Jeremías 11 - DIOSPA QHELQACHISQAN DEUTEROCANONICAL

Diospa trato ruwasqanta Judá p'akin

¹ Tata Diosqa noqa Jeremiasman parlaspa, niwarqa:

² Kay trato imaynachus ruwasqa kasqanta uyarispa, chayta Judá suyupi runakunaman, chantá Jerusalenpi tiyakojkunaman ima willay.

³ Noqa israelitakunaj Tata Diosnin nini: Kay trato ruwasqata mana junt'ajqa maldicisqa kachun.

⁴ Kay tratota ñawpa tatankukunawan ruwarqani, maypachachus Egiptomanta paykunata orqhomorqani, chaypacha. Egipto suyoqa fierro unuyachina horno jina karqa. Chaypachataj noqa nerqani: Kasuwaychej, ruwaychejtaj tukuy kamachisqayta, chantá qankuna aylluy kankichej, noqataj Diosniykichej kasaj, nispa.

⁵ Noqa ñawpa tataykichejman tiluspa nerqani: Maypichus lechewan, abeja misk'iwan yaku jina purishan, chay jallp'ata qosqaykichej, nispa. Noqataj nisqayta junt'aspa, chay jallp'ata qorqaykichej, kunantaj qankuna chay jallp'ata jap'ishankichej, nispa Tata Diosqa niwarqa. Noqataj kuticherqani: Tata Dios, chayqa ajinapuni, nispa.

⁶ Chantá Tata Diosqa nillawarqataj: Judá suyupi kay willayta qhaparimuy, jinallataj Jerusalén llajtapipis. Chay runakunamantaj ajinata niy: Imaynachus kay trato ruwasqa kasqanta uyariychej, chantá junt'aychejtaj.

⁷ Maypachachus ñawpa tataykichejkunata Egiptomanta orqhomorqani, chaymantapacha kunankama paykunaman mayta nerqani: Kasuwaychej, nispa.

⁸ Chaywanpis mana kasuwarqankuchu, nitaj uyariwarqankuchu, manachayqa k'ullukuspa, sonqonkoj millay yuyasqallanta ruwarqanku. Paykunaqa manapuni kamachisqayta junt'ayta munarqankuchu. Chayrayku chay tratopi imatachus nisqay ñak'ariykunata patankuman kachaykamorqani, nispa.

⁹ Chantá Tata Dios nillawarqapuni: Judá ayllumanta kajkuna, jinallataj Jerusalenpi tiyakojkunapis contraypi oqharikunku.

¹⁰ Ñawpa tatankukunaj juchallisqankuman kutiykapunku, pikunachus mana kasuwayta munarqankuchu, chaykunaj ruwasqankuman. Ajinamanta waj dioskunata yupaychaj churakorqanku. Ajinata ruwaspa, Israel suyu, jinataj Judá suyupis ñawpa tatankukunawan trato ruwasqayta p'akerqanku.

¹¹ Chayrayku noqa Tata Dios nini: Uj jatun ñak'ariyta paykunaman kachaykamusaj, chaymantataj mana ayqeyta atenqankuchu. May jinata yanapanayta qhaparikamuwajtinkupis, manapuni uyarisajchu.

¹² Chantá Judá suyupi tiyakojkuna, Jerusalenpi tiyakojkunapis inciensota q'oshñichispa, diosninkuman yanapananta mañakamoj renqanku. Chaywanpis ñak'arina p'unchay chayamojtin, chay lantikuna manapuni paykunata yanapayta atenqankuchu.

¹³ Judá suyojta mashkha llajtanchus tiyapun, ajinallataj diosninkukunapis tiyapun. Jerusalenpi tiyakojkunaqa may chhika altarkunata Baalman inciensota q'oshñichinankupaj ruwakunku. Chay altarkunaqa sapa callellapi kashan.

¹⁴ Ajinaqa Jeremías, ama kay runakunarayku imatapis mañawaychu, ama majakuwaychu nitaj qhaparimuwaychu, imaraykuchus ñak'ariypi rikukuspa qhaparikamuwajtinkupis, mana uyarisajchu.

¹⁵ Munakusqay Israel imatataj Temploypi mask'an, chay tukuy millay imakunata ruwashaspapisri? Wirata, aychatawan jaywawasqanrayku pay yuyanchu noqa chay jasut'iyta paymanta karunchanayta, ajinamanta mana jasut'isqa kananpaj? nispa.

¹⁶ Ñawpajpi Tata Dios sutichasqa: Jatun olivo sumajta poqorej sach'a, nispa. Jinapis illapaj sinch'i t'ojyasqanwan laqhenkunata ruphachenqa, thansantataj k'ajllanqa.

¹⁷ Tukuy Atiyniyoj Tata Diosmin, pichus kay jallp'aman churasorqachej, pay Israelpa contranpi ñak'ariykuna jamunanta kamacherqa. Israel suyupi, jinallataj Judá suyupi tiyakojkuna millay ruwasqaykichejrayku pay jasut'iykunata kachaykamonqa, imaraykuchus qankuna Baalman inciensota q'oshñichispa, Tata Diosta phiñacherqankichej.

Jeremiaspa awqankuna payta wañuchinankupaj wakichikunku

¹⁸ Chantá Tata Dios willawarqa awqaykuna contraypi mana allinta ruwanankupaj wakichikushasqankuta. Paytaj ñawiyta kichariwarqa chayta reparanaypaj.

¹⁹ Imaynatachus uj cordero mana imatapis yachanchu camalman payta apashajtinku, ajinallataj noqapis mana yacharqanichu contraypi imatachus ruwayta munashasqankuta. Paykunaqa nishasqanku: Kay poqoj sach'ata k'utunachej. Payta chinkarparichinachej kay pachapi kawsajkuna ukhumanta, amaña pipis paymanta ujtawan yuyarikunanpaj, nispa.

²⁰ Chantá noqaqa Tata Diosman kay jinata parlarikorqani: Ay, Tukuy Atiyniyoj Tata Dios, qanmin cheqan juez kanki. Qanlla runaj sonqon ukhuta allinta qhawaspa, imaynachus kasqanta yachanki. Chantá imaynatachus runakunata millay ruwasqankumanta jasut'isqaykita rikuchiway, imaraykuchus qanllapi atinikuni.

²¹ Anatot llajtamanta runakuna wañuchiwayta munaspa, niwarqanku: Ama Tata Diospa sutinpi sut'inchaychu, manachayqa qanta wañuchisqayku, nispa.

²² Chaykunamanrí Tukuy Atiyniyoj Tata Dios nin: Paykunata noqa kay jinata jasut'isaj: Waynakuna espadawan wañuchisqa kanqanku, churinkukuna, ususinkukunawantaj yarqhaymanta wañonqanku.

²³ Paykunamanta ni ujllapis kawsashaj qhepakonqachu, imaraykuchus jasut'inay watapi patankuman ñak'ariykunata kachaykamusaj, nispa.