Hageo 2 - DIOSPA QHELQACHISQAN DEUTEROCANONICAL

Mosoj Templo

¹ Qanchis kaj killamanta, iskay chunka ujniyoj kaj p'unchaypi, Tata Diosqa sut'inchaj Hageoman ujtawan parlarqa.

² Paytaj Hageota kamacherqa Judapi kamachej Salatielpa churin Zorobabelman, chantá Josadacpa churin Josueman, tukuy runakunamanwan ima kayta willananta:

³ Pikunachus ñawpa Templo imayna k'achituchus kasqanta rikojkunata tapuychej: Kunan kay Templo imaynataj rijch'asunkichej? nispa. Ñawpa Temploman ni chhikitanta rijch'akunchu, icharí?

⁴ Chaywanpis Zorobabel, kunan kallpachakuy ari. Jinallataj qanpis, Josadacpa churin kuraj kaj sacerdote Josué, kallpachakullaytaj. Kay jallp'api tiyakojkuna, qankunapis kallpachakullaychejtaj. Temployta ruwayta qallariychejpacha, imaraykuchus noqa qankunawan kashani, nispa. Ajinata Tukuy Atiyniyoj Tata Dios nisunkichej.

⁵ Tata Dios nillantaj: Imaynatachus Egiptomanta llojsimushajtiykichej, qankunawan tratota ruwarqani, chayman jina Espírituy qankunawan kanqa. Ama manchachikuychejchu, nispa.

⁶ Ajinata Tukuy Atiyniyoj Tata Dios nin: Tumpamantawan janajta, kay pachata, jinataj mama qochata, jallp'atapis kharkatitichisaj.

⁷ Tukuy suyukunatapis kharkatitichillasajtaj, chay runakunataj tukuy kapuyninkuta apamonqanku. Noqataj Temploytataj jatun kayniypa lliphipiyninwan junt'achisaj, nispa. Ajinata nisunkichej Tukuy Atiyniyoj Tata Dios.

⁸ Tukuy Atiyniyoj Tata Dios nillantaj: Qolqepis, qoripis noqajtamin,

⁹ Kay qhepa kaj Temploqa aswan sumaj kanqa ñawpaj kaj Templomanta nisqaqa. Noqataj kay cheqanejpi sonqo tiyaykusqa kawsay kananta ruwasaj. Noqa Tukuy Atiyniyoj Tata Dios chayta nini.

Dios sacerdotekunata k'amin

¹⁰ Kuraj kamachej Darío Babiloniapi iskay watataña kamachishajtin, jisq'on killamanta iskay chunka tawayoj p'unchayninman, Tata Dios sut'inchaj Hageoman ujtawan parlarqa.

¹¹ Payqa Hageota kamacherqa Tukuy Atiyniyoj Tata Diospa sutinpi sacerdotekunata kay jinata tapunanta Diospa kamachisqanmanta:

¹² Nisunman pipis Diospaj t'aqasqa jaywanamanta aychata p'achanpi mayt'uspa apaykachashajtin, chay p'achaj kantun t'antaman, wayk'usqa mikhunaman, vinoman, aceiteman, chayrí, mayqen mikhuyllamanpis chayanman. Chayraykuchu chay mikhuna Diospaj t'aqasqa kanman? nispa. Sacerdotekunataj kuticherqanku: Mana, nispa.

¹³ Chantá Diosmanta sut'inchaj Hageo ujtawan tapullarqataj: Nisunman, sichus mayqen runapis ayata llankhasqanrayku mana llimphupaj qhawasqa kaspa, chay mikhuykunata llankhanman chayqa, chay mikhuykuna ch'ichipaj qhawasqachu kanman? nispa. Sacerdotekunataj kuticherqanku: Arí, ch'ichipaj qhawasqa kanman, nispa.

¹⁴ Chantá Hageo nillarqataj: Ajinata Tata Dios nin: Kay runakunapis chay jinallataj kanku. Tukuy ima ruwasqanku, tukuy ima jaywasqankupis ch'ichipaj qhawasqa kanku.

¹⁵ Kunanmanta ñawpajman sumajta tapurikuychej: Manaraj Tata Diospa Templonta ruwayta qallarishaspa, imaynachus kasqaykichejmanta unanchariychej:

¹⁶ Iskay chunka carga granota oqhariyta yuyajqa chunkallata oqharerqa, icharí? Jinallatataj phishqa chunka p'uñu vinota ruwayta yuyajpis iskay chunka p'uñullata ruwarqa.

¹⁷ Noqamin tukuy chajraykichejta imaymana onqoykunawan, chijchi parawan tukucherqani. Chaywanpis qankuna manapuni noqaman kutirikamorqankichejchu, nispa. Ajinata Tata Dios nisunkichej.

¹⁸ Kunan p'unchay, jisq'on kaj killamanta, iskay chunka tawayoj kaj p'unchaypi noqapaj Temploypa cimientonta churankichej.

¹⁹ Qankuna kay p'unchaymanta allinta unanchariychej. Kunanmanta ñawpajman pirwaykichejpi trigo manaña pisiyanqachu. Mana uvapis, nitaj higopis, ni granadapis, ni olivopis poqoshanrajchu. Chaywanpis kunanmantapacha noqa saminchasqaykichej. Noqa Tata Diosmin chayta nini.

Tata Dios nin Zorobabelman imatachus qonanta

²⁰ Chay p'unchayllataj Tata Dios ujtawan Hageota nerqa:

²¹ Judapi kamachej Zorobabelman kay jinata willay: Tata Dios nisunki: Noqa janajtawan, kay pachatawan kharkatitichisaj.

²² Kay pachapi atiyniyojkunata phiriykusaj, kamachinanku tiyanakunatapis urmarachisaj. Urmarachillasajtaj carretakunata, chay carretakunapi purejkunatawan. Caballokuna, chaypi purejkunapis wañullanqankutaj, paykunapurataj espadawan wañuchinakonqanku.

²³ Chaywanpis kamachiy Salatielpa churin Zorobabel, chay p'unchaypi noqa sellana anilloyta jina waqaychasqayki, qanta ajllakususqayrayku, nispa. Ajinata Tukuy Atiyniyoj Tata Dios nisunki.