Jeremías 34 - DIOSPA QHELQACHISQAN DEUTEROCANONICAL

Jeremías kuraj kamachej Sedequiasta k'amin

¹ Babiloniaj kuraj kamachejnin Nabucodonosor tukuy soldadonwan, jinataj paypa kamachiyninpi kaj suyukunamanta tukuy soldadokuna ima Jerusalenpa contranta maqanakusharqanku, chantá chay muyuyninpi llajtakunaj contranta ima. Chaypacha Tata Dios Jeremiasta nerqa:

² Noqa Israelpa Tata Diosnin Judata kuraj kamachej Sedequiasman rispa, kayta ninaykita kamachiyki: Kay jinata Tata Dios nin: Kay llajtata Babiloniaj kuraj kamachejninpa makinman jaywaykusaj, paytaj ninawan kanaykonqa.

³ Qanqa makinmanta mana llusp'iyta atinkichu, manachayqa jap'isonqanku, paymantaj jaywaykusonqanku. Chantá paypa ñawpaqenman apasqa kasqaykimanta, Babiloniamanñataj apasqa kanki.

⁴ Chaywanpis uyariy Judá suyuta kuraj kamachej Sedequías, allinta uyariway noqa Tata Dios imatachus nisusqayta: Mana espadawanchu wañunki.

⁵ Allin wañuyta wañupunki, ayaykita p'ampashajtinkutaj, inciensota q'oshñichenqanku. Ajinata ruwanqanku, imaynatachus qanmanta ñawpaj kuraj kamachejkunata p'ampashaspa inciensota q'oshñicherqanku, ajinata. Qanmanta waqaspataj, nenqanku: Ay, kuraj kamachiwajninchej wañupun, nispa. Noqa Tata Diosmin chayta nini.

⁶ Chantá Diosmanta sut'inchaj Jeremías chay tukuyta Jerusalenpi kuraj kamachej Sedequiasman willarqa.

⁷ Chaykamataj Babiloniata kuraj kamachejpa soldadonkuna Jerusalenpa contranta maqanakusharqanku, jinallataj Laquis llajtaj contranta, Azeca llajtaj contranta ima. Chaykunalla Judamanta jark'achasqa llajtakunamanta qhepakojkuna kasharqanku.

Trato ruwasqankuta p'akinku

⁸ Kuraj kamachej Sedequías Jerusalenpi tukuy tiyakojkunawan tratota ruwarqa, paykuna wata runankukunata kacharipunankupaj. Chay qhepatarí Tata Diosqa Jeremiasman parlarqa.

⁹ Chay trato ruwasqa karqa llajta masinku hebreokunamanta wata runa qharita, warmita kacharipunankupaj, llajta masinku judiokunamanta ni pita wata runata jina jap'inankupaj.

¹⁰ Chantá tukuy kurajkuna, tukuy runapis tratota junt'anankuta nerqanku. Chay tratota ruwasqankuta kasuspataj, judío masinkumanta wata runankukunata kachariporqanku, amaña ujtawan wata runa kanankupaj.

¹¹ Aswan qhepamanrí llajta masinkukunamanta wata runankuta kacharisqankumanta sonqonkuta nanachikuspa, watej wata runankupaj jap'ikapullarqankutaj.

¹² Chayrayku Tata Dios Jeremiasman nerqa:

¹³ Noqa Tata Dios, Israelpa Diosnin ñawpa tataykichejkunawan uj tratota ruwarqani, maypachachus Egiptopi wata runa kashajtinku paykunata orqhomorqani, chaypacha.

¹⁴ Noqa paykunata kamacherqani sapa qanchis watamanta kacharipunankuta, mayqen llajta masinkuchus paykunaman vendekuspa, sojta watataña kamachinkupi karqanku, chaykunata. Jinapis ñawpa tataykichejqa mana kasuwarqankuchu, nitaj nisqayta ruwarqankuchu.

¹⁵ Chantá qankunaqa mana allinta ruwasqaykichejmanta noqaman kutirikuspa, ñawpaqeypi imachus allin kajta ruwarqankichej sapa ujniykichej llajta masiykichejta kacharipunaykichejpaj. Chay tratota noqata yupaychana Templopi ruwarqankichej.

¹⁶ Chaywanpis qhepaman kutirispa, sutiyta sarorqankichej. Kachariporqankichej, chay runakunata munajta mana munajta watej wata runa kanankupaj jap'ikapullankichejtaj.

¹⁷ Chayrayku noqa Tata Dios nini: Qankunaqa llajta masiykichej wata runata mana kacharipuspaqa, mana kasuwarqankichejchu. Chayraykumari kunan noqapis maqanakuta, onqoyta, yarqhayta ima qankunaman kachaykamusqaykichej, tukuy kay pachapi kaj suyukuna t'ukunankupaj jina, nispa.

^18-19 Tata Dios nillantaj: Judamanta kurajkuna, jinataj Jerusalenmanta kajkunapis kamachina wasipi kamachejkunawan khuska, sacerdotekuna, tukuy chaypi tiyakojkunapis ñawpaqeypi uj tratota ruwarqanku: Uj waka uñata ñak'aspa, khuskanninmanta iskayman t'aqarqanku, chantá iskayman t'aqasqa chawpitataj pasarqanku. Chaywanpis trato ruwasqankuta p'akispa, mana junt'arqankuchu.

²⁰ Chayrayku paykunata wañuchiyta munaj awqankoj makinkuman jaywaykusaj. Ayankutataj suwintukuna, jinataj k'ita animalkuna ima mikhonqanku.

²¹ Jinallataj Judata kuraj kamachej Sedequiasta, payta yanapajkunatawan Babiloniata kuraj kamachejpa soldadonkunaj makinkuman jaywaykusaj. Chay soldadokunaqa kunan ithirikuspa, maqanakuyta saqenku.

²² Chaywanpis noqa kutirimunankuta kamachisaj. Paykunataj kutimuspa, kay llajtaj contranta maqanakonqanku jap'inankukama. Chantá ninata jap'iykuchispa, Judamanta qhepakoj llajtakunatapis raqayllataña saqenqanku, ni uj runayojta. Noqa Tata Diosmin chayta nini.