraj kamachej Evil Merodac Babiloniapi kamachiyta qallarerqa. Payqa Judata kuraj kamachej Joaquinwan k'acha karqa. Chayrayku carcelmanta orqhochimorqa.

³² Payqa Joaquinta aswan allinpaj qhawarqa, Babiloniapi paywan kasharqanku, chay waj kuraj kamachejkunamanta nisqaqa.

³³ Chayrayku pay kamacherqa chaymantapacha Joaquinqa preso kanan p'achata saqespa, aswan sumaj p'achata churakunanta, jinaspataj kuraj kamachejwan khuska mikhunanta.

³⁴ Ajinata Babiloniata kuraj kamachejqa Joaquinta allinpaj qhawarqa Joaquín wañupunankama.