Isaías 52 - DIOSPA QHELQACHISQAN DEUTEROCANONICAL

Tata Dios Sión llajtata kacharichenqa

¹ Sión llajta, rijch'ariy, rijch'arikuy, kallpachakuytaj. Diospa ajllakusqan Jerusalén llajta, sumaj k'achitu p'achaykita churakullayña, imaraykuchus millayta ruwajkuna, Tata Diosta mana manchachikojkuna ima punkuykinejta manaña yaykumusonqankuchu.

² Jerusalén llajta, jatariy, p'achaykimanta jallp'ata thalarakuytawantaj, kamachinayki tiyanapi tiyaykuy. Presochasqa sipas jina Sión, kunkaykipi cadenawan watasusqankuta phaskarakuy.

³ Tata Dios nin: Mana ima pagotapis jap'erqanichu vendesusqaykichejmanta, kunanpis manallataj ima pagotapis qosajchu kacharisunaykichejpaj, nispa.

⁴ Tukuyta Kamachej Tata Dios nillantaj: Israel aylluy ñawpajta Egiptoman urayk'orqa, chaypitaj karu llajtayoj jina tiyakorqa. Aswan qhepamantaj Asiriamanta runakuna qhasillamanta paykunata ñak'aricherqanku.

⁵ Kunanqa imataj kayri? Mana imallamanta aylluyta mana munashajta waj suyuman apanku. Paykunata ñak'arichejkunaqa wapuykachaspa, qhaparqachanku, sapa p'unchaytaj contraytapis rimanku.

⁶ Uj p'unchay chayamonqa, chaypachataj israelitakuna sutiyta rejsenqanku. Chay p'unchaypitaj yachanqanku noqapuni chayta ruwasqayta. Arí, chayta noqapuni nini.

⁷ Pichus orqo patanta jamuspa sumaj willaykunata apamojta rikunaqa may kusiymin. Payqa allin kawsaymanta, qhespichisqa kaymanta ima sumaj willaykunata apamushan, Sionmantaj nin: Diosniykeqa kamachishanña, nispa.

⁸ Llajta qhawajniykikunaj qhaparisqankuta uyariy. Tukuyninku ujllapi kusiymanta qhaparinku, imaraykuchus kikin ñawinkuwan Tata Diosta Sionman kutimushajta rikunku.

⁹ Jerusalén llajtaj laqayan, jatunmanta may kusiywan qhapariychej, imaraykuchus Tata Dios ayllunmanta khuyakun, jinataj Jerusalén llajtata kacharichin.

¹⁰ Tata Diosqa makinta q'empirakun atiyninta rikuchinanpaj tukuy suyoj ñawpaqenkupi. Chantá tukuy kay pachaj k'uchunpi tiyakojkunaqa Diosninchej kacharichiwasqanchejta rikonqanku.

¹¹ Ayllúy, Babiloniamanta llojsimuychej. Llojsimushaspataj, ama ch'ichipaj qhawasqa kajta llankhaychejchu. Babiloniaj chawpinmanta llojsimuspa llimphuchakuychej, Tata Diosta yupaychanapaj imakunata apajkuna.

¹² Mana usqhay usqhaytachu llojsinkichej, nitaj ayqekoj jinachu ripunkichej, imaraykuchus Tata Diosmin ñawpaqeykichejta renqa. Israelpa Diosnin qhepaykichejtapis jamullanqataj, nispa.

Tata Diospa kamachin ñak'arichisqa kanqa

¹³ Tata Dios nin: Uyariwaychej, kamachiytaqa tukuy imapi allin renqa. Payqa may jina jatunchasqa, may jina pataman oqharisqataj kanqa.

¹⁴ Chaywanpis paymanta ashkha runakuna t'ukorqanku, imaraykuchus ukhonqa manaña kasqan jinachu karqa, uyanpis manaña runaj uyanmanchu rijch'akorqa.

¹⁵ Ajinallatataj tukuy suyuta t'ukuchenqa. Kuraj kamachejkuna paypa ñawpaqenpi ni parlariytapis atenqankuchu, imaraykuchus mana jayk'aj rikusqankuta rikonqanku, jinataj mana jayk'ajpis uyarisqankuta entiendenqankuchu.