Jeremías 51 - DIOSPA QHELQACHISQAN DEUTEROCANONICAL

Tata Dios Babiloniata urmachin

¹ Tata Dios nin: Noqaqa tukuy imata phirej sinch'i wayrata Babiloniaj contranpi kachaykusaj, jinallataj caldeokunaj contrankupipis.

² Babiloniaman awqankunata kachaykusaj, trigota jina paykunata wayrachinankupaj. Chay suyuta ch'inyachenqanku, imaraykuchus tukuynejmanta contranpi llojsiykamonqanku, ñak'arinanku p'unchay chayamojtin.

³ Flechajkunaqa arconkuta ama mat'ichunkuchu, nitaj fierro pecherankutapis churakuchunkuchu. Babiloniamanta waynakunata ama khuyaychejchu. Soldadonkutapis ni uj puchuyojta tukuchiychej.

⁴ Caldeokunaj tukuy suyunpi runaqa wañuchisqa kanqanku, llajta ukhupitaj parti wañusqakuna mast'alla wijch'urayanqanku.

⁵ Israel aylluwan, Judá aylluwanqa noqa pichus Israelpa May Llimphu Kaj Diosnin kajpa contraypi juchallerqanku, suyunkutaj juchallisqankuwan junt'a kashan. Chaywanpis noqa Israelpa Tukuy Atiyniyoj Tata Diosnin mana paykunata saqerparinichu.

⁶ Babiloniamanta ayqeychej. Pichus atejqa ayqekuchun. Ama qankunapis Babiloniaj millayta ruwasqanrayku wañuchisqachu kaychej, imaraykuchus Tata Diospa vengakunan p'unchay chayamun, paytaj ruwasqankuman jina paykunaman kutichiponqa.

⁷ Babiloniaqa Tata Diospa makinpi qori vaso jina karqa. Payqa tukuy kay pachata machacherqa. Tukuy suyukunaqa vinonmanta ujyarqanku, chaywantaj yuyayninkuta chinkachikorqanku.

⁸ Jinallaman Babiloniañataj ujllata urmaspa, phirikorqa. Paymanta waqaychej. K'irisqankunapaj jampita apamuychej, ichapis qhaliyapunman.

⁹ Babiloniata jampiykunchejña, jinapis manapuni qhaliyanchu. Payta saqerparispa, suyunchejman jaku ripunachej, imaraykuchus juchachasqa kasqanqa janajkama chayan, phuyukamataj oqharikun.

¹⁰ Tata Dios justiciata ruwawanchej. Chayrayku jamuychej, Tata Diosninchej imatachus ruwasqanta Sión orqopi willamusunchej.

¹¹ Tata Diosqa Babiloniata tukuchiyta munan. Media suyumanta kuraj kamachejkunata rijch'arichispa, tanqamun. Chaymin Tata Diospa vengakuynenqa, Templonta imatachus ruwasqankumanta. Flechanapaj arcoykichejta, jark'akuna escudoykichejtataj oqhariychej.

¹² Wiphalata pataman oqhariychej, Babiloniaj perqankunata thuñej jamunankupaj. Llajta qhawaj soldadokunata ashkhata churaychej. Pakakuspa phinkiykoj soldadokunatapis churallaychejtaj. Tata Diosqa Babiloniaj contranta imatachus ruwananta ruwanqapuni.

¹³ Qan Babilonia, jatuchaj mayu kantupi tiyakoj, may chhika qhapaj kapuyniyoj kaj, chinkachisqa kanayki p'unchay chayamunña, kawsanayki p'unchaypis tukukaponqa.

¹⁴ Tukuy Atiyniyoj Tata Dios sutinrayku tilun: Llajtaykita awqaykikunawan phinki phinkikunawan jina junt'aykuchisaj, paykunataj qanta atipaykususqankurayku, kusiymanta takirikonqanku, nispa.

Tata Diosta yupaychanapaj takiy

¹⁵ Tata Diosqa atiyninwan kay pachata ruwarqa, yachayninwantaj kay pachata sayacherqa, yuyayninwantaj janajta aysarqa.

¹⁶ Sinch'ita qhaparispa, phuyupi yakuta t'ojyarichin, kay pachaj k'uchunmantataj phuyukunata pataman wicharichin. Paramushajtin, lliuj lliujkunata lliphipirichin, wayratapis jallch'ananmanta orqhomun.

¹⁷ Tukuy runakunaqa mana yuyayniyoj, wampu kanku. Lantikunata ruwajkunaqa ruwasqankumanta p'enqakunku. Chay lantikunaqa runaj ruwasqallan, mana kawsayniyojchu kanku.

¹⁸ Chaykunaqa mana imapaj walejchu kanku, asikunapaj jina. Tata Dios juicio p'unchaypi chaykunata chinkarparichenqa.

¹⁹ Jacobpa Diosninrí mana chay lantikuna jinachu. Payqa tukuy kay pachapi kaj chhikata ruwarqa. Paymin Israel aylluta ajllakorqa paypata kananpaj, sutintaj Tukuy Atiyniyoj Tata Dios.

Tata Dios Babilonianejta waj suyukunata jasut'in

²⁰ Tata Dios nin: Babilonia, qanqa maqanakupaj armay jina kanki. Qanwanqa waj suyukunata phirirasaj, qanllawantaj kamachinanku tiyanakunata chinkachisaj.

²¹ Qanwan caballokunata, jinataj caballopi rejkunatapis wañurachisaj. Qanllawantaj carretakunata phiriykuchisaj, chaypi rejkunatapis wañuchillasajtaj.

²² Qannejta qharikunata, warmikunatapis wañuchisaj, chantá machu runakunata, waynakunata, jinataj sipaskunatapis wañuchillasajtaj.

²³ Qanwan michejkunata, uywakunatapis wañuchisaj, jinallataj chajrapi llank'ajkunata, yuntankutapis. Chantá kamachejkunata, kamachina wasipi yanapajkunatapis phirillasajtaj, nispa.

Babiloniaqa Tata Dioswan jasut'ichikun

²⁴ Tata Dios nillantaj: Kunantajrí noqa rikunaykichejta Babiloniata, caldeokunatapis imatachus ruwasqankuman jina kutichisaj, Sión llajtata mana ima allinta ruwasqankurayku, nispa.

²⁵ Noqa qanpa contraykipi kashani, atiyniyoj suyu, tukuy kay pachata tukuchej. Ajinata noqa Tata Diosmin nini. Qanpa contraykita makiyta oqharisaj, chhanka patamanta urmachimusunaypaj, ruphachisqa orqoman jinataj tukuchisqayki.

²⁶ Loqhesqa rumiykita wasita ruwanapaj ni pipis oqharenqachu. Wiñaypaj ch'inpacha kanki. Noqa Tata Diosmin chayta nini.

²⁷ Chay suyupi wiphalata pataman oqhariychej maqanakuman yaykunapaj. Trompetata waqachiychej, runatataj tantaychej, Babiloniaj contranta maqanakoj yaykunapaj. Paypa contranpi Araratmanta, Minimanta, Askenazmantawan runata tantaychej. Chantá uj kamachejta churaychej, tukuy rejkunata maqanakuman pusananpaj. Caballopi rejkunata kachaykuychej, may chhika phinki phinkikuna jina.

²⁸ Waj suyukunata wakichiychej maqanakuman yaykunankupaj. Mediamanta kuraj kamachejkunata chaypaj wakichiychej, chantá kurajkunata, paywan kajkunata, jinallataj kamachiyninkupi tukuy runatapis.

²⁹ Kay pacha ikhakun, kharkatitintaj, imaraykuchus Tata Dios wakichikusqanta junt'ashan, Babiloniata ch'in t'ajra pampaman tukuchinanpaj.

³⁰ Babiloniamanta wapu soldadokunajta manaña maqanakunankupaj kallpanku kanchu. Maqanakuyta saqerparispa, jark'achasqa pakakunallankupiña warmi jina pakaykunku, imaraykuchus wasinkoqa ruphaykuchisqa kashan, llajta punkunkunataj phirisqa.

³¹ Qhepan qhepanta kachakuna Babiloniamanta kuraj kamachejman willamoj rinku, tukuynin llajtata jap'isqankuta willanankupaj.

³² Kuraj kamachejman willanku awqakuna mayu chimpanata jap'isqankuta, mayu kantupi t'uturakunatapis ruphaykuchisqankuta, chayraykutaj soldadokuna ancha mancharisqa kashasqankuta.

³³ Israelpa Tukuy Atiyniyoj Tata Diosnin kayta nin: Babiloniaqa trillana eraman rijch'akun, trigo oqharina tiempotaj chayamushanña, nispa.

³⁴ Sión llajta Jerusalenqa nin: Babiloniata kuraj kamachej Nabucodonosor oqoykuwarqayku. T'unata ruwaspa, ch'usaj chuwata jina saqerpariwarqayku. Mama qochamanta sierpe jina oqoykuwarqayku, kapuyniykuwantaj sajsaykukorqa. Chaymantataj llajtaykumanta wijch'uwarqayku.

³⁵ Noqaykuta ñak'arichiwasqaykoqa Babiloniaj patanman urmachun, nispa Sionpi tiyakojkuna nenqanku. Caldeokunaj patankuman yawarniyku jich'akuchun, nispa Jerusalenpi tiyakojkuna ninku.

³⁶ Tata Dios ajinata nin: Noqa justiciata ruwasqayki, awqaykiwantaj pagachikusaj. Babiloniaj mayunta, jinataj yaku juturintapis ch'akichisaj.

³⁷ Babiloniaqa raqayllamanña tukuchisqa kanqa, k'ita alqokunaj pakakunallankumanña, mana tiyakunapaj jinaman. Chantá tukuy runakuna chayta rikuspa, t'ukonqanku, mancharikonqankutaj.

³⁸ Babilonia llajtayojkuna león jina qhaparenqanku, uña leonkuna jinataj phiñarikonqanku.

³⁹ Manchayta q'oñirishajtinku, jatun mikhuyta wakichipusaj, paykunatataj ujyachispa machaykuchisaj kusikunankupaj. Chaywanpis paykuna wiñaypaj puñukaponqanku, manataj ujtawan rijch'arikonqankuchu. Noqa Tata Diosmin chayta nini.

⁴⁰ Chaymanta camalman paykunata qhatisaj, imaynatachus corderokunata, chivokunata, mochokunatapis apankichej, ajinata, nispa.

Babiloniapaj llakiy yarawi

⁴¹ Babilonia tukuy kay pachapi manchay uyarisqa llajta kaspa, imaraykutaj chay jinata urmananri? Tukuy suyukuna payta urmajta rikuspa, may jinata mancharikonqanku.

⁴² Mama qochaqa Babiloniaman junt'aykonqa, qhollchoqeyasqanwantaj p'ampaykonqa.

⁴³ Chay llajtankunaqa ch'inman tukonqanku, ch'aki jallp'aman, ch'in pampaman ni pejpa tiyakunanpaj jina, nitaj pipis chayninta purenqañachu.

⁴⁴ Noqataj Babiloniaj diosnin Belta jasut'isaj, imatachus oqoykusqantataj lansachisaj. Manañataj waj suyukunapis payman jamonqankuchu. Babiloniaj perqankunapis thuñisqa kanqa.

⁴⁵ Aylluymanta kajkuna, Babiloniamanta llojsimpuychej, sapa ujtaj kawsayninta noqa Tata Diospa sinch'i phiñakuyniymanta librachun.

⁴⁶ Ama mancharikuychejchu, nitaj kharkaychejchu, kay suyupi imaymana parlasqankumanta. Sapa wata uj jina uj jinatataj parlanqanku, chay suyupi millay ñak'arichina kasqanmanta, jinataj kamachejkunapura maqanakumanta.

⁴⁷ Babiloniaj lantinkunata jasut'inay p'unchay chayamonqapuni. Chay suyoqa k'umuykachachisqa qhepakonqa, ayakunawan junt'ataj.

⁴⁸ Janajwan, jinataj kay pachawan, chaypi tukuy kajkunapis Babilonia urmasqanmanta mayta kusikonqanku, wichaynejmanta phirejkuna jamojtinku. Noqa Tata Diosmin chayta nini.

⁴⁹ Arí, Babilonia urmanqapuni, Israel ayllumanta runakunata wañurachisqanmanta, jinataj tukuy kay pachapi runakunata wañurachisqanmanta ima.

Babiloniapi kaj judiokunapaj willay

⁵⁰ Qankuna wañuchisqa kanamanta llusp'ejkuna, mana sayarispa, ayqekuychej. Karupi kashaspapis, Tata Diosmanta yuyarikuychej, jinallataj Jerusalenmantapis.

⁵¹ Qankuna ninkichej: Turiyawasqaykuta uyarispa, p'enqakuyku. Uyaykutapis mana mayman churayta atiykuchu, imaraykuchus waj llajtayoj runakuna Templopi Diosllapaj T'aqasqa Cheqakama yaykunku, nispa.

⁵² Tata Diostajrí nin: Babiloniaj lantinkunata jasut'inay p'unchay jamushan, tukuy chay suyupi parti wañusqa kajkunataj khuyayta ayqonqanku.

⁵³ Babilonia janajmanpis wicharichun aswan pataman atiyninta churananpaj, jaqaykamapis awqankunata kachasaj chay atiyninta phirinankupaj. Noqa Tata Diosmin chayta nini.

Babilonia llajta raqayllamanña tukuchisqa

⁵⁴ Babiloniamantapacha nanaywan qhapariy uyarikun. Caldeokunaj suyunku phirisqa kasqanmanta jatun ch'ajwa uyarikun.

⁵⁵ Tata Diosmin Babiloniata chinkarparichenqa, may kasqanta yuyakuspa parlasqantapis ch'inyachenqa. Imaynatachus mama qocha phiñarikuspa, jatunta qhollchoqeyan, ajinata awqankunaqa Babiloniaj patanman urmaykonqanku.

⁵⁶ Babiloniata chinkachej chayamunku. Soldadonkunataj jap'isqa kanqanku, flechanapaj arconkupis p'akisqa, imaraykuchus Tata Diosqa mana allinta ruwasqankumanta pagachikoj Dios kaspa, millay ruwasqankuman jina paykunaman pagaponqa.

⁵⁷ Tukuy Atiyniyoj Tata Dios sutiyoj Tukuyta Kamachej nin: Babiloniamanta kurajkunata machaykuchisaj. Jinallataj yachayniyoj runakunata, kamachina wasipi kamachejkunata, kuraj kamachejta yanapajkunata, chantá soldadonkunata ima machaykuchillasajtaj. Paykunaqa wiñaypaj puñukaponqanku mana rijch'arimuyniyojta.

⁵⁸ Babiloniaj phatu perqankuna tukuynin urmachisqa kanqanku, chay chhikachachaj punkunkunapis ruphaykuchisqa kanqanku. Chay llajtata sayarichejkunaqa mayta sayk'uspa, qhasillapaj ruwarqanku, imaraykuchus tukuy ruwasqanku ninallapi ruphasqa tukukonqa. Noqa Tukuy Atiyniyoj Tata Dios chayta nini.

Jeremiaspa sut'inchasqanta Babiloniapi willanku

⁵⁹ Judata kuraj kamachej Sedequías tawa watataña kamachishajtin, Diosmanta sut'inchaj Jeremías Neriaspa churin Maseiaspa allchhin Seraiasman ujta willacherqa. Seraiasqa kuraj kamachej Sedequiaswan Babiloniaman rishaspa, mayordomon karqa.

⁶⁰ Jeremías qaramanta p'anqapi qhelqarqa ima ñak'ariykunachus Babiloniaj patanman jamunan karqa, chaykunata. Ajinaqa Babiloniaj contranpi imachus qhatirinanqa tukuy qhelqasqa karqa.

⁶¹ Chantá Jeremías Seraiasman nerqa: Babiloniaman chayaspa, kay qhelqasqa willayta tukuypa uyarinanta jatunmanta ñawirinki.

⁶² Chantá ninki: Tata Dios, qan kay suyuta tukuchinaykita nerqanki, manaña pipis tiyakunanpaj jina, ni runakuna, nitaj animalkunapis, imaraykuchus wiñaypaj ch'in kanqa, nispa.

⁶³ Chantá kay qhelqasqata ñawiriyta tukuspañarí, uj rumiman wataykuytawankama, Éufrates mayuman wijch'uykuy, chantá niy:

⁶⁴ Babilonia ajinatamin chinkaponqa, manañataj ujtawan jatarimonqañachu, Tata Dios kay suyuman apachimunan kashan, chay ñak'ariypi urmasqanmanta, nispa. Kaykamalla Jeremiaspa sut'inchasqan karqa.