Isaías 3 - DIOSPA QHELQACHISQAN DEUTEROCANONICAL

Tata Diosqa Judata, Jerusalentawan juchachan

¹ Qhawaychej allinta, noqa Tukuy Atiyniyoj Tata Dios Judá suyumanta, Jerusalén llajtamantawan qhechukapusaj imapichus atinikushanku, chaykunata: Tukuy mikhunanta, tukuy yakuta,

² wapu runankukunata, wapu soldadonkukunata, juezninkukunata, Diosmanta sut'inchajkunata, watuyta yachajkunata, kuraj runakunata ima.

³ Chinkachillasajtaj soldadota kamachejkunata, llajta kamachejkunata, yuyaychajkunata, k'achanchana ruwajkunata, layqakunata ima.

⁴ Chantá noqa Tata Dios paykunata kamachinanpaj majt'illukunata churasaj, wawakunataj paykunata kamachenqanku.

⁵ Runakuna paykunapura sarunakonqanku, purajmantataj maqanakonqanku. Waynakunapis machu runakunaj contranta oqharikonqanku, mana kasu ruwana runakunataj maypaj qhawasqa runakunawan jap'inakonqanku.

⁶ Chay p'unchaypi uj runa wawqenta nenqa: Qanpataqa churakunaykipaj p'achallaykipis tiyapusunki. Chayrayku qan noqaykoj kamachejniyku kay ari, kay thuñisqa llajtamantataj cargollikuy, nispa.

⁷ Wawqentajrí kutichenqa: Mana noqaqa kay tukuyta allinchayta atiymanchu. Wasiypeqa mana mikhuna nitaj p'achapis kanchu, chayrayku ama kamachejmanta churawaychejchu, nispa.

⁸ Cheqapuni Jerusalén llajtaqa urmananpajña kashan. Judá suyupis urmallanqataj, imaraykuchus chaypi tiyakojkuna Tata Diospa contranta parlanku. Mana kamachisqanta kasunkuchu, paypa jatun kayninmantaj sayaykunku.

⁹ Paykunaj uyallankutaj imaynachus kasqankuta willashan. Sodomamanta runakuna jina, mana manchachikuspa tukuypa rikunanta juchallinku. Imachus paykunamanta kanqapis, paykunallataj jasut'ita mask'akunku.

¹⁰ Cheqanta kawsaj runakunata niychej, paykunata tukuy imapi allin rinanta, imaraykuchus ruwasqankuman jina Tata Dios paykunaman kutichiponqa.

¹¹ Juchasapa runakunarí imanakullanqankuchus. Paykunataqa mana allinchu renqa, imaraykuchus paykunaman ruwasqankuman jina pagasqa kanqa.

¹² Majt'illukunalla aylluytaqa munasqankuta ruwanku, warmikunallataj paykunata kamachinku. Ayllúy, kamachejniykichejkunaqa q'otiyashasunkichej, pantay ñankunata pusaspa.

¹³ Tata Diosqa juzgananpaj wakichisqaña kashan. Tukuy runata juchachananpaj qallarinanpajña kashan.

¹⁴ Tata Dios ayllunpa kurajninkunawan juicioman yaykun, ayllunpa llajtankunawan, kamachejkunawan ima. Pay nin: Israelqa uva huertay jina, qankunataj chayta chinkarparichinkichej. Wasiykichejpis wajcha runakunamanta imatachus suwasqaykichejwan junt'a kashan.

¹⁵ Ima nispataj qankuna aylluyta munasqaykichejta ruwankichejri? Imaraykutaj qankuna wajchakunata sonqo nanayta k'umuykachachinkichejri? nispa. Ajinata Tukuy Atiyniyoj Tata Dios nin.

Jerusalenmanta warmikunapaj jasut'i

¹⁶ Tata Dios nillantaj: Sión llajtamanta warmikunaqa anchata jatunchakunku. Paykunaqa umankuta oqharispa purinku, mayta q'ewiykacharikuspa, pata patallata thaskirispa, chakinkupi k'achanchakusqankuta sonarichispa ima.

¹⁷ Chayrayku Tukuyta Kamachej Dios chay warmikunaj umankuman llejti onqoyta apachimonqa. Paykunatataj q'ara umallata saqenqa.

¹⁸ Chay p'unchaypi Tata Dios tukuy k'achanchakusqankuta qhechonqa: Chakinkupi k'achanchasqata, umankupi k'achanchasqata, killaman rijch'akoj walqankukunata ima chinkachenqa.

¹⁹ Jinallataj walqakunata, jaluchukunata, makinkupi k'achanchasqatawan chinkachillanqataj.

²⁰ Chinkachillanqataj uma watanata, chaki k'achanchanakunata, chumpikunata, ima munay q'apaj jawina apaykachanata, sajra manchachi churakusqankuta ima.

²¹ Chantá makipaj anillota, senqapaj anillotapis,

²² raymiman rinapaj p'achakunata, llijllakunata, mantillakunata, wayaqakunata ima Tata Dios chinkachillanqataj.

²³ Jinallataj espejokunata, sumaj linomanta p'achakunata, uma mayt'unata, velokunata ima chinkachenqa.

²⁴ Chaypacha ima munayta q'apaj jawinaj cuentanmanta millay asnaylla kanqa. Chumpiwan watakunankumantaqa waskhallawan watakonqanku, sumaj simp'asqa kanankumantaqa q'ara umalla purenqanku. Chantá sumaj p'achata churakunankumantaqa qhashqa p'achallata churakonqanku, k'achita kanankumantaqa millayman tukonqanku.

²⁵ Jinallataj llajtamanta qharikunaqa espadawan wañuchisqa kanqanku. Soldadokunapis maqanakupi wañonqanku.

²⁶ Llajtapi kaj chhika runakuna mayta waqanqanku, llakiy p'achatataj churakonqanku. Chay llajtataj saqerpayasqa qhepakonqa, imaynatachus alqochasqa warmi pampapi k'umuykusqa qhepakun, ajina.