Génesis 50 - DIOSPA QHELQACHISQAN DEUTEROCANONICAL

¹ Joseqa tatanpa ayanta ojllaykuytawan, much'aykuspa waqarikorqa.

² Chaymantataj Joseqa jampejkunata kamacherqa Egipto llajtayojkunaj usunkuman jina tatanpa ayanta jampispa ch'akichinankupaj, paykunataj ajinata ruwarqanku.

³ Paykuna tawa chunka p'unchaypi Jacobpa ayanta ch'akicherqanku, imaraykuchus chay jina unaypi jampisqa ayaqa ch'akin. Egipto llajtayojkunaqa Jacob wañupusqanta yachaspa, qanchis chunka p'unchayta llakiy p'achata churakuspa, waqarqanku.

⁴ Wañojmanta yuyarikuspa, llakikuna p'unchay junt'akojtintaj, Joseqa faraonpa kamachinan wasipi kaj kamachikunawan parlarqa: Ama jina kaspa, tatay imatachus niwasqanta faraonman parlaripuwaychej.

⁵ Tatayqa wañupunan qayllapi kashaspa, tiluchiwarqa wañupojtin paypa ruwachikusqan aya p'ampanaman ayanta p'ampamunayta. Chayqa Canaán jap'iypi kashan. Noqa munayman faraón saqerinawanta tataypa ayanta p'ampamoj rinayta. P'ampakampuspataj, noqa kutimpusaj, nispa.

⁶ Faraontaj nerqa: Riy ari, pay kamachisusqanman jina tataykej ayanta p'ampakampuy, nispa.

⁷ Chantá Joseqa tatanpa ayanta apaspa, p'ampakampoj rerqa. Jinataj faraonta yanapajkuna, kurajkuna, chantá Egipto suyupi tukuy kurajkuna ima Joseta riyserqanku.

⁸ Jinallataj Jacobpa tukuy ayllun, Josejpa ayllun, wawqenkuna ima paywan rerqanku. Gosenpeqa wawakunallata, chantá uywakunatawan imalla saqerqanku.

⁹ Josewan ashkha runakuna rerqanku, carretakunapi, caballokunapi ima.

¹⁰ Jordán mayoj chimpanpi Atadpa eranman chayaspataj, Jacobmanta maytapuni waqarikorqanku. Chaypi Joseqa tatanmanta llakikusqanrayku qanchis p'unchayta qhashqa p'achata churakuspa karqa.

¹¹ Chaynejpi tiyakojkuna Atad erapi chay jinatapuni waqasqankuta rikuspa, nerqanku: Egipto llajtayojkuna wañojninkumanta manchayta waqaspa p'ampayta yachasqanku, nispa. Chayrayku chay cheqata “Abel Mizrayin”, nispa suticharqanku. Chayqa Jordán mayoj inti llojsimuyninnejpi kashan.

¹² Jacobpa churinkuna tatankoj kamachisqanman jina ruwarqanku.

¹³ Chayrayku Jacobpa ayanta Canaanman apaspa, Macpela chhanka jusk'upi p'amparqanku. Chaytaqa Abraham Jetpa churin Efronmanta rantikusqa, chaypi tukuy ayllun p'ampakunankupaj. Chay jallp'a, jinataj chhankapi jusk'oqa Mamremanta inti llojsimuynejpi kashan.

¹⁴ Chantá José tatanpa ayanta p'ampaykuytawan, wawqenkunawan khuska, jinataj pikunachus riyserqanku chaykunawan, Egiptoman kutiporqa.

José wawqenkunata sonqochan

¹⁵ Jacob tatanku wañupusqanmanta qhepata, Josejpa wawqenkuna ninakorqanku: Ichapis José noqanchejpaj phiñasqaraj kashaspa, payta tukuy mana allinta ruwasqanchejmanta kunan pagachikuwasunman, nispa.

¹⁶ Chayrayku Joseman nichimorqanku: Tatanchej manaraj wañupushaspa, kayta qanman ninaykuta kamachiwarqayku:

¹⁷ Wawáy, ama jina kaspa, wawqeykikuna millayta ruwaspa, qanpa contraykita juchallisqankuta qhespichiy ari, imaraykuchus paykuna mana allintachu ruwasorqanku, nispa. Chayrayku nirikusuyta munayku, qanpa contraykita ruwasqaykumanta qhespichinawaykuta. Ajinata ruway, imaraykuchus noqaykoqa tataykej Diosninpa kamachinkuna kayku, nispa. Kachakuna ajinata willashajtinku, José waqayta qallarerqa.

¹⁸ Chantá wawqenkunañataj Joseman rispa, paypa ñawpaqenpi qonqoriykukorqanku, pampakama k'umuykuspataj, nerqanku: Kunanmantapacha wata runayki kasqayku, nispa.

¹⁹ Josetajrí paykunata nerqa: Ama manchachikuychejchu. Noqaqa mana Dioschu kani.

²⁰ Qankuna mana allinta ruwawayta munarqankichej, Diostajrí mana allin kajta allinman tukucherqa, kunan imatachus rikushasqaykichejta ruwananpaj, ashkha runata kawsachinanpaj ima.

²¹ Chayrayku ama manchachikuychejchu. Noqaqa qankuna, jinataj wawaykichejkuna kawsanankupaj mikhunata qollasqaykichejpuni, nispa. Ajinata Joseqa wawqenkunata sonqocharqa, imaraykuchus manchay k'achata parlapayaykorqa.

²² Chantá Josewan, tatanpa tukuy ayllunwan ima Egiptopi tiyakaporqanku. José 110 watata kawsarqa.

²³ Chayrayku pay churin Efrainpa wawankunaj allchhinkunata rikorqaraj. Jinallataj Manasesqa churin Maquirpa wawankunatapis arphin patapi uywarqaraj.

²⁴ Uj kuti Joseqa wawqenkunata nerqa: Noqaqa wañupusajña. Diostajrí qankunata yanapaspa, kay jallp'amanta orqhosonqachej. Chaymantataj, ima jallp'atachus Abrahamman, Isaacman, Jacobman ima tiluspa, qonanta nerqa, chay jallp'aman pusasonqachej, nispa.

²⁵ Chantá Joseqa Israelpa churinkunata tilucherqa: Diosqa cheqatapuni qankunata yanapaj jamonqa, chaypachataj qankuna tulluykunata kaymanta apankichej, nispa.

²⁶ José 110 watayoj kashaspa, wañuporqa. Chantá ayanta jampiwan ch'akichispa, Egiptopi p'ampana cajonman churaykorqanku.