Jeremías 14 - DIOSPA QHELQACHISQAN DEUTEROCANONICAL

Ch'aki wata kanamanta willay

¹ Ch'aki wata kasqanrayku Tata Diosqa Jeremiasta nerqa:

² Judaqa llakiywan waqan, tukuy llajtankunataj llakiypi kashanku. Runankunapis pampapi tiyasqa waqashanku. Jerusalenmantataj sinch'i nanaywan qhaparisqanku uyarikun.

³ Qhapajkunaqa uywasqankuta yakuman kachanku, paykunataj yaku qochapi mana yakuta tarinkuchu, ch'usaj p'uñuyojlla kutipunku. P'enqakuymanta uyankuta mana mayman churayta atispa, umankutapis qhataykukunku.

⁴ Chajrata poqochejkuna sonqo p'akisqa rikhurinku, chay llakiymanta umankuta qhataykukuspa, imaraykuchus mana para kasqanrayku jallp'a t'ajralla kashan.

⁵ Jinallataj tarukakunapis wachaytawankama, uñitankuta saqerparinku, q'achu mana kasqanrayku.

⁶ K'ita burrokunapis ch'in orqokunapi k'ita alqokuna jina ansaqespa sayanku. Ñawinkupis ayphuyan, mikhunankupaj pasto mana kasqanrayku, nispa.

⁷ Runakuna ninku: Tata Dios, juchayku ch'ataykushawayku chaypis, sutiyki jatunchasqa kananrayku yanapawayku ari. Noqaykoqa ashkha kutita qanmanta karunchakorqayku, contraykitataj mayta juchallerqayku.

⁸ Qanmin Israelpa suyakuynin kanki, ñak'arina p'unchaypitaj qhespichiwajniyku kanki. Imaraykutaj kay suyuykupi uj karu llajtayoj runa jinalla kankiri? Imajtintaj, imaynatachus ñan purej uj ch'isillata puñukoj qheparikun, ajinata qheparikunkiri?

⁹ Imajtintaj uma muyusqa runa jina kankiri? Wapu soldado jina kaspapis, manachu yanapayta atiwayku? Chaywanpis Tata Dios, qan noqaykuwan kashanki, noqaykutaj sutiykita yupaychayku. Amapuni saqerpariwaykuchu ari, nispa.

¹⁰ Ajinata Tata Dios israelitakunamanta nin: Paykunaqa lantikunata yupaychayta misk'ichikunku, kayman jaqayman yupaychaspa purinku. Chayrayku noqa mana paykunata allinpaj qhawanichu. Kunan millay ruwasqankumanta yuyarikuspa, paykunata jasut'isaj, nispa.

¹¹ Chantá Tata Dios nillawarqataj: Kay runakunata yanapanayta ama mañakuwaychu.

¹² Ayunaspa mañakuwajtinkupis, mana uyarisajchu. Uywa ñak'asqa q'olachinata apamuwajtinkupis, jinataj poqoykunamanta jaywanata ima, manapuni tukuy sonqochu jap'ikusaj. Manachayqa paykunata maqanakupi tukuchisaj, yarqhaywan, onqoywan ima, nispa.

¹³ Noqataj kuticherqani: Tukuyta Kamachej Tata Dios, sut'inchajkuna aylluykiman ninku: Mana maqanaku kanqachu, nitaj yarqhaypis kanqachu. Tata Diosqa unaypaj allin kawsakuyta kay cheqaman apachimuwasunchej, nispa.

¹⁴ Chantá Tata Dios ujtawan niwarqa: Paykunaqa llullakuspa sutiypi sut'inchashanku. Mana noqaqa chay sut'inchajkunata kachamunichu, nitaj kamachinichu. Paykunawanqa mana parlallanipischu. Imatachus sut'inchasqankoqa llulla, mosqoypi jina rikusqankutaj qhasi manakajlla. Paykunaqa sonqonkupi musphaspa, yuyasqankuman jinalla parlanku.

¹⁵ Chayrayku noqa Tata Diosmin chay sut'inchajkunamanta nini, pikunachus mana noqaj kachasqallay sutiypi parlanku, chaykunamanta: Paykuna ninku: Mana maqanaku kanqachu, nitaj yarqhaypis, nispa. Chay jinata sut'inchajkunaqa maqanakupi wañuchisqa kanqanku, chayrí yarqhaywan wañonqanku.

¹⁶ Pikunamanchus llullakuspa parlashanku, chay runakunapis maqanakupi chantá yarqhaywan wañonqanku, jinallataj warminku, churinku, ususinku ima. Ayankutaj Jerusalenpa callenkunapi wijch'urasqa kanqanku, manataj pipis paykunata p'ampaykoj kanqachu. Ajinamanta millay ruwasqankuman jina ñak'arichisqa kanqanku, nispa.

¹⁷ Tata Dios nillawarqataj: Aylluyman kayta niy: Tuta p'unchay mana sayk'uyta ñawiymanta waqay t'akakuchun, imaraykuchus may munasqa aylloyqa ñak'arichisqa, k'irisqataj kashan.

¹⁸ Campoman llojsispa, maqanakupi wañuchisqa ayankuta rikuni. Llajtankuman yaykuspataj, yarqhaymanta wañushaj runakunata rikuni. Sut'inchajkuna, sacerdotekunataj llajtamanta llajta purinku, imachus kashasqanta mana yachaspa, nispa.

Jeremías Tata Dioswan parlan

¹⁹ Chantá Jeremías nerqa: Tata Dios, Judataqa qhesachasqatapunichu qhesachanki? Sión llajtawanqa amichikunkipunichu? Imaraykutaj qhaliyayta mana atinaykupaj jina maqawarqaykuri? Allinpi tiyakuyta suyarqayku, manataj ima allintapis rikorqaykuchu. Qhaliyachisqa kayta suyarqayku, sinch'i mancharikuyllataj kashan.

²⁰ Tata Dios, millay ruwasqaykuta rejsikapuyku, jinallataj ñawpa tataykukunaj juchallikusqankutapis. Cheqatapuni tukuyniyku contraykipi juchallikorqayku.

²¹ Chaywanpis sutiyki yupaychasqa kananpaj, ama qhesachawaykuchu ari, amataj Jerusalenpi jatunchasqa kamachinayki tiyanata pisipaj qhawaychu. Yuyarikuy ari noqaykuwan tratota ruwasqaykimanta. Amapuni trato ruwasqaykita p'akiychu.

²² Lantikunamanta mayqenpis parachimunmanchu? Janajmanta paraqa payllamantachu paramun? Mana, Diosniyku Tata Dios, qanllamin parachimojqa kanki. Qanllamin kay tukuy imata ruwanki. Chayrayku qanllapi atinikuspa suyakuyku, nispa.