Jeremías 44 - DIOSPA QHELQACHISQAN DEUTEROCANONICAL

Jeremías Egiptopi tiyakoj judiokunata k'amin

¹ Tata Diosqa Jeremiasman kayta willarqa Egipto suyupi tiyakoj judío runakunaman sut'inchananpaj. Paykuna tiyakusharqanku Migdolpi, Tafnespi, Menfispi, Patros llajtapi ima:

² Israelpa Tukuy Atiyniyoj Tata Diosnin kay jinata nin: Qankuna rikorqankichej noqa tukuy ñak'ariykunata Jerusalén llajtaj contranta kachaykamusqayta, jinataj Judá suyupi kaj llajtakunamanpis. Kunan chay llajtakuna raqayllaña kashanku, manataj pipis chaykunapi tiyakunñachu.

³ Chay karqa paykuna mana allinta ruwasqankurayku. Paykunaqa waj dioskunata yupaychaspa, inciensota q'oshñichispa ima phiñachiwarqanku, mayqenkunatachus mana ñawpa tataykichejkuna nitaj qankunapis rejserqankichejchu, chay lantikunaman.

⁴ Noqaqa kutin kutinta kamachiykuna sut'inchajkunata paykunaman kacharqani, kay jinata ninankupaj: Imatachus Tata Dios millachikun, chayta amañapuni ruwaychejchu, nispa.

⁵ Paykunatajrí nisqayta mana ruwarqankuchu, nitaj kasuwarqankuchu. Millay ruwanankuta saqenankutaqa, inciensota waj dioskunaman q'oshñichillarqankupuni.

⁶ Chayrayku k'araj phiñakuyneyqa nina jina lawrarispa, Judapi llajtakunata, Jerusalenpi callekunata ima ruphaykorqa. Chaykunataj kunan p'unchaykama ch'inpacha raqaykunallaña qhepakunku, nispa.

⁷ Kunanqa Israelpa Tukuy Atiyniyoj Tata Diosnin nisunkichej: Imaraykutaj jatun llakiyta qankunallataj mask'akunkichejri? Imaraykutaj Judá suyumanta qharikuna, warmikuna, wawakuna, ñuñoj wawakuna ima ni uj puchuyoj chinkanankuta munankichejri?

⁸ Imaraykutaj millayta ruwasqaykichejwan phiñachiwankichej, Egiptopi kay waj dioskunaman inciensota q'oshñichispari? Chayta ruwaspaqa, qankunapis chinkachisqa kanallaykichejpajtaj mask'akushankichej. Chay kajtin, tukuypa rikunanta maldicisqa kankichej, tukuy suyu ukhupitaj k'umuykachachisqa kankichej.

⁹ Ñawpa tataykichejkunaj tukuy millay ruwasqankuta qonqapunkichejñachu? Judata kuraj kamachejkuna, chantá qoyankupis mana allin ruwasqankuta, jinallataj qankuna, warmiykichejpis tukuy Judá suyupi, jinataj Jerusalenpa callenkunapipis millay ruwasqaykichejta qonqapunkichejñachu?

¹⁰ Kunankama qankunaqa mana k'umuykunkichejchu, nitaj noqata may jatun respetowan qhawawankichejchu. Nillataj nisqayta, kamachisqayta ima junt'ankichejchu, mayqenkunatachus qankunaman, jinataj ñawpa tataykichejkunamanpis qorqani, chaykunata.

¹¹ Chayrayku noqa Israelpa Tukuy Atiyniyoj Tata Diosnin niykichej: Qankunaj pataykichejman jatun llakiyta kachaykamuspa, Judapi tukuy runata chinkarparichisaj.

¹² Judamanta puchojkuna, pikunachus Egiptoman tiyakapoj ripuyta munarqankupuni, chaykuna Egipto suyupi espadawan chayrí yarqhaywan wañuchisqa kanqanku. Tukuyninku juch'uymanta, jatunkama wañuchisqa kanqanku maqanakupi, chayrí yarqhaywan, tukuypa rikunantataj maldicisqa, t'ukunapaj jina, may k'umuykachachisqataj kanqanku.

¹³ Noqaqa Egiptopi tiyakoj Judá suyumanta kajkunata jasut'isaj, imaynatachus Jerusalenta maqanakuwan, yarqhaywan, onqoywan ima jasut'erqani, ajinata.

¹⁴ Judiokunamanta Egiptoman tiyakapoj ripojkunamanta mana ujllapis wañunamanta llusp'enqachu. Judá suyuman kutipuyta munashaspapis, manapuni kutiponqankuchu, manachayqa ripojkunamanta uj mashkhalla kutenqanku, nispa.

¹⁵ Chantá tukuy warmi, tukuy qhariwan ima, pikunachus yacharqanku warminku inciensota waj dioskunaman q'oshñichisqankuta, chaykuna, pikunatajchus Egiptopi Patros chaynejpi tiyakojkuna ima tantaykukuspa, Jeremiasman kuticherqanku:

¹⁶ Tata Diospa sutinpi niwasqaykuta mana kasusqaykuchu.

¹⁷ Manachayqa ruwallasqaykupuni, imatachus ruwanaykuta nerqayku, chayta. Inciensota q'oshñichillasqaykupuni, vinotapis ch'allasqayku Janaj Pachaj Qoyan nisqa diosman, imaynatachus kunankama kuraj kamachejniyku, noqayku, ñawpa tatayku ima ruwarqayku, ajinata. Judá llajtakunapi, jinallataj Jerusalenpa callenkunapipis Janaj Pachaj Qoyan nisqa diosman inciensota q'oshñichillarqaykupuni, imaynachus ñawpa tataykukuna ruwarqanku, ajinata. Chaypacha chayta ruwasqaykurayku ñawpajta ashkha mikhuna tiyapuwaj kayku, atipachikunaykupaj jina. Tukuy imapi allin riwaj kayku, manataj ima ñak'ariypis noqaykuta qhatiriwajchu kayku.

¹⁸ Chaywanpis maypachachus inciensota, vinota ima Janaj Pachaj Qoyanman jaywayta saqerqayku, chaymantapacha tukuy ima pisiwayku, wakintaj yarqhaywan, chayrí maqanakupi wañuranku, nispa.

¹⁹ Warmikunapis nillarqankutaj: Noqaykoqa Janaj Pachaj Qoyanpa sutinpi payman rijch'akojta t'antata ruwaj kayku. Inciensotapis q'oshñichej kayku, vinowantaj ch'allaykoj kayku. Chay tukuytaqa qosaykoj yachasqan ruwaj kayku, nispa.

²⁰ Chantá Jeremías chay qharikunaman, warmikunaman ima imatachus nisqankuman kay jinata kuticherqa:

²¹ Qankuna yuyankichejchu kay tukuyta Tata Dios mana yachasqanta? Yuyallankichejtajchu payqa Judá suyupi Jerusalenpa callenkunapi ñawpa tataykichejkuna, kuraj kamachejkuna, kurajniykichejkuna, jinataj tukuy runakuna ima inciensota waj dioskunaman q'oshñichisqaykichejmanta qonqapusqanta?

²² Tata Diosqa manañapuni chay millay ruwasqaykichejta awantarqachu. Chayraykumin qankunaj llajtaykichejqa ch'inyachisqa kashan, mana runayoj, t'ukunapaj jina maldicisqataj.

²³ Kay llakiypi ñak'areyqa waj dioskunaman inciensota q'oshñichisqaykichejrayku qhatirisunkichej, imaraykuchus qankuna Tata Diospa nisqanta, chantá kamachisqanta ima mana kasorqankichejchu, nispa.

²⁴ Chantá Jeremías tukuy runaman, astawanqa warmikunaman nillarqataj: Judamanta Egipto suyupi tiyakojkuna, Tata Diospa nisqanta uyariychej:

²⁵ Israelpa Tukuy Atiyniyoj Tata Diosnin nisunkichej: Qankuna, warmiykichejpis imatachus nisqaykichejta ruwarqankichej: Noqayku tiluspa imatachus nisqaykuta junt'asqaykupuni, Janaj Pachaj Qoyanman inciensota q'oshñichispa, paypa sutinpitaj ch'allaykurispa ima, nispa. Kunanqa imatachus nisqaykichejta junt'allaychej, tilusqaykichejman jinataj ruwallaychej.

²⁶ Chaywanpis Egiptopi tiyakoj Judamanta kajkuna, tukuyniykichej noqa Tata Diospa nisqayta uyariychej: Jatun sutiyrayku kayta tiluni: Judamanta Egiptopi tiyakojkuna manaña ujtawan sutiyta oqharenqankuchu, Diosninkupaj rejsikapuwaspa, nitaj tilonqankuchu: Tukuyta Kamachej Tata Diospa sutinrayku tiluni, nispaqa.

²⁷ Noqataj paykunata waqaychanaytaqa, ñak'ariykunata paykunaman kachaykusaj, manataj allin kajtachu. Judamanta Egiptopi tukuy tiyakushajkuna maqanakupi wañonqanku, chayrí yarqhaywan tukuchisqa kanqanku.

²⁸ Pisi runakunalla wañunamanta llusp'enqanku, chay puchojkunallataj Egiptomanta Judá suyuman kutiponqanku. Ajinamanta Judamanta tiyakoj ripojkunaqa yachanqanku pejpa nisqanchus junt'akunanta, noqajtachus, chayrí paykunajtachus.

²⁹ Noqa Tata Dios qankunaman kay señalta qosqaykichej yachanaykichejpaj kay tukuy nisqayta junt'anaytapuni, kay suyupi qankunata jasut'inaytapis.

³⁰ Noqa jaywaykusaj Egiptomanta kuraj kamachej Jofra sutiyoj faraonta, pikunachus payta wañuchiyta munanku, chaykunaj makinkuman. Imaynatachus noqa Judata kuraj kamachej Sedequiasta Babiloniata kuraj kamachej Nabucodonosorman jaywaykorqani, ajinallatataj faraonta jaywaykusaj pichus wañuchiyta munajman, nispa.