Jeremías 46 - DIOSPA QHELQACHISQAN DEUTEROCANONICALJeremías Egiptoj contranpi sut'inchan 1 Tata Dios waj suyukuna imaynachus kanankumanta Jeremiasman parlarqa. 2 Judata kuraj kamachej Josiaspa churin Joacín tawa watataña kamachishajtin, Éufrates mayu qayllapi Carquemis llajtapi Babiloniata kuraj kamachej Nabucodonosorqa Egiptota kuraj kamachej Necaojpa soldadonkunata atiparqa. Chaypacha Tata Diosqa Egiptomanta kayta nerqa: 3 Jark'akuna escudokunata oqharikuychej. Maqanakoj puririychej. 4 Caballokunata karunaykuspa, sinchaykuychej. Caballopi purejkuna, lloq'aykuychej. Monteraykichejta churakuspa, sinrulla sayaychej. Lanzaykichejta filochaychej, fierromanta pecheratataj churakuychej, nispa. 5 Jinapis imatataj rikushaniri? Paykunaqa mayta mancharikuspa kutiripunku. Aswan wapu soldadonkunaqa atipachikuspa, ch'eqeranku, qhepata mana qhawarikuspataj, usqhay usqhayta ayqeranku. Tukuynejpi mancharikuylla tiyan. Noqa Tata Diosmin chayta nini. 6 Sinch'ita t'ijurejkunapis mana ayqeyta atinkuchu. Aswan kallpayojkunapis manallataj llusp'iyta atinkuchu. Wichaynejpi Éufrates mayu qayllapi misk'akunku, urmankutaj. 7 Pitaj Nilo mayu jina wiñaykamuspa wasaykunri, sinch'i llump'irishaj mayu jinari? 8 Chayqa Egiptomin. Payqa Nilo mayupi yaku jina wiñan, sinch'ita llump'irishaj yaku jina. Egipto nin: Astawan wiñaykuspa, kay pachata p'ampaykusaj. Tukuy llajtakunata phiriykusaj, chaypi tiyakojkunatapis wañuchisaj, nispa. 9 Caballopi soldadokuna, maqanakoj phinkiykuychej. Carretapi kajkunataj, phawaykuychej. Soldadokuna, maqanakoj puririllaychejña. Etiopiamanta, Libiamantawan escudokunata oqharisqa soldadokuna, Lidiamanta kaj soldadokuna, arcowan sumajta flechayta yachajkunapis, jamuychej maqanakoj. 10 Chaymin Tukuy Atiyniyoj Tata Diospa p'unchaynin kanqa, chay p'unchaypitaj tukuy awqankunawan pagachikonqa. Espadaqa manaña atinankama t'ojsenqa, paykunaj yawarninkupitaj wayt'anqa. Tukuy Atiyniyoj Tata Dios wichaynej suyupi, Éufrates mayu qayllapi, soldadokunata wañurachenqa. 11 Sipas jina Egipto suyu, jampita mask'aspa, Galaadman wichariychej. Chaywanpis qhasi manakajllata ashkha jampita ujyanki, manataj jampisonqachu. 12 May k'umuykachachisqa kasqaykita waj suyukuna yachankuña, tukuy kay pachapitaj qhaparisqayki uyarikun. Tinkupi maqanakojkunapis ujkuna ujkunawan takanakuspa, iskayninku pampaman tuliykunku, nispa. Ajinata Tata Dios nin. Nabucodonosorqa Egiptowan maqanakoj phawaykun 13 Maypachachus Babiloniata kuraj kamachej Nabucodonosor Egiptowan maqanakoj risharqa chaypacha, Tata Diosqa Jeremiasman kay jinata nillarqataj: 14 Egipto suyupi Migdol llajtapi, Menfis llajtapipis, chantá Tafnes llajtapipis kayta willaychej: Soldadokuna, maqanakupaj wakichikuychej, imaraykuchus espadaqa muyuyniykichejpi t'ustita ruwanqa. 15 Imaraykutaj Apis sutiyoj toro lantiykichej ayqerqari? Imaraykutaj mana sayayta aterqachuri? Imaraykuchus Tata Diosmin payta urmacherqa. 16 Soldadoykikuna misk'aspa, ujkuna ujkunaj patanman urmanku, ninakunkutaj: Kaymanta jaku ripunachej, kutipunachej wasinchejman, paqarikusqanchej, chay llajtaman. Sinch'i maqanakumanta ayqenachej, nispa. 17 Chaypacha wakin nenqanku: Egiptota kuraj kamachej faraonqa ch'ajwallan, nitaj imatapis ruwayta atinchu, nispa. 18 Tukuy Atiyniyoj Tata Dios sutiyoj Tukuyta Kamachejrí nin: Sutiyrayku tiluspa, nini: Tabor orqo jina, tukuy orqokunamanta aswan jatun kaj, Carmelo orqo jinataj mama qocha kantupi may pataman oqharisqa, ajinamin, pichus jamushan, chay awqaqa. 19 Wakichikuychej, Egiptopi tukuy tiyakojkuna, suyuykichejmanta apasqa kanaykichejpaj. Menfis llajtaqa ch'inman tukuchisqa kanqa ni pi tiyakunanpaj jina. Raqayllamanña tukuchisqa kanqa. 20 Egiptoqa ima munay terneraman rijch'akun. Wichaynejmantatajrí uj jatun khanikoj ch'uspi jamuspa, payta khanenqa. 21 Mink'asqa soldadonkunapis waka uña jina wirayasqa kanku, paykunapis usqhay usqhayllata mana sayarispa ayqenqanku. Atipasqa kanankoqa chayamunña, chay p'unchaypitaj jasut'isqa kanqanku. 22 Egiptoqa katari jina silbashaj ayqenqa, Babiloniamanta soldadokuna qayllaykamojtinkukama. Sach'ata k'utojkunapis kankuman jina jacha oqharisqa Egiptoj contranta jamonqanku. 23 Egiptopi tiyakojkunata sach'ata jina k'utonqanku. Ajinata Tata Dios nin. Babiloniamanta soldadokunaqa phinki phinkikunamantapis aswan ashkha kanku, manataj pipis paykunata yupayta atinchu. 24 Ajinamanta may k'achitu Egiptoqa k'umuykuchisqa kanqa. Wichaynejmanta jamoj soldadokunaj makinkumantaj jaywaykusqa kanqa, nispa. 25 Israelpa Tukuy Atiyniyoj Tata Diosnin nin: Tebaspa diosnin Amonta, Egiptojta tukuy dioskunantinta, kuraj kamachejninkunatapis jasut'isaj, jinallataj faraonta, paypi tukuy atinikojkunatapis. 26 Noqaqa paykunataqa Babiloniata kuraj kamachej Nabucodonosorpa makinman jaywaykusaj, jinallataj soldadonkunata kamachejkunaj makinkumanpis jaywaykullasajtaj. Chaywanpis Egiptopi aswan qhepanejman ñawpajpi jina runakuna tiyakullanqankutaj. Noqa Tata Diosmin chayta nini. Tata Diosqa ayllunta kacharichenqa ( Jer 30.10-11 ) 27 Kamachiy Jacob, ama mancharikuychu. Israelníy, ama llawch'iyaychu. Qanwan, wawaykikunawanpis karu suyuman apasqa karqankichej. Noqatajrí chaymanta pusakampusqaykichej. Watej ni pejpa mancharichisqan allinta kawsakunki. 28 Noqa Tata Diosmin kayta nini: Ama manchachikuychu, Jacobpa ayllun, imaraykuchus noqa qanwan kashani. Maykunamanchus ch'eqeracherqayki, chay tukuy suyukunata phirisaj. Jinapis qantaqa mana chinkachisqaykichu, manachayqa mana allinta ruwasqaykiman jina jasut'ispa, cheqan ñanman churasqayki. Qanqa jasut'isqapuni kanayki tiyan. Noqa Tata Diosmin chayta nini. |
Revisión Biblia Quechua Boliviano © Sociedad Bíblica Boliviana, 2017.
Bolivian Bible Society