Jeremías 40 - DIOSPA QHELQACHISQAN DEUTEROCANONICAL

Jeremiasqa Gedaliaswan tiyakun

¹ Tata Diosqa Jeremiasman parlallarqataj, caldeo soldadokunata kamachej Nabuzaradán Ramá llajtapi Jeremiasta kacharipusqanmanta qhepaman. Nabuzaradanqa Jeremiasta cadenawan watasqata taripasqa, Jerusalenmanta, jinataj Judamantapis pikunachus Babiloniaman apasqa kanankupaj ajllasqa karqanku, chaykuna ukhupi.

² Chantá Nabuzaradanqa Jeremiasta sapanpi kay jinata nerqa: Diosniyki Tata Dios kay suyuman ñak'ariykunata kachaykamunanta nerqa.

³ Kunantaj chay nisqan junt'akun. Chaykuna qankunata qhatirisunkichej Tata Diospa contranpi juchallisqaykichejrayku, mana kasusqaykichejraykutaj.

⁴ Chaywanpis kunanpacha watasqa kashanki, chay cadenata phaskarasqayki. Chantá sichus noqawan Babiloniaman riyta munanki chayqa, jaku rina. Noqataj qanta yanapasqayki. Mana riyta munanki chayrí, qhepakullay. Maypichá munanki tiyakuyta, chayman rillay.

⁵ Sichus qhepakuyta munanki chayqa, kutipullay Safanpa allchhin Ajicanpa churin Gedaliaspaman. Babiloniata kuraj kamachejqa paytamin Judá suyupi kamachinanpaj churarqa. Paywan llajta masiykikuna ukhupi tiyakuy. Maymanchus allin rijch'asunki, chayman rillay, nispa. Chaymantataj payqa Jeremiasman uj t'inkata qoytawan, chantá mikhunatawan churaykapuspa, kacharpayarqa.

⁶ Jinapi Jeremiasqa Mispá llajtaman Ajicanpa churin Gedaliaspaman riporqa, paywantaj chay llajtapi tiyakorqa, pikunachus Judapi qhepakorqanku, chay llajta masinkunawan khuska.

Gedaliasta wañuchinankupaj yachachinakunku

⁷ Campopi judío soldadokunata kamachejkuna, chantá soldadonkuna ima uyarerqanku Babiloniata kuraj kamachejqa Ajicanpa churin Gedaliasta Judá suyuta kamachinanpaj churasqanta. Nabucodonosor payta churasqa qharikunata, warmikunata, wawakunata ima qhawananpaj, pikunachus mana Babiloniaman apasqachu karqanku wajcha kasqankurayku, chaykunata.

⁸ Chantá judío soldadokunaqa Mispapi Gedaliaswan parlaj rerqanku. Paykuna ukhupi kasharqanku Netaniaspa churin Ismael, Careajpa churinkuna Johanán, Jonatán, chantá Tanjumetpa churin Seraías, Netofamanta Efaypa churinkuna, jinataj Macamanta uj runaj churin Jezaniaspiwan, jinataj tukuy soldadonkuwan ima.

⁹ Chantá Ajicanpa churin Gedalías tiluspa, paykunata nerqa: Caldeokunaj kamachiyninpi kayta ama manchachikuychejchu. Qhepakuychej kay llajtaykichejpi. Sichus Babiloniamanta kuraj kamachejta kasunkichej chayqa, allin risonqachej.

¹⁰ Noqaqa Mispapi qhepakusaj, caldeokuna kayman jamojtinku qankunarayku parlarinaypaj. Qankunatajrí vinota, aceiteta, poqoykunata ima tantaspa, jallch'akuychej. Jinamanta jap'isqaykichej llajtakunapi tiyakuyta atinkichej, nispa.

¹¹ Ajinallatataj judiokuna, pikunachus Moabpi, Amonpi, Edompi, chay waj suyukunapipis kasharqanku, chaykunapis yachallarqankutaj Babiloniata kuraj kamachejqa judiokunamanta wakinta llajtankupi saqesqanta. Yachallarqankutaj Ajicanpa churin Gedaliasta kamachejninku kananpaj churasqanta.

¹² Chayta yachaspa, maymanchus ch'eqerachisqa karqanku, chaymanta Judaman kutispa, Mispapi Gedaliasman rerqanku. Chaymantataj paykunaqa ashkha vinota ruwarqanku, jinataj may chhika poqoykunata oqharerqanku.

¹³ Chaymanta qhepamanrí Careajpa churin Johananwan, pikunachus campopi qhepakusqanku soldadokunata kamachejkunapiwan ima Mispaman Gedaliaswan parlaj rerqanku.

¹⁴ Paytataj nerqanku: Manachu yachanki Amonta kuraj kamachej Baalisqa Netaniaspa churin Ismaelta qanta wañuchinasunpaj kachamusqanta? nispa. Ajicanpa churin Gedaliastajrí mana kasuta ruwarqachu.

¹⁵ Chaypacha Careaj churin Johanán Mispapi Gedaliasman pakayllapi nerqa: Noqa rispa, Netaniaspa churin Ismaelta wañurparichimusaj, manataj pipis yachanqachu pichus wañuchisqanta. Imaraykutaj saqeykuman pay qanta wañuchinasuntari? Wañuchisunkumanchus chayqa, Judá suyumanta qanman jamusojkuna ch'eqerachisqa kankuman, Judamanta puchoj runakunapis chinkankuman, nispa.

¹⁶ Ajicanpa churin Gedaliastajrí Careaj churin Johananman kuticherqa: Ama chayta ruwaychu. Ismaelmanta imatachus nisqaykeqa manamin jinachu, nispa.