Isaías 41 - DIOSPA QHELQACHISQAN DEUTEROCANONICAL

Diosqa Israelta kacharichinanta nin

¹ Mama qocha churukunapi kaj runakuna, ñawpaqeypi ch'in kaychej, tukuy suyutaj kallpachakuychej. Qayllamuspa parlawaychej, jinamanta yachasunchej mayqenninchejchus cheqanpi kasqanchejta.

² Pitaj inti llojsimuynejmanta atipaj kuraj kamachejta jataricherqari? Pitaj tukuy suyuta payman jaywaykun, ñawpaqenpitaj kuraj kamachejkunata k'umuykuchinri? Ajinamanta espadanwan ñut'u jallp'aman jina paykunata tukuchin, flechanwantaj wayraj apasqan ch'aki pajaman jina tukuchillantaj.

³ Kuraj kamachejqa paykunata qhatiykun, ñantataj ni pej ima nisqan purillan, maynintachus manaraj jayk'ajpis purerqachu, chayninta.

⁴ Pitaj chay tukuy imata wakicherqa, chay ajinapuni kananpajri? Pitaj qallariymantapacha runakunata wajyarqa kawsanankupajri? Chay tukuytaqa noqa Tata Diosllamin ruwani. Noqaqa tukuy imaj qallariynin, tukuynintaj kani.

⁵ Mama qochaj kantunpi kaj suyukuna chayta rikuspa, manchachikunku. Kay pachataj, ujnin k'uchumanta ujnin k'uchukama kharkatitin. Chantá ujllaman tantaykukunku maqanakoj jamunankupaj.

⁶ Lanti ruwajkunaqa paykunapura kallpachanakuspa, ninakunku: Kallpachakuy, nispa.

⁷ K'achanchanata ruwayta yachajqa qorita unuyachejta yanapan, martillowan llusk'achajpis yunquepi wajtajta yanapallantaj: Kay t'inkichisqanchejqa allillan, nispa. Chaymantataj lantita sumajta clavowan jap'iykuchinku, ama kuyunanpaj.

⁸ Chaywanpis Tata Dios nin: Qanrí Israel, kamachiy kanki, qantaj Jacob, ajllakusqay kanki. Kawsaqey Abrahampa mirayninmanta ajllakusqay kanki.

⁹ Qanta kay pachaj k'uchunmantapacha pusamorqayki, karu suyupi kashajtiyki, wajyamorqayki: Qan kamachiy kanki, nispa. Noqaqa qanta ajllakorqayki manataj qhesachasqaykichu.

¹⁰ Chayrayku ama manchachikuychu, imaraykuchus noqa qanwanpuni kashani. Ama q'enaqakuychu, imaraykuchus noqa Diosniyki kani. Noqa kallpachasqayki, yanapasqaykitaj. Jinallataj justiciata ruwaj paña makiywan sayachillasqaykipuni.

¹¹ Chantá qanta tukuy chejnisojkunaqa p'enqachisqa, k'umuykuchisqataj kanqanku. Qanwan maqanakojkunaqa manapis kankumanchu jina wañuchisqa kanqanku.

¹² Qanqa awqaykita mask'anki, manataj tarinkichu. Pikunachus qanwan maqanakorqanku, chaykunaqa manapis kankumanchu jina chinkachisqa kanqanku.

¹³ Noqa paña makiykimanta jap'isoj Tata Diosniyki kani, niykitaj: Ama manchachikuychu, imaraykuchus noqa yanapasqayki, nispa.

¹⁴ Jacob ayllu, khuritu jinalla kanki, qanqa Israel pisi runakunayoj kanki. Chaywanpis ama manchachikuychu, imaraykuchus noqamin yanapasqayki. Noqa Tata Dios pagowan kacharichisoj Dios kani, Israelpa May Llimphu Kaj Diosnintaj.

¹⁵ Noqa rastrillo jina kanaykipaj ruwasqayki, mosojta, sumaj kiruyojtataj. Qanqa orqokunata trillaspa, ñut'uta kutanki, lomakunatapis q'opaman jina tukuchinki.

¹⁶ Chaykunata wayrachinki, wayrataj apakaponqa, sinch'i muyoj wayra kayman jaqayman t'akaranqa. Qantajrí Tata Diosniykimanta kusikunki. Israel, May Llimphu Kaj Diosniykirayku may kusisqa kanki.

¹⁷ Tata Dios nillantaj: Wajcha runakuna yakuta mask'aspa, mana tarinkuchu. Yaku ch'akiywan siminkupis pharallaña. Noqa Tata Diostajrí paykunata uyarisaj. Noqa Israelpa Diosnin mana jayk'ajpis paykunata saqerpayasajchu.

¹⁸ Manachayqa ch'aki orqokunapi mayuta rikhurichisaj, vallekunapitaj yaku juturikunata. Ch'innejkunapi yaku qochakunata rikhurichisaj, ch'aki jallp'akunapitaj yakuta phullchichimullasajtaj.

¹⁹ T'ajra jallp'akunapi cedro sach'akunata, acacia sach'akunata, arrayán sach'akunata, olivo sach'akunata ima wiñachisaj. Ch'aki jallp'akunapi wiñachillasajtaj pino sach'akunata, ciprés sach'akunatawan.

²⁰ Chayta ruwasaj tukuy runaj rikunanta, allinta reparaspa umachakunankupaj. Paykuna yachanqanku noqa Tata Dios jatun atiyniywan chaykunata ruwasqayta. Yachallanqankutaj noqa, Israelpa May Llimphu Kaj Diosnin chay imakunata rikhurichisqayta, nispa.

Tata Dioslla cheqapuni Dios

²¹ Jacobpa kuraj kamachejnin Tata Dios nillantaj: Tukuy suyoj diosninkukuna, imatachus parlarinaykichejta rimariychej. Imatachus ruwayta atisqaykichejta rikuchiychej.

²² Jamuychej, imachus qhepaman kananta willawayku. Qallariymantapacha imachus karqaña, chaytapis willallawaykutaj, allinta tukuy sonqowan unancharispa, imapichus kay imakuna tukukunanta yachanaykupaj.

²³ Allinta willawayku qhepaman imachus jamunanmanta, ajinamanta yachanaykupaj cheqapuni dioskuna kasqaykichejta. Imallatapis ruwaychej ari, allintapis, chayrí mana allintapis, t'ukunaykupaj, manchachikunaykupaj ima.

²⁴ Chaywanpis qankuna lantikuna, mana imachu kankichej, manallataj imatapis ruwayta atinkichejchu. Chayrayku qankunata yupaychajkuna qhesachasqa, pisipaj qhawasqataj kanku, nispa.

²⁵ Noqa Tata Dios wichaynejpi uj runata sayarichini, paytaj sutiyta oqharispa, inti llojsimuynejmanta jamonqa. Payqa kuraj kamachejkunata t'uruta jina saronqa, imaynatachus manka ruwaj t'uruta sarun, ajinata.

²⁶ Pitaj qallariymantapacha chayta yachananchejpaj willarqari? Pitaj ñawpajmantapacha chayta willarqa ninanchejpaj: Chayqa ajinapuni kasqa, nispari? Qankunamantaqa mana pipis chayta willarqachu, nitaj pipis yachacherqachu. Manataj pipis parlasqaykichejta uyarerqachu.

²⁷ Noqarí ñawpajtaña Sión llajtaman nerqani: Qhawariychej, yanapasojniykichej kaypiña, nispa. Jerusalenmantaj uj kachata sumaj willaykunawan kacharqani.

²⁸ Qhawarejtiy, mana chay dioskuna rikhurimunkuchu, nillataj pi yuyaychajpis karqachu. Kay imakunamanta tapurejtiypis, mana pipis kutichiwaj karqachu.

²⁹ Tukuyninku qhasi manakaj kanku, manataj imatapis ruwayta atinkuchu. Jich'aspa ruwasqaykichej lantikunaqa qhasi manakaj kanku.