Jeremías 29 - DIOSPA QHELQACHISQAN DEUTEROCANONICAL

Jeremías cartata apachin

¹ Jerusalén llajtamanta Jeremías uj cartata apacherqa, pikunatachus Nabucodonosor Babiloniaman apasqa, chay kurajkunaman, sacerdotekunaman, Diosmanta sut'inchajkunaman chantá tukuy runaman ima.

² Chay cartata Jerusalenmantapacha apacherqa kuraj kamachej Jeconías, maman, yanapajninkuna, Jerusalenmanta chantá Judá suyumantapis kurajkuna, fierro takajkuna ima apasqa kasqankumanta qhepaman. Tukuyninkuta Nabucodonosor Jerusalenmanta Babiloniaman apachisqa.

³ Jeremías chay cartata apanankupaj Safanpa churin Elasaman, chantá Hilciaspa churin Gemariasman ima jaywarqa. Paykunata Judata kuraj kamachej Sedequías kachasqa Babiloniata kuraj kamachej Nabucodonosorwan parlanankupaj. Chay cartapi kay jinata nerqa:

⁴ Israelpa Tukuy Atiyniyoj Diosnin kay jinata nin, pikunatachus Jerusalenmanta Babiloniaman apacherqa, chaykunaman:

⁵ Wasikunata ruwakuspa, chaypi tiyakuychej. Poqoj sach'akunata mallkiychej, poqosqantataj mikhuychej.

⁶ Casarakuychej, churikunayoj, ususiyojtaj kaychej. Paykunapis casarakuchunku, wawakunayojtaj kachunku. Astawan miraychej amataj pisiyaychejchu.

⁷ Maymanchus apasqa karqankichej, chay llajtaj allinninpaj imatapis ruwaychej. Chay llajtaraykutaj Tata Diosmanta mañapuychej, imaraykuchus chay suyu allinpi kajtenqa, qankunapis allillanpitaj kankichej.

⁸ Noqa Israelpa Tukuy Atiyniyoj Tata Diosnin kayta niykichej: Pikunachus qankunawan khuska tiyakunku, chay sut'inchajkunawan ama q'otiyachikuychejchu, nillataj watojkunawanpis, amallataj mosqokusqankutapis kasuychejchu.

⁹ Imatachus paykuna ninku sutiypi willashasqankuta, chayqa llullamin. Mana noqachu paykunata kachamuni. Noqa Tata Diosmin chayta nini.

¹⁰ Noqa Tata Dios nillanitaj: Qanchis chunka wata Babiloniapi kasqaykichej junt'akojtinkama, kay cheqaman qankunata kutichimunayta nerqani, chay nisqayta junt'asaj.

¹¹ Noqalla yachani imatachus qankunapaj yuyasqayta. Chay yuyayqa mana qankuna ñak'arichisqa kanaykichejpajchu, manachayqa qankuna allinta kawsakunaykichejpaj yuyani, jinallataj qhepanejmanpis allin kawsayta tarinaykichejpaj. Noqa Tata Diosmin chayta nini.

¹² Chaypacha qankuna noqamanta mañakuwankichej, noqataj uyarisqaykichej.

¹³ Mask'awaspapis, tariwankichej, tukuy sonqowan mask'awasqaykichejrayku.

¹⁴ Arí, noqata qankuna tariwankichej, chantá preso kasqaykichejta tukuchisaj. Chay suyumanta orqhomusqaykichej, maymanchus apasqa karqankichej, chaymanta tantaykusqaykichej. Chantá Jerusalén llajtaman kutichimusqaykichej, maymantachus karuman apacherqaykichej, chayllamantaj. Noqa Tata Diosmin chayta nini.

¹⁵ Qankuna nisqankichej: Babiloniapi kashajtiyku, Tata Diosqa sut'inchajkunata qowarqayku, nispa.

¹⁶ Chaywanpis noqa Tata Dios kayta niykichej, pichus Davidpa kamachinan tiyanapi tiyashan, chay kuraj kamachejmanta. Pikunachus kay llajtapi tiyakushankuraj, manataj waj suyukunaman apasqachu karqanku, chaykunamantapis nillanitaj:

¹⁷ Paykunaman maqanakuyta, yarqhayta, onqoyta ima kachaykusaj. Paykunata q'etayasqa higo jina mana mikhunapaj jina kanankuta ruwasaj.

¹⁸ Paykunata maqanakuywan, yarqhaywan, onqoywan ima qhatiykachasaj. Kay pachapi tukuy suyu paykunata rikuspa, asipayanqanku, maldicisqa jina kasqankurayku. May suyumanchus paykunata ch'eqerqachisaj, chaypi p'enqayman churasqa kanqanku, runakunataj paykunaj sutinta oqharispa, ujkunata maldicenqanku.

¹⁹ Chayta ruwasaj, imaraykuchus kamachiykunanejta tukuy willachisqayta mana kasorqankuchu, maypachachus noqamanta sut'inchajkunata kutin kutinta kachamorqani, chaypacha, nispa. Ajinata noqa Tata Dios nini.

²⁰ Chayrayku Jerusalenmanta Babiloniaman tukuy apasqa kajkuna, Tata Diospa nisqanta uyariychej.

²¹ Israelpa Tukuy Atiyniyoj Tata Diosnin kay jinata nin: Colaiaspa churin Ajab, jinataj Maseiaspa churin Sedequías ima llullakuspa nishanku: Tata Diospa sutinpi qankunaman willashayku, nispa. Noqatajrí paykunata Babiloniata kuraj kamachej Nabucodonosorpa makinman urmachisaj, paytaj rikushajtiykichej, paykunata wañurachenqa.

²² Judamanta Babiloniapi apasqa kashanku, chaykunamanta mayqellanpis wajta maldiciyta munaspa, kay jinata nichun: Imaynatachus Babiloniaj kuraj kamachejnin Sedequiasta, Ajabtawan ninawan ruphaykucherqa, ajinata qantapis Tata Dios ruwasuchun, nispa.

²³ Paykunaqa millay mana ruwanata Israelpi ruwarqanku. Runa masinkoj warminwan khuchichakorqanku, sutiypitaj llullakuspa parlarqanku, mana noqa kamachisqallayta. Chayta noqa yachani, rikunitaj. Noqa Tata Diosmin chayta nini.

Semaiaspaj contranpi sut'inchay

²⁴ Tata Diosqa Jeremiasta kamacherqa kayta Nejelán llajtayoj Semaiasman ninanta:

²⁵ Israelpa Tukuy Atiyniyoj Tata Diosnin nisunki: Qanllamanta uj cartata apacherqanki, pikunachus Jerusalenpi kashanku, chay tukuy runaman, Maseiaspa churin sacerdote Sofoniasman, chantá tukuy puchoj sacerdotekunaman ima. Chay cartapitaj Sofoniasman nerqanki:

²⁶ Sacerdote Joyadáj cuentanmanta Tata Dios qanta churarqasunki, Tata Diospa Templonpi kuraj kaj sacerdote kanaykipaj. Sichus pipis uma t'ojpisqa runa sut'inchaj jina parlaj churakunman chayqa, noqa kamachiyki: Payta cepoman churay, cadenawantaj watay, nispa.

²⁷ Jina kajtenqa, imaraykutaj Anatot llajtayoj Jeremiasta mana k'amerqankichuri? Payqa sut'inchajpis kanman jina parlaj churakusqa.

²⁸ Payqa Jerusalenmantapacha Babiloniaman uj cartata apachimuspa, niwarqayku: Chay suyuman apasqa kasqaykichejqa unaypaj kanqa. Chayrayku wasikunata ruwakuspa, chaypi tiyakuychej, poqoj sach'akunata mallkiychej, poqosqantataj mikhuychej, nispa.

²⁹ Chay carta sacerdote Sofoniaspa makinman chayamojtin, payqa cartata Jeremías uyarinanpaj ñawiriykaporqa.

³⁰ Chantá Tata Diosqa Jeremiasta nerqa:

³¹ Waj suyukunaman tukuy apasqa kajkunaman kay nisqayta willachiy: Nejelanmanta Semaiasqa sutiypi parlasorqachej, mana noqaj kachamusqallay, mana imatapis payman yuyaychajtillay. Kunantaj qankuna llullakusqanta jap'ikushankichej.

³² Chayrayku noqa Tata Dios nini: Noqa Nejelán llajtayoj Semaiasta, tukuy miraynintawan jasut'isaj. Mana kay pachapi paypa mirayninmanta ni ujpis qhepakonqachu, nitaj kusikonqachu aylluy Israelman allin kawsayta qoshajtiy, imaraykuchus pay ajinata parlaspa, contraypi oqharikunankupaj aylluyta enqhaykorqa. Noqa Tata Diosmin chayta nini.