Jeremías 41 - DIOSPA QHELQACHISQAN DEUTEROCANONICAL

Gedaliasta wañuchinku

¹ Chay wata qanchis kaj killapi, kuraj kamachejpa ayllunmanta Netaniaspa churin Elisamaj allchhin Ismael chunka runakunatawan pusarikuspa, Mispá llajtaman Ajicanpa churin Gedaliaswan parlaj rerqa. Chaywanpis Mispá llajtapi khuska mikhushajtinku,

² Netaniaspa churin Ismael, jinataj paywan kasharqanku, chay chunka runakunapiwan sayarispa, espadawan Safanpa allchhin Ajicanpa churin Gedaliasta wañucherqanku. Babiloniata kuraj kamachejqa Gedaliasta churasqa Judá suyuta kamachinanpaj.

³ Chaypacha Ismaelqa, pikunachus Gedaliaswan kasharqanku, chay tukuy judiokunatapis wañuchillarqataj, jinataj Mispapi kasharqanku Caldeamanta soldadokunatawan ima.

⁴ Gedaliasta wañuchisqankumanta q'ayantin, manaraj pipis chaymanta yachashajtin,

⁵ pusaj chunka runakuna Sichemmanta, Silomanta, Samariamantawan chayamorqanku. Paykuna sunkhanku q'arasqa, p'achanku llik'isqa, chantá ukhunkupis khuchurasqa jamorqanku. Chayta paykuna kikinku khuchurakusqanku. Jinallatataj chajra poqoykunata jaywanankupaj, inciensota ima Tata Diospa Templonpi q'oshñichinankupaj apamusharqanku.

⁶ Chaypacha Netaniaspa churin Ismael Mispamanta paykunawan tinkukoj llojserqa, waqaspataj nerqa: Jamuychej, Ajicanpa churin Gedaliasta imachus qhatirisqanta rikunkichej, nispa.

⁷ Chaywanpis chay runakuna llajtaman yaykojtinkukama, Netaniaspa churin Ismaelwan, runankunapiwan chay runakunata wañurparicherqanku, jinaspataj, uj ch'aki pujyuman ayankuta wijch'uykorqanku.

⁸ Chaywanpis manaraj tukuyninkuta wañuchishajtinku, chaykunamanta chunka runakuna Ismaelta nerqanku: Ama wañuchiwaykuchu. Noqaykojta tiyapuwayku trigoyku, cebadayku, aceiteyku, jinataj abeja misk'iyku ima campopi pakasqa, nispa. Ajinata nisqankurayku Ismael mana paykunata wañucherqachu chay ujkunata jinaqa.

⁹ Netaniaspa churin Ismael Gedaliaswan khuska wañurachisqan chay runakunaj ayankuta maymanchus wijch'uykusqanku, chay pujyoqa jatunmin karqa. Chay pujyutaqa kuraj kamachej Asa allachisqa, Israelmanta kuraj kamachej Basanwan maqanakupi kashajtinku jark'akunanpaj. Jinapis Ismaelqa wañuchisqan runakunaj ayankuwan chay pujyuman junt'aykucherqa.

¹⁰ Chay jawa Netaniaspa churin Ismael kuraj kamachejpa ususinkunata jap'erqa, jinallataj Mispapi qhepakorqankuraj, chay runakunatapis, pikunatachus soldadokunata kamachej Nabuzaradán Ajicanpa churin Gedaliaspa makinman churasqa, chaykunata. Ismael paykunata jap'iytawantaj, paykuna pusarisqa Amón suyuman chimpananpaj purirerqa.

¹¹ Aswan qhepanejman Careajpa churin Johanán, jinataj paywan kasharqanku, chay soldadokunata kamachejkuna ima uyarerqanku Netaniaspa churin Ismael imaynatachus chay runakunata wañuchisqanta.

¹² Chantá Johanán soldadonkunata tantaykuspa, Netaniaspa churin Ismaelpa contranpi maqanakoj rerqa. Chantá Gabaonpi mama qocha chaypi paykunata tariparqanku.

¹³ Ismael pikunatachus mana munashajta apasharqa, chaykuna Careajpa churin Johananta, jinataj soldadokuna ukhupi kamachejkunatawan paywan khuska jamushajta rikuspa, mayta kusikorqanku.

¹⁴ Chantá pikunachus Ismael Mispamanta apasqa kajkuna Careajpa churin Johananman k'askaporqanku.

¹⁵ Netaniaspa churin Ismaeltajrí, pusaj soldadonkunapiwan Johananmanta ayqespa, amonitakunaj suyunkuman riporqanku.

¹⁶ Chantá Careaj churin Johanán, paywan risharqanku, chay kurajkunapiwan soldadokunata, warmikunata, wawakunata, jinataj kurajkunatawan pusakamporqanku. Pikunatachus Netaniaspa churin Ismael Ajicanpa churin Gedaliasta wañuchiytawankama Mispamanta apasharqa, chaykunata Johanán watej Gabaonmantapacha kutichimorqa.

¹⁷ Jinamanta ripuytawan, Belén qayllapi, Guerut Quimán nisqa cheqapi pisi tiempota tiyakorqanku. Chaymantataj Egiptoman ripunankupaj wakichikorqanku.

¹⁸ Ajinata Caldeo soldadokunamanta ayqeyta yuyarqanku, imaraykuchus manchachikorqanku imatachus Babiloniata kuraj kamachej ruwananta Netaniaspa churin Ismaelqa Ajicanpa churin Gedaliasta wañuchisqanmanta. Kikin Babiloniata kuraj kamachejmin Gedaliasta churasqa Judapi kamachej kananpaj.