Isaías 54 - DIOSPA QHELQACHISQAN DEUTEROCANONICAL

Diospa munakuynenqa wiñaypaj

¹ Tata Dios nin: Jerusalén llajta, jatunmanta kusikuy ari, mana wawata rejsej warmi, mana wawata paqarichikuyta yachaj warmi. Jatunmanta takispa, kusikuy mana wijsallikuyta yachaj warmi, imaraykuchus saqerparisqa warmej wawankuna aswan ashkha kanqanku qosayoj warmej wawankunamanta nisqaqa.

² Astawan tiyanayki toldota jatunyachiy, tiyanaykej cortinantataj jatunman aysay. Toldo watana waskhatapis astawan jatunyachiy, estacantapis sumajta takaykuy.

³ Ajinata ruway, imaraykuchus lloq'emantaj pañamantaj jatunyanki. Mirayniykeqa waj suyukunaj jallp'ankuta jap'enqanku, saqerasqa ch'in llajtakunapitaj tiyakonqanku.

⁴ Ama manchachikuychu ari. Qanqa manaña p'enqachisqachu kanki. Ama p'enqakuychu, imaraykuchus manaña k'umuykachachisqachu kanki. Qanqa sipas kashaspa, p'enqakoj kasqaykita qonqayman churanki, manallataj yuyarikunkichu warmisapa kashaspa k'umuykachasqaykimantapis.

⁵ Pichus qanta ruwasorqa, chaymin qanpa qosaykeqa, sutintaj Tukuy Atiyniyoj Tata Dios. Israelpa May Llimphu Kaj Diosninmin pagota qospa kacharichisojniykeqa. Payqa tukuy kay pachaj Diosnin.

⁶ Qanqa saqerparisqa, may llakisqa warmi jina karqanki, mayqenchus sipaspacha qosayoj kashaspa wijch'usqa karqa, chay jina. Chaywanpis Tata Diosqa watej wajyakapusunki. Kunantaj kay jinata nisunki:

⁷ Noqa mana unaytachu saqerparerqayki. Chaywanpis jatun khuyakuyniywan jap'ikapullasqaykitaj.

⁸ K'araj phiñakuyniypi mana unaytachu qanmanta pakakorqani. Chaywanpis wiñay munakuyniywan qanta khuyasqayki. Ajinata qhespichisoj Tata Dios nin.

⁹ Kunan Noejpa p'unchayninpi jina ruwallasajtaj. Chaypacha tiluspa nerqani manaña jayk'ajpis yaku tukuynin kay pachata p'ampananta. Ajinata kunanqa tiluspa nini manaña jayk'ajpis ujtawan qanpaj phiñakunayta, manañataj jasut'isqaykichu.

¹⁰ Qanmanta khuyakoj Tata Dios nisunki: Tukuy orqokuna kuyurenqanku, lomakunapis kharkatitenqanku. Khuyakuyniyrí qanmanta manapuni karunchakonqachu. Qanwan allinyakuna trato ruwasqaypis manallataj jayk'ajpis p'akisqachu kanqa, nispa.

Mosoj Jerusalén llajta

¹¹ Tata Dios nillantaj: Jerusalén llajta, qanqa sinch'i wayrawan jasut'isqa kanki, ni pej sonqochasqan. Noqarí k'achitu q'omer valorniyoj rumikuna patapi sayachisqayki. Cimientoykipis valorniyoj zafiro rumimanta kanqa.

¹² Torreykikunata rubí valorniyoj rumimanta ruwasaj, wasi punkuykikunatapis berilo valorniyoj rumimanta ruwapusqayki. Muyurisqa perqaykikunapis lliphipej valorniyoj rumimanta kanqa.

¹³ Noqa tukuynin churiykikunaman yachachisaj, wawaykikunataj allin kawsaypipuni kawsanqanku.

¹⁴ Cheqan kajwan sumaj sayachisqa kanki. Manaña ñak'arichisqachu kanki, manañataj manchachikunkichu, imaraykuchus manchachikoyqa manaña qanman qayllamusonqachu.

¹⁵ Sichus pipis qanwan maqanakoj sayaykamusonqa chayqa, mana noqaj kamachisqayraykuchu kanqa. Pillapis qanpa contraykipi sayaykojqa ñawpaqeykipi urmanqa.

¹⁶ Qhawariy, noqaqa herrerota churani, paytaj phukuspa, ninata k'ajachin. Chaypi fierrota parichispataj, armakunata, herramientakunata ima ruwan. Noqallataj soldadokunatapis thuñinankupaj churani.

¹⁷ Chaywanpis qanta chinkachinanpaj armata mana pipis ruwayta atenqachu. Pichus contraykita parlajtaqa juezpa ñawpaqenpi ch'inyachillankipuni. Chaykunata kamachiypi kajkunaman qoni, noqataj paykunata qhespichisaj. Ajinata noqa Tata Dios nini.