Isaías 2 - DIOSPA QHELQACHISQAN DEUTEROCANONICAL

Tata Dios kay pachapi kamachenqa

¹ Amozpa churin Isaías mosqoypi jina Judá suyumanta, Jerusalén llajtamantawan kayta rikorqa:

² Jamoj p'unchaykunapi kay jina kanqa: Maypichus Tata Diospa Templon kashan, chay orqoqa tukuy orqokunamanta aswan uyarisqa kanqa. Tukuy suyumantataj runakuna chayman jamonqanku.

³ Tukuy suyumanta ashkha runakuna jamuspa, nenqanku: Jakuchej, Tata Diospa orqonman, Jacobpa Diosninpa wasinman wicharina. Payqa jaqaypi maynintachus purinanchejta yachachiwasun, ajinamantataj chay ñanninta purisunchej, nispa. Sión llajtamanta Diospa kamachisqan purirenqa. Tata Diospa simi nisqanpis Jerusalenmanta tukuynejman chayanqa.

⁴ Payqa suyukuna ch'ajwachinakusqankuta allinchanqa, ashkha runapajtaj justiciata ruwanqa. Paykunataj espadankuta rejaman tukuchenqanku, lanzankumantataj trigo ruthunata ruwanqanku. Nitaj mayqen suyupis waj suyoj contranta maqanakunanpaj wakichikonqachu, nillataj maqanakupaj amañakonqankuchu.

⁵ Jakuchej, Jacobpa ayllun, Tata Diospa k'anchayninpi purinachej.

Tata Diosta wasanchajkunapaj jasut'iy

⁶ Qan Tata Dios, Jacobpa ayllunmanta kajkunata saqerparerqanki. Paykuna ukhupi inti llojsimuynejmanta jamoj yatirikunawan junt'a kashan, jinallataj filisteokuna ukhupi jina watojkunawan junt'allataj kashan. Waj llajtayojkunawantaj tratotapis ruwakunku.

⁷ Israel suyoqa qoriwan, qolqe metalwan junt'a kashan, kapuyninkutaj mana yupay atina. Jinallataj tukuy suyunkupi caballokunawan maqanakuman rinapaj junt'a kashan. Carretankupis mana yupay atina.

⁸ Chantá lantikunawan junt'allataj kashan. Kikin makinkuwan ruwasqanku diosninkukunata yupaychanku.

⁹ Chaymantataj lantikunaman k'umuykunku, chay jinamantaj chayanku. Tata Dios, paykunata ama qhespichiychu.

¹⁰ Israelitakuna, chhanka jusk'uman chinkaykuychej. Tata Diospa manchana jina kayninmanta pakakuychej, jatun kayninpa lliphipiyninmantawan.

¹¹ Uma oqharej runa k'umuykuchisqa kanqa, runaykachaj runataj pampaman urmachisqa kanqa. Chay p'unchaypi Tata Dioslla jatunchasqa kanqa.

¹² Chaypacha Tukuy Atiyniyoj Tata Diospa p'unchaynin jamonqa runaykachajkunaj contrankupi, uma oqharejkunaj contrankupi, may kasqankuta yuyakojkunaj contrankupi ima, tukuyninku k'umuykuchisqa kanankupaj.

¹³ Tata Dios Libanopi jatun cedrokunata k'uturanqa, jinallataj Basanpi encina sach'atapis chinkachillanqataj.

¹⁴ Jatun orqokunata, jatun lomakunatapis pampachanqa.

¹⁵ Tukuy jatun torrekunata, sumaj perqasqa llajtakunatapis thuñirparichenqa.

¹⁶ Tarsismanta tukuy barcokunata, qhatunapaj ashkha imayoj barcokunatapis yakuman p'ultirachenqa.

¹⁷ Ajinamanta runaj wapuykachaynenqa k'umuykuchisqa kanqa, runaj machu machu kaynintaj urmachisqa kanqa. Chay juicio p'unchaypeqa Tata Dioslla jatunchasqa kanqa.

¹⁸ Chantá Tata Diosqa tukuy lantikunatapis chinkachillanqataj.

¹⁹ Chaypacha tukuy runakuna chhanka jusk'ukunaman ayqekonqanku. Jinallataj jallp'aj lajrakusqanman chinkaykonqanku, Tata Diospa k'araj phiñakuyninmanta, jatun kayninpa lliphipiyninmantawan ayqespa, maypachachus pay kay pachata jasut'ej jamonqa, chaypacha.

²⁰ Chay p'unchaykunapi runakuna qorimanta, qolqe metalmanta yupaychanankupaj ruwakusqanku lantikunata saqenqanku. Chay dioskunankutaqa juk'uchakunaman, chiñikunaman ima wijch'uykonqanku.

²¹ Paykuna qaqa jusk'ukunaman, chhanka jusk'ukunaman ima sat'ikonqanku, Tata Diospa k'araj phiñakuyninmanta, jatun kayninpa lliphipiyninmanta ima pakakuspa, maypachachus Tata Dios kay pachata jasut'ej jamonqa, chaypacha.

²² Chayrayku amaña runapi atinikuychejchu, Imataj runari? Runaj kawsaynenqa uj samay jinalla.