Jeremías 31 - DIOSPA QHELQACHISQAN DEUTEROCANONICAL

Israelitakuna suyunkuman kutimponqanku

¹ Tata Dios nin: Maypachachus Babiloniamanta kutimponqanku chay p'unchaypi noqa tukuy israelitakunaj Diosninku kasaj, paykunataj aylluy kanqanku, nispa.

² Tata Dios nillantaj: Pikunachus maqanakupi wañunamanta llusp'ejkunata ch'innejpi khuyakorqani, Israel ayllukuna samarikuyta mask'ashajtinku, nispa.

³ Unay Tata Diosqa Israelta nerqa: Noqa mana jayk'aj tukukoj munakuywan munakorqayki. Chayrayku khuyakuynillaywanpuni qanta qhawasqayki.

⁴ Munasqa Israel ayllúy, watej oqharisqayki, sayarichisqataj kanki. Watej panderetata oqharispa, kusiywan tusurinki.

⁵ Samaria orqokunapi watej uva huertata mallkinkichej. Pichus uva mallkejtaj poqoyninta mikhullanqataj.

⁶ Uj p'unchay chayamonqa, chay p'unchaypitaj llajtata qhawajkuna Efrainpa orqonkunapi qhaparenqanku: Jamuychej, Sión orqoman jaku rinachej Tata Diosninchejta yupaychaj, nispa.

⁷ Tata Dios nin: Jacobpa ayllunrayku kusikuspa takiychej. Munasqa suyurayku kusiywan qhapariychej. Yupaychaspa, kay jinata niychej: Tata Diosqa ayllunta kacharichin, Israelmanta puchojkunatataj kacharichin, nispa.

⁸ Noqa paykunata wichaynej suyumanta kutichimusaj, jinallataj kay pachaj tukuy k'uchunmantapacha paykunata tantaykullasajtaj. Paykunawan lerq'okuna, wist'u chakiyojkuna, wijsallisqa warmikuna, onqokoj warmikuna ima jamonqanku. Manchay ashkhapuni kutimonqanku.

⁹ Waqarikuspa, chantá noqamanta mañarikuspa ima kutimponqanku. Noqa paykunata yakuyoj mayoj kantunta pusaykachasaj, cheqan sumaj ñannintataj, ama misk'akunankupaj, imaraykuchus noqamin Israelpa tatan kani, Efraintaj kuraj kaj waway, nispa.

¹⁰ Suyukuna, Tata Diospa nisqanta uyariychej. Mama qochaj karu kantunkunapi kayta willaramuychej: Tata Diosqa Israel ayllunta ch'eqeracherqa. Jinapis payllataj paykunata tantaykamonqa, waqaychanqataj. Imaynatachus michej ovejankunata michin, ajinata paykunata waqaychanqa, nispa.

¹¹ Tata Diosmin preciota pagaspa, Jacobpa ayllunta kacharicherqa paykunamanta aswan atiyniyoj suyukunamanta, nispa.

¹² Tata Dios nillantaj: Chantá jamuspa, paykuna Sión orqo patapi kusiywan takenqanku. Noqa Tata Dios kay imakunawan paykunata saminchasqayrayku kusikonqanku: Trigowan, vinowan, aceitewan, ovejakunawan, wakakunawan ima. Paykunaqa sumaj qarpasqa huerta jina kanqanku, manañataj kallpankupis pisiyanqachu.

¹³ Chaypacha sipaskunaqa kusiymanta tusurenqanku, jinallataj waynakuna, machu runakunapis. Chantá noqaqa waqayninkuta kusiyman tukuchisaj. Llakikuyninkumantataj sonqochaspa, paykunata kusichisaj.

¹⁴ Sacerdotekunamanpis allin mikhunata mikhuchisaj, aylluytataj chhika patapi kawsarichisaj, ashkha allin imakunata qosqaywan. Ajinata noqa Tata Dios nini.

¹⁵ Tata Dios nillantaj: Ramá llajtapi qhaparisqanku uyarikun, sonqo nanayta jik'un jik'un waqasqanku uyarikun. Raquel wawankunamanta waqashan, manataj sonqochasqa kayta munanchu, imaraykuchus wawankunaqa wañusqaña kanku, nispa.

¹⁶ Tata Dios nillantaj: Raquel, amaña astawan waqaychu. Waqayniykita pichakuy, wawaykikunarayku ruwasqaykimantaqa t'inkayki kanqapuni. Wawaykikunaqa awqankoj suyunmanta kutimponqanku. Noqa Tata Diosmin chayta nini.

¹⁷ Jamoj watapi suyanayki tiyanraj: Wawaykikuna llajtankuman kutimponqankupuni. Noqa Tata Diosmin chayta nini.

¹⁸ Efraín aylloj kay jina waqasqanta uyarini: Noqaqa mana amansasqa torillo jina karqani. Jinapis qan kasukuyta yachachiwarqanki. Qanman kutirichiway, noqataj qanman kutirikamusqayki, imaraykuchus qanmin Diosniy Tata Dios kanki.

¹⁹ Noqa qanmanta karunchakorqani. Chaywanpis juchallisqayta rejsikapuspa, watej qanman kutirikamuni. Qhasqoyta takakuspa, p'enqasqa k'umuykuni, wayna kashaspa juchallisqayrayku, nispa.

²⁰ Noqapaj Efrainqa munasqa waway, aswan munasqa kaj churiy. Payta kutin kutinta k'amini chaypis, manapuni paymantaqa qonqapunichu. Sonqoypis wawayan, maytataj paymanta khuyakuni. Ajinata noqa Tata Dios nini.

²¹ Munasqa Israel ayllúy, risqayki ñanta señalakuy. Allinta qhawarikuy purisqayki ñankunata watej tarikapunaykipaj. Kutimpuy munasqay sipas Israel, llajtaykikunaman kutimpuy.

²² Mayk'ajkamataj mana kasukoj sipas jina kayman jaqayman purinkiri? Noqa Tata Diosrí, kay pachapi mana jayk'aj rikusqaykichejta ruwani: Warmeqa qharita muyupayanqa, nispa.

Qhepanejman Israel suyuta allin renqa

²³ Israelpa Tukuy Atiyniyoj Tata Diosnin kayta nin: Waj suyuman apasqa kasqankumanta paykunata kutichimojtiy, Judá suyu ujtawan paykunaj jallp'ankupi, llajtankupi ima tiyakonqankuña. Chantá nenqanku: Tata Dios saminchachun Diospaj t'aqasqa llajtata, jinallataj Diospa Templonta, maypichus justicia ruwakun, chayta, nispa.

²⁴ Judá suyoj llajtankunapi runakuna tiyakonqanku, tukuy llank'ajkuna, ovejakunata michejkuna ima.

²⁵ Yarqhasqa kajkunaman mikhuchisaj, yakumanta ch'akisqakunamantaj yakuta ujyachisaj, nispa.

²⁶ Jinallapi rijch'arispa, ñawiyta kicharerqani, chantá cuentata qokorqani mosqokusqay manchay k'achitu kasqanta.

²⁷ Tata Dios nillarqataj: Qhepanejman Israelpi, Judapipis runakunata ashkha mirachisaj, jinallataj uywankukunatapis.

²⁸ Noqa kikiy paykunata t'irarqani, urmacherqani, atiparqanitaj, phirerqanitaj, chantá ima llakiytapis paykunaman kachaykamorqani. Ajinallatataj allinta ruwasaj paykunata sayarichinaypaj, mallkinaypaj ima. Noqa Tata Diosmin chayta nini.

²⁹ Chay p'unchaypi manaña ninakonqankuchu: Tatakunaqa mikhusqanku k'allku uvata, wawankukunarí kirunkuta khipichikusqanku, nispa.

³⁰ Manachayqa pikunachari k'allku uvata mikhojkunalla kirunkuta khipichikonqanku. Sapa ujpis juchanrayku wañonqa, nispa.

³¹ Tata Dios nillantaj: Uj p'unchay chayamonqa, chay p'unchaypitaj noqaqa Israelwan, Judawan ima mosoj tratota ruwasaj.

³² Chay mosoj tratoqa mana ñawpa tatankuwan ruwarqani jinachu kanqa. Chay tratota paykunawan ruwarqani, maypachachus Egiptomanta paykunata orqhomorqani makinkumanta jap'ispa, chaypacha. Chaywanpis noqa qosanku jina kashajtiypis, paykunaqa trato ruwasqayta mana junt'arqankuchu. Noqa Tata Diosmin chayta nini.

³³ Aswan qhepamanrí Israelwan tratota ruwasaj, chay tratotaj kay jina kanqa: Kamachisqayta yuyayninkuman churasaj, sonqonkupitaj qhelqaykusaj. Noqa Diosninku kasaj, paykunataj aylluy kanqanku. Noqa Tata Diosmin chayta nini.

³⁴ Manaña pipis runa masinta yachachenqañachu, nitaj wawqentapis nenqañachu: Tata Diosta rejsiy, nispa, imaraykuchus juch'uymanta jatunkama tukuy rejsiwanqanku. Noqa millay ruwasqankuta pampachasaj, manañataj jayk'ajpis juchankumanta yuyarikusajchu. Noqa Tata Diosmin chayta nini.

³⁵ Pichus intita p'unchay k'anchananpaj churarqa, jinallataj killata, ch'askakunatapis tutapi k'anchanankupaj churarqa, pitajchus mama qochata qaywin qhollchoqeyasqan sinch'ita ch'ajwarinankama, chaykunata ruwajpa sutenqa Tukuy Atiyniyoj Tata Dios. Pay nin:

³⁶ Sichus chay ruwasqay imakuna kamachisqayman jina manaña purinkumanchu chayqa, ichapis chay p'unchaymantapacha Israel manaña aylluychu kanman. Ajinata noqa Tata Dios nini.

³⁷ Manachayrí sichus pipis janajta tupuyta atinman chayqa, sitajchus kay pachatapis cimientonkama qhawaykuyta atinman chayqa, noqapis Israelpa mirayninta tukuy ima ruwasqanmanta qhesachayta atillaymantaj. Noqa Tata Diosmin chayta nini.

³⁸ Tata Dios nillantaj: Uj p'unchay jamonqa, chay p'unchaypitaj kay llajtay Jerusalén watej sayarichisqa kanqa, Jananel torremantapacha K'uchu nisqa punkukama.

³⁹ Chayqa cheqanta renqa Gareb orqokama, chaymantataj Goa chaynejta muyuykonqa.

⁴⁰ Chantá tukuynin valle, maypichus wañusqakunata p'ampanku, ushphatataj wijch'unku, chayninta rillanqapuni. Chantá Cedrón wayq'o chaymanta inti llojsimuynejman, chay patapi tukuy pampapis, Caballo Yaykuna punku nisqa k'uchukama chayanqa. Chay tukuy cheqaqa noqapaj t'aqasqa kanqa, Jerusalentaj manaña jayk'ajpis urmachisqachu, nitaj thuñisqachu kanqa, nispa.